Daaneela 10 - ጌሻ ማጻፋ

ዳኔል ጸግሮሳ ሻፋ ማታን በኤዳ ሳፃ

¹ ፓርሰ ካቲ ቂሮስ ካተቴዳ ሄዘን ላይ፥ ብልጻሶረ ግያ ዳኔላዉ ሀራ ሳጻይ ቆንጬዳ። ሄ ሳጻን ቆንጬዳዌ ቱማ፤ ቆንጬዳዌካ ዎልቃማ ኦላባ። ሄ አኬካይ አዉ እመቴዳዌ ሳጻና።

² ሄ ዎደ ታን፥ ዳኔል፥ ሄዙ ሳምንታ ዬካድ።

³ ሄዙ ሳምንታይ ዉራና ጋካናዉ ሎኦ ቁማ ማበይከ፤ አሹ ዎይ ዎይንያ ኤሳይ ታ ዶናኮ ሺቅቤና። ታ ሁጲያካ አያነ ኦከታበይከ።

⁴ ኮይሮ አግናን ላታማነ ኦይደን ጋላሳን፥ ጸግሮሳ ግያ ዎልቃማ ሻፋ ማታን ታን ኤቃደ ጼላድ፤

⁵ ላይኑዋ ግያ ማዩዋ ማዬዳ እት ብታንያ በኣድ። እ ባረ ጼሳን በርተ ዎርቃፐ ኦሰቴዳ ሳቂያ ዳንጨዳ።

⁶ አ ቦላይ ጶልያ እንቁዋ ማላቴ፤ አ ሶምኢ ዋልቃንዳን ጶልቁ ጌ፤ አ አይፈቱካ ታማ ላጩዋ ማላቲኖ፤ አ ኩሺነ አ ገዲ ቁጨቴዳ ናስያ ብራታዳን ፖእሴ፤ አ ቃላይካ ዳሮ አሳይ ሃሳይያ ቃላዳን ሀኔ።

⁷ ሀ ሳፃ ታን ዳኔል ታረካ በኣድ። ታናና ደእያ አሳቱ በእበይክኖ፤ ኡንቱንቱ ሎይ ዳጋሜዳ ድራዉ፥ ባቃት ቆሰቴድኖ።

⁸ ታን ሀ ዎልቃማ ሳፃ ጼላደ፥ ታረካ አታድ፤ ታዉ ዎልቃይ እጽና ዳቡራድ፤ ታ ሶምኢ ሎይ ቡላቴዳ።

⁹ ሄ ዎደ ታን እ ሃሳይያዋ ስሳድ፤ ቢታን ዱገ ታ ሶምኡዋን ጉፋናድ፤ ገምእሹዋ ታይሮታድ።

¹⁰ ሄዋፐ ጉይያን፥ እት ኩሺ ታና ቦቼዳ፤ ታን ኮኮራደ ደእሺና፥ ታና ታ ኩሽያንነ ታ ጉልባታን ደንደ ኤሴዳ።

¹¹ እ ታና፥ “ላ፥ ጾሳይ ሎይ ሲቄዳ ዳኔላ፥ ታን ነዉ ኦድያ ቃላ ሎይደ አኬካ፤ ደንዳ ኤቃ። አያዉ ጎፐ፥ ታን ኔኮ ኪተታደ ያድ” ያጌዳ። እ ታና ሀዋዳን ያግና፥ ታን ኮኮራደ ደንዳ ኤቃድ።

¹² ቃይካ እ ሀዋዳን ያጌዳ፤ “ዳኔላ፥ አይነ ያዮፓ! አያዉ ጎፐ፥ ኔን አኬካ ደማናዉ ቆፋ ቃቼዳነ ነ ጾሳ ስንን ነ ሁጲያ ካዉሼዳ ኮይሮ ጋላሳፐ ዶሚደ፥ ነ ዎሳይ ስሰቴዳ፤ ታንካ ሄዎ ዛሩዋ አካደ ያድ።

¹³ ሽን ፓርሰ ካዉተ ካፑዋ ግድያ አያናይ ላታማነ እት ጋላሳ ታና ተኤዳ። ታን ታረካ ፓርሰ ካዉተ ካፑዋና ያን አታድ። ሄዋ ድራዉ ኪታንቻቱዋ ካፓቱዋፐ እቱ፥ ምካኤል ታና ማዳናዉ ዬዳ።

¹⁴ ታን ሀእ ኔኮ ዬዳዌ፥ ዉርሰ ጋላሳቱዋን ነ አሳ ቦላ ሀናናዉ ደእያዋ ነዉ ቆንጭሳናሳ፤ አያዉ ጎፐ፥ ሀ ሳጻይ ስንፐ ሀናናዉ ደእያዋ” ያጌዳ።

¹⁵ እ ሄዋ ታዉ ኦድያ ዎደ፥ ታን ታ ሶምኡዋን ጹጉናደ፥ ግያዋ ያድ።

¹⁶ ሄዋፐ ጉይያን፥ አሳ ማላትያ እቱ ታ መተርሻ ቦቼዳ፤ ታ ዶናይ ዶየትና፥ ሃሳያ ዶማድ። ታ ስንን ኤቄዳዋ ሀዋዳን ያጋድ፤ “ታ ጎዳዉ፥ ሀ ሳጻን ታን ሎይ ዳጋሜዳ ድራዉ፥ ዳሮ ዳቡራድ።

¹⁷ ታን ነ ቆማይ ኔናና ታ ጎዳና ሃሳያናዉ ዎታ ዳንዳያይታ? ታ ዎልቃይ ዉሬዳ፤ ሸምፓናዉካ ታዉ እጸቴዳ” ያጋድ።

¹⁸ ሄ አሳ ማላትያ እቱ ላኤንዋካ ታና ቦቺደ፥ ታዉ ዎልቃ እሜዳ።

¹⁹ ያቲደ ታና፥ “ላ፥ ጾሳይ ሎይ ሲቄዳ ብታንያዉ፥ አይነ ያዮፓ! ሳሩ ነዉ ግዶ። ሀእ ስም ምና፤ ኤ ምና” ያጌዳ። እ ሄዋዳን ጊና፥ ታን ምናድ፤ “ታ ጎዳዉ፥ ኔን ታና ምንሶ ድራዉ፥ ሀእ ኦዳ” ያጋድ።

²⁰ እ ዛሪደ፥ “ታን ኔኮ አያዉ ያድታንቶ ኤራይ? ሀእ ታን ስማደ ባደ፥ ፓርሰ ካፑዋ ግድያ አያናና ኦለታና፤ ቃይ ታን ቢና፥ ግሪከ ካፑዋ ግድያ አያናይ ያና።

²¹ ሽን ታን ነዉ ቱሙዋ ማጻፋን ጻፈቴዳዋ ኦዳና። ታን ኡንቱንቱና ኦለትያ ዎደ፥ ህንተ ካፑዋ ምካኤለፐ አትና፥ ታና ማድያ ሀራይ እቱነ ባዋ።