2 ካታቱዋ 24 - ጌሻ ማጻፋ

¹ እዮኣቄማ ዎደ ባብሎነ ቢታ ካትያ ናቡካዳናጾረ ይሁዳ ቦላ ዎራጄዳ። ያትና እዮኣቄም አዉ ሄዙ ላይ ሞደቴዳ። ሄዋፐ ጉይያን ዛሪደ፥ ናቡካዳናጾራ ቦላ ማካሌዳ።

² መና ጎዳይ ባብሎነ ቢታ ጩጉዋ፥ ሶርያ ቢታ ጩጉዋ፥ ሞኣበ ቢታ ጩጉዋነ አሞና ቢታ ጩጉዋ እዮኣቄማ ቦላ የዴዳ፤ ትምቢትያ ኦድያ ባረ ቆማቱዋ ባጋና መና ጎዳይ ካሰ ሃሳዬዳዋዳን፥ ይሁዳ ቢታ ባይዛናዳን ሀዋንታ የዴዳ።

^3-4 ካቲ ምናሰ ኦዳ ናጋራ ኡባ ድራዉ፥ ቃይ ጽሎ አሳ ሱ እ ጉሲደ፥ የሩሳላመን ኩንዳ ድራዉ፥ መና ጎዳይ ይሁዳ አሳ ባረ ስንፐ ድጋናዉ ሀ ባሻ የዴዳ፤ መና ጎዳይ ምናሰዉ ሄ ናጋራ አቶ ጋናዉ ኮይቤና።

⁵ እዮኣቄም ሀኔዳ ሀራባይነ እ ኦዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ።

⁶ እዮኣቄም ሀይቂደ፥ ባረ ማይዛን ጋከቴዳ። አ ኮታን አ ናአይ እኮንያነ ካተቴዳ።

⁷ ግብጼ ቢታ ካቲ ላኤን ባረ ጋድያፐ ደንዲደ፥ ኦላዉ ይቤና፤ አያዉ ጎፐ፥ ግብጼ ሻፋፐ ዶሚደ፥ ቢደ ኤፍራጺሳ ሻፋ ጋካናዉ፥ ግብጼ ካቲ ሞዴዳ ቢታ ኡባ ባብሎነ ካቲ አክ ድጌዳ።

ይሁዳ ካትያ ዮኣኪና

⁸ ዮኣኪነ ካተትያ ዎደ ላይይ አዉ ታማነ ሆስፑና፤ ዮኣኪነ የሩሳላመን ሄዙ አግና ካተቴዳ። አ ዳይ ሱንይ ነሁሽታ፤ እዛ የሩሳላምያ ኤልናታና ናቶ።

⁹ ዮኣኪነ ባረ አዉ ኦዳዋዳን፥ መና ጎዳ ስንን ኢታባ ኦዳ።

¹⁰ ሄ ዎደ ባብሎነ ካትያ ናቡካዳናጾራ ኦላንቻቱ የሩሳላመ ዪደ፥ ካታማ ዶድ ዎድኖ።

¹¹ ባብሎነ ካቲ ናቡካዳናጾረ ሄ ካታማ ዬዳ።

¹² ይሁዳ ካቲ ዮኣኪነ፥ አ ዳያ፥ አ ቆማቱ፥ አ ካፓቱነ ካትያ ጎልያ ኦሳንቻቱ ኡባቱ ባብሎነ ካትያዉ ኩሽያ እሜድኖ። ዮኣኪነ ካተቴዳ ሆስፑን ላይን፥ ባብሎነ ካቲ ዮኣኪና ቃቼዳ።

¹³ መና ጎዳ ጌሻ ጎልያንነ ካትያ ጎለን ደእያ ማጹዋ ኡባ ሄ ሳፐ ደንደ አፌዳ። መና ጎዳይ ካሰ ሃሳዬዳዋዳን ካቲ ሶሎሞነ መና ጎዳ ጌሻ ጎልያን ጊግሴዳ ዎርቃ ሚሻቱዋ ኡባ ባብሎነ ካቲ ቃንጸሬዳ።

¹⁴ ናቡካዳናጾረ የሩሳላመ አሳ፥ ካፓቱዋ ኡባ፥ ኦላንቻቱዋ ኡባ፥ ኩሽያ ሂላንቻቱዋ ኡባነ ብራታ ቆጽያዋንታ ኡባ፥ ሙለ ታሙ ሻአ አሳ፥ የሩሳላመፐ ኦሞዲደ አፌዳ፤ ቢታን ህዬሳ አሳ ጻላላይ አቴዳ።

¹⁵ ናቡካዳናጾረ ዮኣኪና ኦሞዲደ፥ ባብሎነ አፌዳ፤ አናና ካታቶ አ ዳዮ፥ አ ማቻቱዋ፥ አ ኦሳንቻቱዋነ ቢታን ደእያ ዎልቃማ አሳ ኡባ አኪደ ቤዳ።

¹⁶ ሄ አሳፐ ላፑን ሻአቱ ኦላንቻቱዋ፤ እት ሻአ አሳቱ ዱማ ዱማ ኩሽያ ሂላንቻቱዋ፤ ኡንቱንቱ ኡባይካ ምናነ ኦላ ኦለታናዉ ዳንዳይያዋንታ። እ ሄ ኡባቱዋ ባብሎና አፌዳ።

¹⁷ ሄዋፐ ጉይያን፥ ባብሎነ ካቲ ዮኣኪና ኮታን አ አዉዋ እሻ ማታንያ ካተዬዳ። አ ሱን ሰደቅያሳ ያጊደ ላሜዳ።

ይሁዳ ካትያ ሰደቅያሳ

¹⁸ ሰደቂያስ ካተትያ ዎደ፥ ላይይ አዉ ላታማነ እታ፤ የሩሳላመን እ ታማነ እት ላይ ካተቴዳ። አ ዳይ ሱንይ ሀሙጻሎ፤ እዛ ሊብና ካታማን ደእያ ኤርማሳ ናቶ።

¹⁹ እዮኣቄም ኦዳዋዳን፥ ሰደቅያስካ መና ጎዳ ስንን ኢታባ ኦዳ።

²⁰ መና ጎዳይ ሀንቀቴዳ ድራዉ፥ የሩሳላመ አሳ ቦላነ ይሁዳ አሳ ቦላ ሀዌ ሀኔዳ፤ ዉርሰን ኡንቱንታ እ ባረ ስንፐ ድጌዳ። ሰደቅያስ ባብሎነ ካትያ ቦላ ማካሌዳ።