Amoos'a 7 - ጌሻ ማጻፋ

እስራኤልያ ሙሩዋባ አሞጽ በኤዳ እቼሹ ሳጻቱዋ ( 7:1—9:10 ) ቦሊ ያናዋ በስያ ሳፃ

¹ ኡባ ሞድያ መና ጎዳይ ታና ሳፃ በሴዳ። ሄ ሳጻን ታን ካትያ ጋክያ ካይ ጫከቴዳዋፐ ጉይያን፥ ላኤንዋ ጫሬዳ ጫርሻ ቦላ እ ቦልያ ዉድያ መሽን በኣድ።

² ኡንቱንቱ እርጻባ ኡባ ሚደ ዉርሴዳ ዎደ ታን፥ “አቤት ኡባ ሞድያ መና ጎዳዉ፥ ሀያና አቶ ጋርኪ! ያቆባ ዛራቱ ዋኒደ አታናዉ ዳንዳዪኖ? ኡንቱንቱ ቄር ጉቱዋቴ!” ያጋድ።

³ ሄዋ ድራዉ፥ መና ጎዳይ ቃረቴዳ፥ ባረ ቆፋ ላሜዳ፤ ላሚደ ሀዋዳን ያጌዳ፤ “ሀ ኔን በኤዳባይ ፖለተናዋ” ያጌዳ መና ጎዳይ።

ታማን ፕርዳናዋ በስያ ሳፃ

⁴ ኡባ ሞድያ መና ጎዳይ ታና ሀራ ሳፃ በሴዳ። ኡባ ሞድያ መና ጎዳይ ባረ አሳ ፕርዳናዉ ታማ ጼሴዳ፤ ሄ ታማይ ዎልቃማ ጪማ አባ ም ድጊደ፥ ቢታካ ጹጋናዉ ዶሜዳ።

⁵ ያትና ታን ሀዋዳን ያጋድ፤ “አቤት ኡባ ሞድያ መና ጎዳዉ፥ ሀያና ሀ ታማ ቶይሳርኪ! ያቆባ ዛራቱ ዋኒደ አታናዉ ዳንዳዪኖ? ኡንቱንቱ ቄር ጉቱዋቴ!” ያጋድ።

⁶ ሄዋ ድራዉ፥ መና ጎዳይ ቃረቴዳ፥ ባረ ቆፋ ላሜዳ፤ ላሚደ ኡባ ሞድያ መና ጎዳይ ሀዋዳን ያጌዳ፤ “ሀዌካ ቃይ ፖለተናዋ” ያጌዳ።

ግምቢያ ስታተ ልክያ ቱምቢያ በስያ ሳፃ

⁷ ቃይካ እ ታና ሀራ ሳፃ በሴዳ። ታን ሄ ሳጻን በእያ ዎደ፥ ጎዳይ ግምቢያ ስታተ ልክያ ቱምቢያ ኦይቂደ፥ ቱምቢያን ልከቲደ ግምበቴዳ ግምቢያ ማታን ኤቄዳ።

⁸ መና ጎዳይ ታና፥ “አሞጻ፥ ሀ ኔን ጼልያዌ አዬ?” ያጊደ ኦቼዳ። ታን፥ “ቱምቢያ” ያጋድ። መና ጎዳይ ታና፥ “በአ፥ ታን ታ አሳ እስራኤልያ ግዶን ቱምቢያ የጋይ፤ ታን ኡንቱንታ ሙረናን አከ።

⁹ ይሳቃ ዛራቱ ጎይንያ ቃ ሳአቱ ኮለታና፤ እስራኤልያ ጌሻ ሳአቱካ ያና፤ ቃይ እዮርባማ ካዉተ ቦላካ ታን ማሻና ደንዳና” ያጌዳ።

አሞጻነ አሜስያሳ

¹⁰ ቤቴለ ካታማን ቄስያ ግዲደ ደእያ አሜስያሴ እስራኤልያ ካትያ እዮርባመኮ ሀዋዳን ያጊደ ኪቴዳ፤ “አሞጽ እስራኤልያ አሳ ግዶን ደኢደ፥ ነ ቦላ ማቀቴዳ፤ እ ባረ ኦዱዋን ጋድያ ባይዜ።

¹¹ አያዉ ጎፐ፥ እ ሀዋዳን ያጌ፤ ‘እዮርባም ማሻን ሀይቃና፤ እስራኤልያ አሳይካ ባረንቱ ጋድያፐ ኦሞደቲደ ባና’ ያጌ” ያጌዳ።

¹² ያትና አሜስያሴ አሞጻ ሀዋዳን ያጌዳ፤ “ኔኖ ትምቢትያ ኦድያዎ፥ ባ፤ ህን ይሁዳ ቢታ ባቃታ ባደ፥ ያን ቁማ ማ፤ ትምቢትያ ያን ኦዳ።

¹³ ሽን ሀዌ ቤቴለ ካቲ ጎይንያ ሳኣነ ካዉተ ጌሻ ሳ ግድያ ድራዉ፥ ላኤን ሀ ሳኣን ትምቢትያ ኦዶፓ” ያጌዳ።

¹⁴ አሞጽ ዛሪደ፥ አማስያስ ሀዋዳን ያጌዳ፤ “ታን መህያ ሄምያዋነ ኡንቱንቱ አይፍያ ማጽያዋፐ አትና፥ ትምቢትያ ኦድያዋ ዎይ ትምቢትያ ኦድያዋ ናኣ ግድከ።

¹⁵ ሽን መና ጎዳይ ታና ዶርሳ ዉድያ ሄምያ ሳፐ አኪደ፥ ‘ባደ ታ አሳዉ እስራኤልያዉ ትምቢትያ ኦዳ’ ያጌዳ።

¹⁶ ሀእ ስም መና ጎዳይ ግያዋ ስሳ! ኔን፥ ‘እስራኤልያ ቦላ ትምቢትያ ኦዶፓ፤ ይሳቃ ዛራቱዋ ቦላካ ማርካቶፓ’ ያጋዳ።

¹⁷ ሄዋ ድራዉ፥ መና ጎዳይ ሀዋዳን ያጌ፤ ‘ነ ማቻታ ካታማ ግዶን ሻርሙጻ ግዳናዋ፤ ነ አቱማ ናናቱነ ነ ማጫ ናናይ ማሻን ሀይቃና፤ ነ ቢታይካ ዎዶሩዋን ሻከታና፤ ቃይ ኔን ነ ሁጲያዉካ አላጋ ጋድያን ሀይቃና። እስራኤልያ አሳይካ ባረንቱ ጋድያፐ ኦሞደቲደ ቱማ ባና’ ያጌ” ያጌዳ።