Doometsaa 30 - ጌሻ ማጻፋ1 ራሄላ ያቆባዉ ናና የላቤናዋ በኤዳ ዎደ፥ ባረ ምቻቶ ቃናታዱ፤ ሄዋ ድራዉ ያቆባ፥ “ታዉ ናና እማ፤ ሄዌ ዮፐ፥ ታን ሀይቃና” ያጋዱ። 2 ያቆብ ራሄሎ ሀንቀቲደ፥ “ታና ነዉ የሉዋ ድጌዳ ጾሳ ጋድየ?” ያጌዳ። 3 እዛ፥ “ታ ዳንጋጽራቶ ባሎ ህኖ በአ፤ እዛ ታ ድራዉ የላና ማላ ኔን እዞ አካ፤ ያቶፐ እዝ ባጋና ታንካ ናኣ ዳዮ ግዳና” ያጋዱ። 4 ባረ ዳንጋጽራቶ ባሎ ማቻቶ ኦደ አካና ማላ፥ አዉ እማዱ፤ ያቆብ እዞ አኬዳ። 5 ባላ ሻሃራደ አቱማ ናኣ ያቆባዉ የላዱ። 6 ያትና ራሄላ፥ “ጾሳይ ታዉ ዳናቴዳ፤ ታ ዎሳካ ስሲደ፥ ታዉ አቱማ ናኣ እሜዳ” ያጋዱ። ሄዋ ድራዉ አ ዳና ሱንዱ። 7 ራሄል ዳንጋጽራታ ባላ ሀራ ሻሃራደ፥ ያቆባዉ ላኤንዋ አቱማ ናኣ የላዱ። 8 ራሄላ፥ “ታን ታ ምቻትና ዎልቃማ ባጽያ ባጸታደ ጾናድ” ያጋዱ። ሄዋ ድራዉ አ ንፍታሌማ ሱንዱ። 9 ልያ ባረዉ የሉ ኤቄዳዋ በኣደ፥ ባረ ዳንጋጽራቶ ዝልፖ አፋደ ያቆብ እዞ አካና ማላ እማዱ። 10 ልያ ዳንጋጽራታ ዝልፓ አቱማ ናኣ ያቆባዉ የላዱ። 11 ልያ፥ “ላ ሀዌ አያ ሎኦ ካጬ!” ያጋዱ። ሄዋ ድራዉ ጋዳ ሱንዱ። 12 ልያ ዳንጋጽራታ ዝልፓ ያቆባዉ ላኤንዋ አቱማ ናኣ የላዱ። 13 ልያ፥ “ታን አይ ኬሻ ናሸታይታሻ! ማጫ አሳይ ታና ናሸትያኖ ጋና” ያጋዱ። ሄዋ ድራዉ አ አሴራ ሱንዱ። 14 ዛርጋ ጫክያ አግናን ሮቤል ጋደ ቢደ፥ እንኮይያ ግያ ትማትምያ ማላትያ ቴራ ደሚደ፥ ባረ አት ልይዉ አሄዳ። ራሄላ ልዮ፥ “ነ ናኣ እንኮይያፐ ታዉ እማ” ያጋዱ። 15 ሽን ልያ፥ “ታ አስና ኔን ዎ አኬዳዌ ግደናን እጽና፥ ቃይ ታ ናኣ እንኮይያ አካይ?” ያጋዱ። ራሄላ፥ “ያቶፐ፥ ነ ናኣ እንኮይያ ድራዉ ያቆብ ሀቼ ቃማ ኔናና አቆ” ያጋዱ። 16 ሄ ጋላሳ ኦማርስ ያቆብ ዎራፐ ዬዳ ዎደ፥ ልያ አ ሞካናዉ ከሳደ አ፥ “ኔን ታናና አቃና ኮሼ፤ አያዉ ጎፐ፥ ታን ታ ናኣ እንኮይያን ኔና ከራዉ አካ ድጋድ” ያጋዱ። ሄዋ ድራዉ እ ሄ ጋላሳ ቃማ እዝና አቄዳ። 17 ጾሳይ ልያ ዎሳ ስሴዳ፤ እዛ ሻሃራደ፥ እቼሻን አቱማ ናኣ ያቆባዉ የላዱ። 18 ልያ፥ “ታን ታ ዳንጋጽራቶ ታ አስናዉ እሜዳ ድራዉ፥ ጾሳይ ሄዋ ከራ ታዉ ጭጌዳ” ያጋዱ። ሄዋ ድራዉ አ ይሳኮራ ጋደ ሱንዱ። 19 ልያ ሀራካ ሻሃራደ፥ ኡሱፑን አቱማ ናኣ ያቆባዉ የላዱ። 20 ልያ፥ “ጾሳይ ታዉ አልኦ እሞታ እሜዳ፤ ታን ታ አስናዉ ኡሱፑን ናና የሌዳ ድራዉ፥ ሀእ እ ታና ቦንቻናዋ” ያጋዱ። ሄዋ ድራዉ አ ዛብሎና ሱንዱ። 21 ሄዋፐ ጉየ እት ማጫ ናቶ የላዱ፤ እዞ ዲኖ ሱንዱ። 22 ጾሳይ ራሄሎ ሀሳዬዳ፤ እዝ ዎሳ ስሲደ እዝ የልያ ኡሉዋ ዶዬዳ። 23 እዛ ሻሃራደ አቱማ ናኣ የላዱ፤ “ጾሳይ ታ ዬላ ቃሬዳ። 24 መና ጎዳይ ታዉ ሀራ አቱማ ናኣካ ጉጄረኔሻ” ያጋዱ። ሄዋ ድራዉ አ ዮሴፎ ሱንዱ። ያቆብ ላባና ድርጉዋን ፓሉመቴዳ 25 ራሄላ ዮሴፋ የሌዳዋፐ ጉየ፥ ያቆብ ላባና፥ “ታን ታ አዉዋ ጋድያ ስማና ማላ፥ ታና ሞይዛ። 26 ታን ኡንቱንቱ ድራዉ ነዉ ኦዳ ታ ማቻቱዋነ ታ ናና ሀማ፤ ታን ባና፤ አያዉ ጎፐ፥ ታን ነዉ አይ ኬሻ ኦሱዋ ኦደንቶ ኔን ኤራሳ” ያጌዳ። 27 ሽን ላባን አ፥ “ታን ነዉ እትባ ኦዳይ፤ መና ጎዳይ ነ ጋሱዋን ታና አንጄዳዋ ታን በኣድ። 28 ነ ድርጉዋ ታዉ ኦዳ፤ ታን ነዉ ጭጋና” ያጌዳ። 29 ያቆብ፥ “ታን ነዉ ዋታ ኦደንቶ፥ ነ መሂካ ዋን የለቴደንቶ ኔን ኤራሳ። 30 ታን ያናፐ ካሰ ነዉ ደእያ ጉይ ሀእ ሎይ ዳሬዳ፤ መና ጎዳይ ኔና ታን አዳ ሳኣን ኡባን አንጄዳ። ሽን ሀእ፥ ታን ታ ሶ አሳዉ ኦናዌ አዉዴ?” ያጌዳ። 31 ላባን፥ “ታን ነዉ አያ እሞ?” ያጊደ አ ኦቼዳ። ያቆብ፥ “ታዉ አይነ እሞፓ፤ ሽን ኔን ታዉ እትባ ኦፐ፥ ታን ነ ዉድያ ቃይካ ሄማናነ ናጋና። 32 ታን ሀቼ ነ ዉድያ ኡባ ግዱዋና አና፤ ሄዋን ነ ዶርሳፐ ፑንጫርያ ዎይ ጋዛ ኡባ፥ ካረ ዶርሳ ማራ ኡባነ ዴሻፐ ጋዛነ ፑንጫርያ ኡባ ታን ሻካና፤ ኡንቱንቱ ታ ድርጉዋ ግዳና። 33 ሄዋ ድራዉ ታ ጽሎተይ ኔን ታዉ ጭጌዳ ድርጉዋ ፓይዳናዉ ስንፐ ይያ ዎደ፥ ታዉ ማርካታና፤ ታ ዴሻፐ ጋዛ ዎይ ፑንጫረ ግደናዌ ዎይ ካረ ግደና አይ ዶርሳ ማራይነ ታ ማታን ቤትንቶ፥ ዉኤቴዳዋዳን ፓይደታና” ያጌዳ። 34 ላብ፥ “ማያድ፤ ኔን ጌዳዋዳን ግዶ” ያጌዳ። 35 ሽን ሄ ጋላሳን ላብ ዳንጫ ዎይ ጋዛ ግዴዳ አቱማ ዴሻ ኡባ፥ ፑንጫረ ዎይ ጋዛ ግዴዳ ማጫ ዴሻ ኡባ፥ ቦ ግዴዳ ኡባነ ካረ ዶርሳ ማራ ኡባ ከሲደ፥ ባረ አቱማ ናና ሄንዳ። 36 ያቲደ ሄ ዉድያና ሄዙ ጋላሳ ኦግያ ያቆባፐ ሃኪደ ቤዳ። ሽን ያቆብ አቴዳ ላባና ዉድያ ሄሜዳ። 37 ያቆብ ዴሻ ሎምያፐ፥ ጉማርያፐነ ጻንቃርሳፐ ቃየ ጋትማ ከሲደ፥ ፖቁዋ ፖቂ ፖቂደ፥ ግዶ ቦ ባጋ ቃሪደ ጋዛዬዳ። 38 ዉዲ ሃ ኡሻናዉ ይያ ሳኣ ኡባን፥ ዎንግርያን፥ ዉድያ ስንን ፖቄዳ ጋትማቱዋ ዎዳ። ካሆዋንቱ ሃ ኡሻናዉ ዪደ፥ 39 ሄ ጋትማቱዋ ስንን ብራሴድኖ፤ ኡንቱንቱ ዳንጫ፥ ፑንጫረነ ጋዛ ማራቱዋ የሌድኖ። 40 ያቆብ ማራቱዋ ዉድያፐ ሻክ ዱማ ዎዳ፤ አቴዳ ዉድያ ዳንጫነ ካረ ግዴዳ ላባና መህያ ስን ዛሬዳ። ያቲደ ባረዉ ዉድያ ዱማዬዳ፤ ላባና መሄቱዋና ኡንቱንታ ጋቤና። 41 ፓጻነ ምኖ ማጫዋንቱ ካህያ ዎደ አዉደነ፥ ኡንቱንቱ ሄ ጋትማቱዋ ማታን ብራሳና ማላ፥ ያቆብ ሄ ጋትማቱዋ ሃ ዎንግርያን፥ ሚዛቱዋ ስንን ዎ። 42 ሽን መሄቱ ላፋ ግዶፐ፥ ኡንቱንቱ ስንን ጋትማቱዋ ዎና። ሄዋ ድራዉ ላፍያ መሄቱ ላባዋ ግድና፥ ዳርያዋንቱ ያቆባዋ ግዴድኖ። 43 ሀዋዳን ሀኒደ፥ ያቆብ ሎይ ዱረቲደ፥ ዳሮ ዉድያ፥ ማጫ ቆማቱዋነ አቱማ ቆማቱዋ፥ ዳሮ ጋሎቱዋነ ሀረቱዋ ሞዴዳ። |
The Word for the World Ethiopia