Hizik'k'eela 36 - ጌሻ ማጻፋ

ጾሳይ እስራኤልያ አንጃና

¹ “ላ አሳ ናአዉ፥ እስራኤልያ ደረቶ ትምቢትያ ሀዋዳን ያጋደ ኦዳ፤ ‘ህንተኖ፥ እስራኤልያ ደረቶ፥ መና ጎዳ ቃላ ስስተ!

^2-3 ኡባ ሞድያ መና ጎዳይ ህንተ ሞርከቱ፥ ሀሹ! “በን ቃ ደረቱ ኡባይ ኑዉ ላታ ግዴድኖ!” ያጌድኖ። ሄዋ ድራዉ ያግ ትምቢትያ ኦድተ፥ ኡንቱንቱ ህንተና ኡባ ሳኣና መንሬደ መላ ኦዳ ድራዉ፥ ህንተ ጮራ ካዉተቱዋን ሞደታናዳን ኦዳ ድራዉ፥ ህንተ ዳሮ ቦረትያባነ ቅሊጨትያባ ኦሰቴድታ ያጌ ኡባ ሞድያ መና ጎዳይ።

⁴ መና ጎዳ ቃላ ስስተ! ኡባ ሞድያ መና ጎዳይ ደረቶነ ዞዘቶ፥ ዛንጋራቶነ ዎምባቶ፥ ዩሹዋን ደእያ ሀራ ካዉተቱ ኦይቄዳነ ቅሊጬዳ ሳአቶነ ባዬዳነ መላ ግዴዳ ካታማቶ ሀዋዳን ያጌ።

⁵ ኡባ ሞድያ መና ጎዳይ ቱሙዋፐ ሀዋዳን ያጌ፤ “ታን ታ ኤጽያ ሀንቁዋን ሀራ ካዉተቱዋ ቦላነ ኤዶማ ኡባ ቦላ ሃሳያድ። ኡንቱንቱ ዎዛናፐ ናሸቲደነ ካደ፥ ታ ቢታ ባረንቶ አኬድኖ፤ ሄን ጋደቱዋካ ላቴድኖ።

⁶ ሄዋ ድራዉ፥ እስራኤልያ ቢታባ ትምቢትያ ኦዳ። ካዉተቱዋ ቦርያ ድራዉ፥ ኡባ ሞድያ መና ጎዳይ ሀንቁዋን ምሸታደ ግያዋ ኡባ ደረቶ ዞዘቶ፥ ዛንጋራቶነ ዎምባቶ ኦዳ።

⁷ ዩሹዋን ደእያ ካዉተቱ ኡባይ ቦረታናዋ ታን ኡባ ሞድያ መና ጎዳይ ቱሙዋፐ ጫቃደ ኦዳይ።

⁸ “ ‘ “ሽን ህንተኖ፥ እስራኤልያ ደረቶ፥ ህንተ ዳሻና፤ ታ አሳዉ እስራኤልያዉ አይፋና። አያዉ ጎፐ፥ ኡንቱንቱ ኤለካ ባረንቱ ቢታ ስማና።

⁹ ታን ህንተናና ደአይ፤ ታን ህንተኮ ስማና፤ ህንተ ቢታይ ጎሸታናነ ዘረታና።

¹⁰ ታን እስራኤልያ አሳ ፓይዱዋ ሀ ቢታን ዳርሳና፤ ካታማቱዋን አሳይ ደአና፤ ላለቴዳ ሳአቱ ስሚደ ግምበታና።

¹¹ ታን አሳካ መህያካ ህንተ ቦላ ዳርሳና፤ ኡንቱንቱ የለታናነ ጮራታና። በንዋዳንካ ህንተ ቦላ አሳይ ደአናዳን ታን ኦና። ታን ህንተዉ ካሰዋፐ አያ ሎኦባ ኦና። ታን መና ጎዳ ግድያዋ ህንተ ሄዋን ኤራና።

¹² ታን ታ አሳይ እስራኤሊ ህንተ ቦላን ዛር ደአናዳን ኦና። ላኤን ሄ ቢታይ ህንተ ናናቱዋ ይሰና። ኡንቱንቱ ህንተና ላታና፤ ህንተካ ኡንቱንቶ ላታ ግዳና” ያጌ።

¹³ “ ‘ኡባ ሞድያ መና ጎዳይ ሀዋዳን ያጌ፤ አሳይ ሄ ቢታ፥ ህንተ ካዉተይካ ናአይ ባይናዋ ኦዳ ህንተ ቢታይካ አሳ ምያዋ ያግያዌ ቱማ።

¹⁴ ሄዋ ድራዉ፥ ሀዋፐ ስንናዉ ሀ ቢታቱ አሳ ሚክታነ ህንተ ካዉተ ናአይ ባይናዋ ከስክታ። ታን ኡባ ሞድያ መና ጎዳይ ሀዋ ኦዳይ።

¹⁵ ቃይ ካዉተቱዋ ቦርያ ሀዋፐ ስንናዉ ታን ህንተና ስስከ፤ ህንተ አሳ ዬላካ ሀዋፐ ስንናዉ ቶክክታ፤ ቃይ ሄ ቢታይ ህንተዉ በ ግዳና። ኡባ ሞድያ መና ጎዳይ ሀዋ ኦዳይ ያጌ’ ያጋ” ያጊደ ዬዳ።

¹⁶ ቃይካ መና ጎዳ ቃላይ ታኮ ሀዋዳን ያጊደ ዬዳ፤

¹⁷ “ላ አሳ ናአዉ፥ እስራኤልያ አሳቱ ባረንቱ ቢታን ደእያ ዎደ፥ ኡንቱንቱ ባረንቱ ኦግያንነ ባረንቱ ኦሱዋን ቢታ ቱንሴድኖ፤ ታ ስንን ኡንቱንቱ ኤሻይ ማጫ አሳ ፒላ ቱናተ ማላ።

¹⁸ ኡንቱንቱ ቢታን ሱ ጉሴዳ ድራዉነ ባረንቱ ኤቃን ቢታ ቱንሴዳ ድራዉ፥ ታ ሀንቁዋ ኡንቱንቱ ቦላን ጉሳድ።

¹⁹ ታን ኡንቱንታ ካዉተቱዋ ግዶን ላላድ፤ ኡንቱንቱካ ቢታ ኡባን ላለቴድኖ። ታን ኡንቱንታ ኡንቱንቱ ኤሻዳንነ ኡንቱንቱ ኦሱዋዳን ፕርዳድ።

²⁰ ኡንቱንቱ ቤዳ ሳኣ ኡባን አሳይ ኡንቱንታ፥ ‘ሀዋንቱ መና ጎዳ አሳቱዋ፤ ሽን ኡንቱንቱ አ ቢታፐ ከሴዳዋንታ’ ያጌ፤ ሄዋን ኡንቱንቱ ታ ጌሻ ሱን ቱንሴድኖ።

²¹ ሽን እስራኤልያ አሳይ ቤዳ ካዉተቱዋ ኡባ ግዶን ቱንሴዳ ታ ጌሻ ሱንባይ ታና ምቼ።

²² “ሄዋ ድራዉ፥ ኔን እስራኤልያ አሳዉ ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ “ህንተኖ፥ እስራኤልያ አሳቶ፥ ታን ሀዋ ኦያዌ፥ ህንተ ቤዳ ካዉተቱዋ ኡባ ግዶን ቱንሴዳ ታ ጌሻ ሱን ድራሳፐ አትና፥ ህንተ ድራሳ ግደና።

²³ ህንተ ቱንስና፥ ካዉተቱዋ ግዶን ቱኔዳ ታ ዎልቃማ ሱን ጌሻተ ታን በሳና። ኡንቱንቱ ጼልሽን፥ ህንተ ባጋና ታን ታ ጌሻተ በስያ ዎደ፥ ታን መና ጎዳ ግድያዋ ኡንቱንቱ ኤራና። ታን ኡባ ሞድያ መና ጎዳይ ሀዋ ኦዳይ።

²⁴ “ ‘ “አያዉ ጎፐ፥ ታን ህንተና ካዉተቱዋ ግዶፐ ከሳና፤ ቢታ ኡባፐካ ሺሻና። ህንተ ቢታ ዛራደ አሀና።

²⁵ ታን ህንተና ጽሎ ሃን ፑሻካና፤ ህንተካ ጌያና፤ ያታደ ህንተና ህንተ ቱናተ ኡባፐነ ህንተ ኤቃ ኡባፐ ጌሻና።

²⁶ “ ‘ “ታን ህንተዉ ኦራ ዎዛና እማና፤ ኦራ አያናካ ህንተ ግዶን ዎና፤ ቃይ ሹቻ ዎዛና ህንተፐ ከሳደ፥ አሹዋ ዎዛና እማና።

²⁷ ታን ታ አያና ህንተ ግዶን ዎና፤ ያታደ ህንተ ታ ዎጋ ካላናዳንነ ታ ህግያ ምንሲደ ናጋናዳን ኦና።

²⁸ ታን ህንተ ማይዛ አዋቶ እሜዳ ቢታን ህንተ ደአና፤ ህንተ ታ አሳ ግዳና፤ ታንካ ህንተ ጾሳ ግዳና።

²⁹ ህንተ ቱናተ ኡባፐ ታን ህንተና አሻና፤ ካይ ህንተዉ ዳራናዳን ኦና፤ ኮሻካ ላኤን ህንተ ቦላ አህከ።

³⁰ ኮሻ ጋሱዋን ህንተ ካዉተቱዋ ግዶን ካዉሸናዳን፥ ታን ህንተ ም አይፍያነ ህንተ ሾይቃ ካ ዳርሳና።

³¹ ሄ ዎደ ህንተ ህንተ ኢታ ኦግያነ ህንተ ሎኦ ግደና ኦሱዋ ሀሳያና፤ ህንተ ናጋራነ ህንተ ቱና ኦሱዋ ድራዉ፥ ህንተ ህንተና ሸነታና።

³² ታን ሀዋ ኡባ ኦያዌ ህንተ ድራሳ ግደናዋ ኤርተ። ህንተኖ፥ እስራኤልያ አሳቶ፥ ህንተ ህንተ ሀኖታን ዬላትተነ ካዉሽተ። ታን ኡባ ሞድያ መና ጎዳይ ሀዋ ኦዳይ” ያጌ።

³³ “ ‘ኡባ ሞድያ መና ጎዳይ ሀዋዳን ያጌ፤ “ታን ህንተና ህንተ ናጋራ ኡባፐ ጌሽያ ጋላስ፥ ህንተ ካታማቱዋን ዛረደ አሳይ ደአናዳን ኦና፤ ኮለቴዳዋንቱካ ስሚደ ግምበታና።

³⁴ አ ማታና አያ አሳ ስንን መላ ግዲደ ደእያ ቢታይ መላ ግድያዋ አጊደ ጎሸታና።

³⁵ አሳይ ሃሳዪደ፥ ሀዌ ካሰ መላ ግዴዳ ቢታይ ሀእ ኤደነ ገነትያ ማላ ግዴዳ፤ ካሰ ኮለቴዳ፥ አሳይ ደኤናነ መላ ካታማቱካ ሀእ ዩሹ ግምበቴዳነ አሳይ ደእያ ካታማቱዋ ግዴድኖ ያጋና።

³⁶ ሄ ዎደ ህንተ ዩሹዋን ደእያ አቴዳ ካዉተቱ፥ ታን መና ጎዳይ ኮለቴዳ ካታማቱዋ ዛራደ ኬጼዳዋነ መላ ቢታይ ስሚደ ካ ሞካናዳን ኦዳዋ ኤራና። ታን መና ጎዳይ ሀዋ ኦዳድ፤ ታን ኦዴዳዋ ታንካ ኦና” ያጌ።

³⁷ “ ‘ኡባ ሞድያ መና ጎዳይ ሀዋዳን ያጌ፤ “እስራኤልያ አሳይ ቃይካ እት ገደነ ታና ማዱዋ ኦቻናዳን ኦና፤ ያታደ ኡንቱንቱ ፓይዱዋ ዉድያዳን ጮርሳና።

³⁸ ያርሽያ መህያ ዉድያዳን፥ የሩሳላመን ባላ ጋላሳን ያርሾ ሺሼዳ ዉድያዳን፥ ኡንቱንቱ ኮለቴዳ ካታማቱዋን አሳ ዉዲ ኩማና። ታን መና ጎዳ ግድያዋ ኡንቱንቱ ሄ ዎደ ኤራና” ያጌዳ’ ያጋ” ያጊደ ዬዳ።