Hizik'k'eela 19 - ጌሻ ማጻፋ

እስራኤልያ ዳናቱዋ ዝላሳ

¹ ጾሳይ ህዝቄላ፥ “እስራኤልያ ካፓቶ ሀዋዳን ያጋደ ዝላላ፤

² “ህንተ አታ ጋሞቱዋ ግዶን፥ እዛ አይባ ጋማቲ! ያላጋ ጋሞቱዋ ግዶን ግሳደ፥ ባረ ማራቱዋ ድቻዱ።

³ እዛ ባረ ማራቱዋፐ እቱዋ ድችና፥ ዎዳላ ጋሙዋ ከሴዳ። እ ሻንካ ታማሪደ፥ አሳ ሜዳ።

⁴ ካዉተቱ ኡባይ አባ ስሲደ፥ ኦላን ገሊደ ኦይቀቴዳ። ኡንቱንቱ አ ማጋን ጎቺደ፥ ግብጼ ቢታ አፌድኖ።

⁵ “አ አታ ናጎዌ ፖለተናን እጽና፥ ህዶታይ ዬዳዋ በኣደ፥ ባረ ማራቱዋፐ ላኤንዋ ድቻደ፥ ዎዳላ ጋሙዋ ከሳዱ።

⁶ እ ዎዳላ ጋሙዋ ግዲደ፥ ሀራ ጋሞቱዋ ግዶን፥ ያነ ሃነ ስመረቴዳ። እ ሻንካ ታማሪደ፥ አሳ ሜዳ።

⁷ እ ኡንቱንቱ ዎልቃማ ጌሱዋ መንሬደ፥ ካታማካ ባይዜዳ። ቢታይነ ቢታን ደእያ አሳይ ኡባይ፥ አ ጉደን ሻቢረቴዳ።

⁸ ዩሹዋን ደእያ ካዉተቱ ኡባይ፥ አ ኦይቃናዉ ጲርያ የጌድኖ። ባረንቱ ግትያካ ምጬድኖ፤ ባረንቱ ኦላን አ ኦይቄድኖ።

⁹ ኡንቱንቱ ባረንቱ ማጋን አ ጎቺደ፥ ኮዳን ጊጌዳ ጉ ጎልያን የጊደ፥ ባብሎነ ካትያኮ አፌድኖ። ላኤን አ ጉደይ እስራኤልያ ደረቱዋን ስሰተናዳን፥ ኡንቱንቱ አ ቃሾ ጎልያ ገልሴድኖ።

¹⁰ “ ‘ነ አታ ሃ ዶናን፥ ቶከቴዳ ዎይንያ ቱራ ማላ። ዳሮ ሃይ ደእያ ድራዉ፥ ሄ ዎይንያ ቱራይ አይፍያ ዳርጻጽ ኡቴዳ፤ ቃይ ዳሮ ዳሻና ደኤ።

¹¹ አ ማራቱዋፐ ምንያዌ፥ ሞድያዋንቱ ጻምኣ ግዴዳ። አ ማራይ ዎልቃማ ማራቱዋፐ አዱቂደ፥ ቦላዉ አዳ። ባረ ማራቱዋ ጮራተንነ ቃተን ቦላና ቤቴዳ።

¹² ሽን ሄ ቱራይ ሀንቁዋን ሾደቲደ፥ ቢታን ኦለቴዳ። አዋይ ዶልያ ጫርኩ አ አይፍያ መልስና ቆቆፈቴዳ፤ አ ምኖ ታሺ መልና፥ ታማይ ሜዳ።

¹³ ሀእ ቃይ እ ሃ ባይና፥ መላ ቢታን ቶከቴዳ።

¹⁴ ታማይ አ ማራቱዋፐ እቱዋ ኦይቂደ፥ አ አይፍያናካ ድፕ ኦደ ሜዳ። ያትና፥ ካዉተ ጻምኣ ግድያ፥ አይ ምኖ ማራይካ አ ቦላን አትቤና። “ ‘ሀዌ ዬኩዋ ዝላሳ፤ ሀዋ ዝላሳዳን ጎኤታናዉ በሴ’ ያጋ” ያጌዳ።