Doometsaa 17 - ጌሻ ማጻፋቃጻራ፥ ጫቁዋ ማላ 1 አብራሞ ላይይ ኡዱፑን ታማነ ኡዱፑና ግድያ ዎደ፥ መና ጎዳይ አዉ ቆንጪደ አ፥ “ታን ኡባ ዳንዳይያ ጾሳ፤ ኔን ታ ስንን ሀመታ፤ ሱረ ግዳ። 2 ታን ታፐነ ኔፐ ግዱዋን ታ ጫቁዋ ዎይ፤ ታን ኔና ሎይ ጮርሳና” ያጌዳ። 3 አብራመ ባረ ዴሙዋን ዱገ ጉፋኔዳ፤ ጾሳይ አዉ ሀዋዳን ያጌዳ፤ 4 “ስም፥ ታን ኔናና ጫቀትያ ጫቁ ሀዋ፤ ኔን ዳሮ ካዉተ አዉዋ ግዳና። 5 ሀዋፐ ዶሚደ ነ ሱንይ አብራማ ጌተተና፤ ሽን ነ ሱንይ አብራሃማ ግዳና። አያዉ ጎፐ፥ ታን ኔና ዳሮ ካዉተ አዉዋ ኦድ። 6 ታን ኔና ሎይ ጮርሳና፤ ታን ኔፐ ካዉተቱዋ መና፤ ካተቱካ ኔፐ ከሳና። 7 ታን ታፐነ ኔፐ፥ ኔፐ ጉየ ነ ዘረፐነ ግዱዋን፥ የለታፐ የለታ ጋካናዉ ታ ጫቁዋ ጫቀታይ፤ ሀ ጫቁ ታን ነዉነ ኔፐ ጉየ ነ ዘረዉ ጾሳ ግዳና ማላ መና ጫቁዋ። 8 ሀእ ኔን በተ ግዳደ ደእያ ካናነ ቢታይ ኡባይ ነዉነ ኔፐ ጉየ ነ ዘረዉ መናዉ ላታ ግዳና ማላ ታን እማና፤ ቃይ ታን ኡንቱንቱ ጾሳ ግዳና” ያጌዳ። 9 ቃይካ ጾሳይ አብራሃማ፥ “ኔና ግዶፐ፥ ኔን ታ ጫቁዋ ናጋ፤ ኔንካ ኔፐ ጉየ ነ ዘረይካ፥ የለታፐ የለታ ጋካናዉ ናግተ። 10 ታፐነ ኔፐነ፥ ኔፐ ጉየ ነ ዘረፐ ግዱዋን ህንተንቱ ናጋና ታ ጫቁ ሀዋ፤ ህንተንቱ ግዱዋን ደእያ አቱማዌ ኡባይ ቃጻረቶ። 11 ህንተንቱ አቱማተ ሾኩዋ ቃጻረቲታ፤ ሄዌ ታፐነ ህንተፐ ግዱዋን ደእያ ጫቆ ማላ ግዳናዋ። 12 ህንተንቱ ግዶን ስንፐ የለታና አቱማ ናናይ ኡባይ የለቴዳ ሆስፑን ጋላሳን ቃጻረታናዉ ኮሼ። ነ ሶን የለቴዳዋንታ ግድና፥ ዎይ አላጋፐ ሻሉዋን ሻመቴዳ አይለቱዋ ግድና፥ ነ ዘረ ግደናዋንታካ አቱማዋንታ ቃጻራናዉ ኮሼ። 13 ነ ሶን የለቴዳዋንቱ ነ ሻሉዋን ሻመቶዋንቱ ቃጻረትኖ። ሀዌ ህንተንቱ አሹዋን ደእያ ታ ጫቁ መና ጫቁዋ ግዳና። 14 ቃጻረትቤና፥ ባረ ሾኩዋና ደእያ አቱማ አሳይ ኡባይ ባረ አሳፐ ዱጻና፤ አያዉ ጎፐ፥ እ ታ ጫቁዋ መንዳ” ያጌዳ። 15 ቃይካ ጾሳይ አብራሃመ፥ “ስም፥ ነ ማቻት ሳር ሱን ሳራይ ጎፓ፤ ሀዋፐ ስንዉ እዝ ሱንይ ሳሮ። 16 ታን እዞ አንጃና፤ ታን ኢፐ ነዉ አቱማ ናኣ ቱሙ እማና። እዞ ታን አንጃና፤ እዛ ካዉተቱዋ አቶ ግዳና፤ አሳ ካተቱ ኢፐ ያና” ያጌዳ። 17 አብራሃመ ባረ ዴሙዋን ጉፋኔዳ፤ እ ሚጪደ ባረ ዎዛናን፥ “ጼቱ ላይ አሳይ ቱሙ ናኣ የላኔ? ቃይ ኡዱፑን ታሙ ላይ ግዴዳ ሳራ ናኣ የላኔ?” ያጊደ ቆፔዳ። 18 አብራሃመ ጾሳ፥ “እስማኤል ታና ላትያዋ ግዳናዉ ዳንዳየኔ?” ያጌዳ። 19 ሽን ጾሳይ፥ “ቱይት፥ ነ ማቻታ ሳራ ነዉ አቱማ ናኣ ቱሙፐ የላና፤ ኔን ይሳቃ ጋደ አ ሱንና። አፐ ጉየ፥ አ ዘረዉ መና ጫቁዋ ግዳና ማላ፥ ታን አናና ታ ጫቁዋ ጫቀታና። 20 ቃይ እስማኤላባ ግዶፐነ፥ ኔን ኦቼዳዋ ታን ስሳድ፤ ታን አካ አንጃና፤ ታን አ አንጃናነ አ ዘረ ሎይ ጮርሳና፤ እ ታማነ ላኡ የለታቱዋ የላና፤ ታን አ ዘረ ዎልቃማ ካዉተ ኦና። 21 ሽን ታን ታ ጫቁዋ ላይ ሀኖደ ሳራ ነዉ የልያ ይሳቃና ጫቀታና” ያጌዳ። 22 ጾሳይ አብራሃማና ሃሳዪደ ዉርሴዳዋፐ ጉየ፥ አብራሃመፐ ሻከቲደ ፑደ ቤዳ። 23 ሄ ጋላሳን አብራሃመ ባረ ናኣ እስማኤላ፥ ባረ ሶን የለቴዳ ኡባ፥ ባረ ሻሉዋን ሻሜዳዋንታ ኡባ፥ ባረ ሶን ደእያ አቱማ አሳ ኡባ፥ ጾሳይ አዉ ኦዴዳዋዳን ኡንቱንቱ አቱማተ ቃጻሬዳ። 24 አብራሃመ ባረ አቱማተ ቃጻረትያ ዎደ፥ ኡዱፑን ታማነ ኡዱፑን ላይ አሳ፤ 25 አ ናአይ እስማኤል ባረ አቱማተ ቃጻረትያ ዎደ፥ ታማነ ሄዙ ላይ ናኣ። 26 አብራሃመነ አ ናአይ እስማኤል ላአቱካ ሄ ጋላስ ቃጻረቴድኖ። 27 አብራሃመ ሶን ደእያ አቱማ አሳይ ኡባይ፥ አ ሶን የለቴዳዋንቱነ ሻሉዋን ሻሜዳዋንቱ ኡባይ አናና ቃጻረቴድኖ። |
The Word for the World Ethiopia