Hizik'k'eela 48 - ጌሻ ማጻፋ

ቢታ ሻኩዋ

¹ “ቢታ ሻካናዉ ማዝጋበቴዳ ዛራቱዋ ሱንይ ሀዋ: ሁጲሳ ባጋና እት ሳማይ ዳና ዛርያዉ እመቶ። ሄዌካ ሄትሎናፐ ሀማታዉ አፍያ ኦግያ ካሊደ፥ ሄዋፐካ ዳማስቆ ዛዋን ደእያ ሀጻር-ኤናና ማታ ካታማ አደ ሀማተ ማታን ዛዋቴ። ሄዌ አዋይ ዶልያ ባጋፐ ቢደ አዋይ ዉልያ ባጋ ጋካናዉ ደእያ ሳአዉ ሁጲሳ ባጋ ዛዋ ግዳና።

² ዳና ዛዋና ኦይቀቲደ፥ አዋይ ዶልያ ባጋፐ አዋይ ዉልያ ጋካናዉ ደእያ እት ሳማይ አሴራ ዛርያዉ እመቶ።

³ አሴራ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ጋካናዉ ደእያ እት ሳማይ ንፍታሌማ ዛርያዉ እመቶ።

⁴ ንፍታሌማ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ጋካናዉ ደእያ እት ሳማይ ምናሰ ዛርያዉ እመቶ።

⁵ ምናሰ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ባጋ ጋካናዉ እት ሳማይ ኤፍሬማ ዛርያዉ እመቶ።

⁶ ኤፍሬማ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ጋካናዉ እት ሳማይ ሮቤላ ዛርያዉ እመቶ።

⁷ ሮቤላ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ጋካናዉ እት ሳማይ ይሁዳ ዛርያዉ እመቶ።

⁸ “ይሁዳ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ባጋ ጋካናዉ ደእያ እት ሳማ ዱማያ ዎ። አዉ ጎምፓይ ታማነ ላኡ ክሎ ሜትረነ ባጋ ግዴ። አዋይ ዶልያ ባጋፐ አዋይ ዉልያ ባጋ ጋካናዉ ደእያ እት ዛርያ ሻክና ጋክያ ሳማና ቃራ። አዉ ግዶ ግሸቻን ጌሻ ጎሊ ደኤ።

⁹ “ሄ ሳማፐ ኔን መና ጎዳዉ ዱማያደ ዎያ ሳአይ ታማነ ላኡ ክሎ ሜትረነ ባጋ አዱሳነ ታሙ ክሎ ሜትረ አኮ ግዶ።

¹⁰ ሄ ሳአይ ቄሳቶ ዱማዬዳ ሳኣ ግዶ፤ እ ሁጲሳ ባጋና ታማነ ላኡ ክሎ ሜትረነ ባጋ አዱሳ፤ አዋይ ዉልያ ባጋና እቼሹ ክሎ ሜትረ አኮነ አዋይ ዶልያ ባጋናካ እቼሹ ክሎ ሜትረ አኮ፤ ቃይ ገድሳ ባጋና ታማነ ላኡ ክሎ ሜትረነ ባጋ አዱሳ። መና ጎዳ ጌሻ ጎሊ አዉ ግዶ ግሸቻን ደኤ።

¹¹ ሀ ዱማይ ዎዳ ሳአይ እስራኤልያ አሳይ ታ ኦግያፐ ዎራ ስምያ ዎደ፥ ኡንቱንቱና ዎራ ስሜዳ ሌዋቱዋዳን ግደናን፥ አማነቲደ ታዉ ኦደ ጋምኤዳ፥ ጌሻ ቄሳቶ፥ ጻዶቃ ያራቶ እመቶ።

¹² ሄዌ መና ጎዳዉ ዱማዬዳ ቢታፐ ኡንቱንቶ ዱማ ሳማ፤ እ ኡባፐ አዳ ጌሻ። ኡንቱንቱ ሳማይ ሌዋቶ ሳማን ዛዋቶ።

¹³ “ቄሳቱ ዋ ዛዋና ኦይቀቲደ፥ ሌዋቶካ አዱሳተ ታማነ ላኡ ክሎ ሜትረነ ባጋ፥ ጎምፓይካ እቼሹ ክሎ ሜትረ ግዴዳ እት ሳማይ እመቶ።

¹⁴ ኡንቱንቱ ሄ ጋድያፐ አያነ ባይዞፕኖ ዎይ ላሞፕኖ። ሄዌ ቢታ ኡባን ዱማቴዳዋ ግድያ ድራዉ፥ ሀራ አሳ ኩሽያን ገላናዉ በሰና፤ መና ጎዳዉ እ ጌሻ ሳኣ።

¹⁵ “አቴዳ ላኡ ክሎ ሜትረነ ባጋ አኮነ ታማነ ላኡ ክሎ ሜትረነ ባጋ አዱሳ ሳአይ ካታማ አሳይ ኡባይ ኮን ጎኤትያ ጎልያ ኬጽያነ መህያ ሄምያ ሳኣ ግዶ፤ ካታማይ ሄ ቢታዉ ግዶ ግሸቻን ደኦ።

¹⁶ ሄ ካታማይ ኦይዱ ሚዛናን ደኤ። ሁጲሳ ባጋይ 4 ክሎ ሜትረነ ባጋ፤ ገድሳ ባጋይ 4 ክሎ ሜትረነ ባጋ፤ አዋይ ዶልያ ባጋይ 4 ክሎ ሜትረነ ባጋ፤ አዋይ ዉልያ ባጋይካ 4 ክሎ ሜትረነ ባጋ።

¹⁷ ካታማዉ ሄን ጋዲ ደኦ፤ ሄ ጋዲ ሁጲሳ ባጋና፥ ገድሳ ባጋና፥ አዋይ ዶልያ ባጋናነ አዋይ ዉልያ ባጋና 250 ዋ አኮ ግዶ።

¹⁸ ጌሻ ሳኣ ባጋና አቴዳ ሳአይ አዋይ ዶልያ ባጋ ዋያ ዎደ፥ አዱሳተይ እቼሹ ክሎ ሜትረ፤ አዋይ ዉልያ ባጋ ዋያ ዎደ፥ አዱሳተይ እቼሹ ክሎ ሜትረ። ሄ ሳኣን ሞኬዳዌ ኡባይ ሄ ካታማን ኦያዋንቶ ቁማ ግዳና።

¹⁹ እስራኤልያ ዛረ ኡባፐ ሄ ካታማን ኦናዉ ይያዋንቱ ሄ ቢታ ጎሽኖ።

²⁰ ህንተ ዱማይያ ሳአይ ኡባና ኦይዱ ማርያናካ ታማነ ላኡ ክሎ ሜትረነ ባጋ አዱቄ። ሄ ሳአይ ካታማይ ኬጸቴዳ ሳኣነ ጌሻ ሳኣ ባረናን ጉጄ።

^21-22 “ጌሻ ጎልያፐ፥ ቄሳቱ ዋ ሳማፐ፥ ሌዋቱዋ ሳማፐነ ካታማ ሳኣፐ አዋይ ዶልያ ባጋናነ አዋይ ዉልያ ባጋና ደእያ አቴዳ ቢታይ ካፖ ግዶ። ሄ ቢታዉ ጎምፓይ ታማነ ላኡ ክሎ ሜትረነ ባጋ። ሄ ካፑዋ ቢታይ ሁጲሳ ባጋና ይሁዳ ጋኬዳ ሳማን፥ ገድሳ ባጋና ቢንያማ ጋኬዳ ሳማን ዛዋቴ።

²³ አቴዳ ዛረቶ ቢታይ ሀዋዳን ሻከቴ። አዋይ ዶልያ ባጋፐ አዋይ ዉልያ ባጋ ጋካናዉ፥ እት ሳማይ ቢንያማ ዛርያዉ እመቶ።

²⁴ ቢንያማ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ባጋ ጋካናዉ ደእያ እት ሳማይ ስሞና ዛርያዉ እመቶ።

²⁵ ስሞና ዛዋና ኦይቀቲደ፥ አዋይ ዶልያ ባጋፐ አዋይ ዉልያ ባጋ ጋካናዉ ደእያ እት ሳማይ ይሳኮራ ዛርያዉ እመቶ።

²⁶ ይሳኮራ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ባጋ ጋካናዉ ደእያ እት ሳማይ ዛብሎና ዛርያዉ እመቶ።

²⁷ ዛብሎና ዛዋና ኦይቀቲደ፥ አዋይ ዶልያ ባጋፐ አዋይ ዉልያ ባጋ ጋካናዉ ደእያ እት ሳማይ ጋዳ ዛርያዉ እመቶ።

²⁸ ጋዳ ገድሳ ዛዋይ ታማራ ካታማፐ ደንዲደ፥ ማሪባ-ቃዴሳን ደእያ ፑልቱዋና አደ፥ ግብጼ ሻፋ ካሊደ ቢደ፥ ሜድተራነ አባ ጋኬ።

²⁹ “ህንተ እስራኤልያ አሳዉ ላታ ኦደ ሻካና ቢታይ ሀዋ፤ ሀዋንቱ ኡንቱንታ ጋካና ሳማቱዋ። ታን ኡባ ሞድያ መና ጎዳይ ሀዋ ኦዳይ።

ካታማ ፐንገቱዋ

³⁰ “ካታማፐ ከስያ ፐንገቱ ሀዋንታ። ኡንቱንቱ እስራኤልያ ዛራቱዋ ሱንን ጼገታና። ሁጲሳ ድርሳ ግምቢ 4,500 ዋ አዱቃና፤

³¹ ካታማ ፐንገቱ እስራኤልያ ዘረ ሱንን ጼገታና። ሁጲሳ ባጋና፤ ሮቤላ ፐንግያ፥ ይሁዳ ፐንግያነ ሌዊያ ፐንግያ ጌተትያ ሄዙ ፐንገቱ ደአና።

³² አዋይ ዉልያ ድርሳ ግምቢ 4,500 ዋ አዱቃና፤ ሄ ግምቢያን ዮሴፎ ፐንግያ፥ ቢንያማ ፐንግያነ ዳና ፐንግያ ጌተትያ ሄዙ ፐንገቱ ደአና።

³³ ገድሳ ድርሳ ግምቢ 4,500 ዋ አዱቃና፤ ሄ ግምቢያን ስሞና ፐንግያ፥ ይሳኮራ ፐንግያነ ዛብሎና ፐንግያ ጌተትያ ሄዙ ፐንገቱ ደአና።

³⁴ አዋይ ዉልያ ድርሳ ግምቢ 4,500 ዋ አዱቃና፤ ሄ ግምቢያን ጋዳ ፐንግያ፥ አሴራ ፐንግያነ ንፍታሌማ ፐንግያ ጌተትያ ሄዙ ፐንገቱ ደአና።

³⁵ “ካታማ ዩሹ ኡባና ልክና፥ 18,000 ዋ ግዳናዋ። ሄ ዎድያፐ ዶሚደ ሄ ካታማይ፥ ‘መና ጎዳይ ሄዋን ደኤ’ ያጌቲደ ጼሰታና” ያጌ።