Doometsaa 16 - ጌሻ ማጻፋ

አጋሮነ እስማኤላ

¹ አብራሞ ማቻታ ሳራ አዉ ናኣ የላበይኩ፤ ሽን እዝዉ ግብጼፐ ዬዳ አጋሮ ግያ እት አይላታ ደአዉ።

² ሄዋ ድራዉ ሳራ አብራማ ጼሳደ፥ “በአ፥ መና ጎዳይ ታዉ የሉዋ ድጌዳ። ኔን ባደ፥ ታ አይላትና ግሳ፤ ኦን ኤሪ፥ ታን እዝ ባጋና ናኣ ዳዮ ግዳነንቶነ” ያጋዱ። አብራመ ሳር ቃላ ስሲደ ማዬዳ።

³ አብራመ ካናነ ጋድያን ታሙ ላይ ኡቴዳዋፐ ጉየ፥ አብራሞ ማቻታ ሳራ ግብጼፐ አሄዳ ባረ አይላቶ አጋሮ፥ ባረ አስና አብራማዉ ማቼተዉ እማዱ።

⁴ አጋሮ አኬዳ፤ እዛ ሻሃራዱ። እዛ ባረዉ ሻሃራይ አቴዳዋ ኤሬዳ ዎደ፥ ባረ ጎዳቶ ካያ ዶማዱ።

⁵ ሄ ዎደ ሳራ አብራማ፥ “ታና ሀ ናቁዋ ናቂስያዌ ኔና፤ ታን ታ አይላቶ ነዉ እምና፥ እዛ ሀእ ባረዉ ሻሃራይ አቴዳዋ ኤራደ፥ ታና ካዉ። ነባነ ታባ መና ጎዳይ ፕርዶ” ያጋዱ።

⁶ አብራመ ሳሮ፥ “ሀኖ በአ፤ ነ አይላታ ነ ኩሽያና፤ ኔን እዞ ነዉ ሎኦዋ ኦ” ያጌዳ። ሄዋፐ ጉየ፥ ሳራ አጋሮ ናቂና፥ እዛ ከሳደ ኢፐ ባቃታዱ።

⁷ መና ጎዳ ኪታንቻይ ፑልቱዋ ማታን ዎራን አጋሮ ደሜዳ፤ ሄ ፑልቱ ሹራ ግያ ጋድያ አፍያ ኦግያ ማታና።

⁸ እ አጋሮ፥ “ሀነ ሳር አይላቴ አጋሬ፥ ሀቃፐ ያድ? ቃይ ሀቃ ባይ?” ያጊደ ኦቼዳ። እዛ፥ “ታን ታ ጎዳት ሳርፐ ባቃታይ” ያጋዱ።

⁹ መና ጎዳ ኪታንቻይ እዝዉ፥ “ኔን ነ ጎዳትኮ ጉየ ስማደ ባ፤ እዝዉ ሞደታ” ያጊደ ኦዴዳ።

¹⁰ ቃይካ መና ጎዳ ኪታንቻይ እዞ፥ “ነ ዛሪ ፓይዳናዉ ዳንዳየተናዋ ኬና ታን ጮርሳና” ያጌዳ።

¹¹ ቃይካ መና ጎዳ ኪታንቻይ እዞ፥ “ሀእ ኔን ሻሃራ፤ ኔን አቱማ ናኣ የላና፤ አ እስማኤላ ጋደ ሱንና፤ አያዉ ጎፐ፥ መና ጎዳይ ነ ዋሱዋ ስሴዳ።

¹² እ ዎራን የዳ ደእያ ሀርያ ማላ አሳ ግዳና፤ አሳ ኡባና እ ኤቀታና፤ ቃይ አሳይ ኡባይካ አናና ኤቀታና፤ እ ባረ እሻቱዋ ኡባና እጾ ግዲደ ደአና” ያጌዳ።

¹³ አጋራ፥ “ታን ታና በእያዋ በኣደ ፓጻ አታኔ?” ያጋዱ፤ እዛ ባረዉ ሃሳዬዳ መና ጎዳ፥ “ኔን ታና በእያ ጾሳ” ያጋደ ሱንዱ።

¹⁴ ሄዋ ድራዉ ሄ ፑልቱዋ ኦላይ፥ “ታና በእያ ደኡዋ ጾሳ ፑልቱዋ” ጌተቴዳ፤ ሄ ኦላይ ሀኖ ጋካናዉ ቃዴሰፐነ ባሬዳፐ ግዱዋን ደኤ።

¹⁵ አጋራ አብራማዉ አቱማ ናኣ የላዱ፤ አብራመ አጋራ የሌዳ ናኣ እስማኤላ ጊደ ሱንዳ።

¹⁶ አጋራ እስማኤላ አብራመዉ የሌዳ ዎደ፥ አብራሞ ላይይ ሆስፑን ታማነ ኡሱፑና።