Doometsaa 20 - ጌሻ ማጻፋ

አብራሃመነ አብመሌካ

¹ አብራሃመ ማምረፐ ደንዲደ፥ ነጌባ ግያ ጋድያ ቤዳ፤ ቃዴሳነ ሹራ ግያ ካታማቱዋፐ ግዱዋን ደኤዳ፤ ጋራራንካ አማሬዳ ዎድያ ታኬዳ።

² ያን አብራሃመ ባረ ማቻቶ ሳሮ፥ “አ ታ ምቻቶ” ያጌዳ። ጋራራ ካቲ አብመሌክ ኪቲደ ሳሮ አፌዳ።

³ ሽን ጾሳይ እት ቃማን አኩሙዋን አብመሌከኮ ዪደ፥ አ ሀዋዳን ያጌዳ፤ “ኔን አሄዳ ማቻት ጋሱዋን ሀይቃሳ፤ አያዉ ጎፐ፥ እዛ አሳ ማቻቶ” ያጌዳ።

⁴ ሽን አብመሌክ ኢኮ ሺቅቤና። ያቴዳዌ፥ “ጎዳዉ፥ ኔን ጽሎ ካዉተ ይሳኒየ?

⁵ እ፥ ‘እዛ ታ ምቻቶ’ ግቤነየ? ቃይ እዛ፥ ‘እ ታ እሻ’ ጋበይኬ? ታን ታ ዎዛና ሱረተንነ ታ ኩሽያ ጌሻተን ሀዋ ኦድ” ያጌዳ።

⁶ ሄዋፐ ጉየ፥ ጾሳይ አኩሙዋን አ ያጌዳ፤ “ኤ፥ ኔን ነ ዎዛና ጌሻተን ኦዳዋ ታን ኤራድ፤ ሄዋ ድራዉ፥ ኔን እዞ ቦቼና ማላነ ታ ስንን ናጋራ ኦና ማላ ኔና ታን ተኣድ።

⁷ ሀእ ሀ ብታንያ ማቻቶ ዛራ፤ አያዉ ጎፐ፥ እ ትምቢትያ ኦድያዋ፤ እ ነዉ ጾሳ ዎሳና፤ ኔን ፓጻ ደአና። ሽን እዞ ዛራና ዮፐ፥ ኔንነ ነዉ ደእያባይ ኡባይ ሀይቂያዋ ቱሙፐ ኤራ” ያጌዳ።

⁸ አብመሌክ ዎንተ ጋላስ ዎንታ ባረ ካዉተ ካፓቱዋ ኡባ ጼሴዳ፤ ሀ የዉዋ ኡባ ኡንቱንቶ ኦድና፥ ኡንቱንቱ ሎይ ዳሮ ያዬድኖ።

⁹ ያትና አብመሌክ አብራሃማ ጼሲደ፥ “ኔን አያ ኑ ቦላ ኦዲ? ኔን ታ ቦላነ ታ ካዉተ ቦላ ዎልቃማ ናጋራ አሀናዉ ታን ነዉ አይ ኢታባ ኦድታ? ኔን ታ ቦላ ኦሰታናዉ በሰናባ ኦዳ” ያጌዳ።

¹⁰ ቃይካ አብመሌክ አብራሃማ፥ “ኔና ሀዋ ኦስሴዳዌ አዬ?” ያጊደ ኦቼዳ።

¹¹ አብራሃመ ያጌዳ፤ “ ‘ጾሳዉ ያይያ እት አሳይነ ሀ ሳኣን ባዋ’ ጋደ ቆፔዳ ድራሳነ፥ ‘ታ ማቻት ጋሱዋን ኡንቱንቱ ታና ዎና’ ጋደ ቆፔዳ ድራሳ።

¹² ሄዋ ቦላ እዛ ቱሙካ ታ ምቻቶ፤ ታ አት ናቶ ግዱኩፐ አትን፥ ታ አቡ ናቶ፤ ቃይ እዛ ታ ማቻቶ ግዳዱ።

¹³ ጾሳይ ታና ታ አዉዋ ጎልያፐ ከሴዳ ዎደ ታን እዝዉ፥ ‘ኑን ቤዳ ጋድያን ኡባን ኔን ታዉ ኦና ኬካተይ ሀዋ፤ “እ ታ እሻ” ጋደ ታባ ሃሳያ’ ያጋድ” ያጌዳ።

¹⁴ ሄዋፐ ጉየ አብመሌክ ዶርሳ፥ መህያ፥ ማጫ አይለቱዋነ አቱማ አይለቱዋ አሂደ፥ አብራሃመዉ እሜዳ፤ ቃይ አ ማቻቶ ሳሮ አዉ ዛሬዳ።

¹⁵ አብመሌክ፥ “ስም ታ ቢታይ ነ ስንና፤ ኔና ሎኦሳን ደአ” ያጌዳ።

¹⁶ ሳሮካ፥ “ታን ነ እሻዉ እት ሻአ ጻጋራ ብራ እማይ፤ ሀዌ ስም ኔናና ደእያ ኡባ ስንን ኔን ጽላቶ ግድያዋነ ኔን ሻትሜዳዋ ኤርስያዋ ግዶ” ያጌዳ።

^17-18 መና ጎዳይ አብራሃመ ማቻት ሳር ጋሱዋን አብመሌካ ጎለ አሳ ኡባ ቃን ማይንስ ዎዳ ድራዉ፥ አብራሃመ ጾሳ ዎስና፥ አብመሌክ፥ አ ማቻታነ አ ማጫ ቆማቱዋ ናኣ የላና ማላ ጾሳይ ኡንቱንታ ፓዳ።