Amoos'a 4 - ጌሻ ማጻፋ

¹ ህንተኖ፥ ሳማርያ ማጫዋንቶ፥ ባሳነ ጋድያ ማጫ ሚዛቱዋዳን ሞዳዋንቶ፥ ሀዋ ስስተ! ህንተ ህዬሳቱዋ ኡቁኒታ፤ ማንቆቱዋካ ቱጋዪታ። ህንተ አስናቱዋካ፥ “ኑዉ ኡሻ ሀምተ” ያጊታ።

² ኡባ ሞድያ መና ጎዳይ ሀዋዳን ያጊደ፥ ባረ ጌሻተን ጫቃ፤ “ህንተ ማጋን ኦይቂደ ጎሸታና ጋላሳይነ ህንተፐ አቴዳ አማሬዳዋንቱካ ማጋን ኦይቂደ ብያ ሞለቱዋዳን ሀናና ጋላሳይ ያና።

³ ህንተ ኡባይካ ድርሳ ጾእያና ጎችና ከሲደ፥ ሄርሞነን ኦለታና” ያጊደ ጫቄዳ መና ጎዳይ።

እስራኤልያ አሳይ ባረ ባላፐ ታማራናዉ ዳንዳይበይክኖ

^4-5 ኡባ ሞድያ መና ጎዳይ ሀዋዳን ያጌ፤ “ህንተኖ፥ እስራኤልያ አሳቶ፥ ቢተ፤ ቤቴለ ቢደ፥ ናጋራ ኦተ፤ ጋልጋላካ ቢደ፥ ናጋራ ጉጂደ ኦተ። ዎንታ ዎንታ ህንተ ያርሹዋ ያርሽተ፤ ሄዘን ጋላስ ጋላስ ህንተ አስራታ አህተ። እርሹዋ የጊደ ኡኬዳ ኡክ ጹጊደ፥ ጋላታ ያርሹዋ ያርሽተ። ህንተ ህንተ ዶሱዋን እምያዋ ድራዉ፥ ኦቶረቲደ አዋይተ። አያዉ ጎፐ፥ ህንተ ኦናዉ ዶስያዌ ሄዋ” ያጌ።

⁶ ቃይካ መና ጎዳይ ሀዋዳን ያጌ፤ “ህንተ ካታማ ኡባን ታን ኮሻ የዳደ፥ ሀራይ አቶ ህንተ ማታን ዳጽያባካ ይሳድ፤ ሽን ህንተ ሄዋንካ ታኮ ስምበይክታ።

⁷ ካ ጫክያ ዎዲ ጋካናዉ ብሮ ሄዙ አግናይ ደእሽን፥ ታን ህንተንቶ እራ ተኣድ። ታን እት ካታማን እራ ቡክሳደ ሀራ ካታማን ቡከናዳን ድጋድ፤ እት ሾይቃን ቡኬዳ፤ ሀራ ቡክቤና ሾይቃይ ቃይ መሌዳ።

⁸ ሄዋ ድራዉ፥ ላኡ ዎይ ሄዙ ካታማቱዋ አሳይ ሃ ኡሻናዉ እት ካታማ ቤድኖ፤ ሽን አልበይክኖ። ሄዋንካ ቃይ ህንተ ታኮ ስምበይክታ” ያጌ መና ጎዳይ።

⁹ መና ጎዳይ፥ “ታን ህንተ ካ ቦላን ሀርግያ የዳድ፤ ህንተ አታክልትያነ ህንተ ዎይንያ ቱራ፥ ህንተ ባላስያ ምነ ህንተ ዎጋራ ኡባ ቦሊ ሜዳ፤ ሽን ህንተ ሄዋንካ ታኮ ስምበይክታ” ያጌ።

¹⁰ መና ጎዳይ፥ “ታን ግብጼ አሳቱዋ ቦላ ኢታ ሀርግያ የዴዳዋዳን፥ ህንተ ቦላንካ ቦሻ የዳድ፤ ህንተ ዎዳላ ናናቱዋ ማሻን ዎድ፤ ህንተ ፓራቱካ ኦሞደታናዳን ኡዳድ። ህንተ ሞን ሀይቄዳ አሳ አሃ ጽንቁዋን ህንተና ኡላድ፤ ሽን ህንተ ሄዋንካ ታኮ ስምበይክታ” ያጌ።

¹¹ መና ጎዳይ፥ “ሶዶማነ ጋሞራ ካታማቱዋ ይሴዳዋዳን፥ ህንተፐካ ዳሮቱዋ ይሳድ፤ ሀ አቴዳ ህንተካ ታማፐ ኤጺደ አቴዳ ጺፋ ማላ፤ ሽን ህንተ ሄዋንካ ታኮ ስምበይክታ” ያጌ።

¹² ጾሳይ፥ “ሄዋ ድራዉ፥ እስራኤልያ አሳቶ፥ ታን ህንተና ሄዋዳን ኦደ ሙራና ሀናይ። ታን ህንተና ሀዋዳን ኦደ ሙራና ሀንያ ድራዉ፥ እስራኤልያ አሳዉ፥ ህንተ ጾሳና ጋከታናዉ ጊግተ” ያጌ።

¹³ ደረቱዋ ጊግሴዳዌ፥ ጫርኩዋካ መዳዌ፥ ባረ ዎዛና ቆፋ አሳዉ ቆንጭስያዌ፥ ዎንታ ፖኡዋ ማዉ ላምያዌ፥ ጋድያን ደእያ ቃ ደረቱዋ የያዌ፥ አዉ ሱንይ መና ጎዳ፥ ኡባፐ ዎልቃማ ጾሳ።