2 ካታቱዋ 20 - ጌሻ ማጻፋ

ካቲ ህዝቂያሰ ሀርጊደ ፓጼዳ

¹ ሄ ዎደ ካቲ ህዝቂያሰ ሀርጊደ፥ ሀያና ማቴዳ። ያን ደእሽን አሞጻ ናአይ ትምቢትያ ኦድያ እሳያሰ አኮ ቢደ፥ “መና ጎዳይ ኔና፥ ‘ኔን ሀይቃሳፐ አትና ፓጻካ፤ ሄዋ ድራዉ፥ ነ ጎልያ ጊግሳ’ ያጌ” ያጌዳ።

² ህዝቂያሰ ጎዳኮ ስም ግሲደ፥ መና ጎዳ ዎሲደ፥

³ “አቤት መና ጎዳዉ፥ ታን ነ ስንን ቱማተንነ ኩመን ዎዛናን ሀመቴዳዋነ ቃይ ኔና ናሸችያዋ ኦዳዋ ታዉ ኔን ሀሳያና ማላ፥ ታን ኔና ዎሳይ” ያጊደ ዎሴዳ። ህዝቂያሰ ሎይ ሴለቲደ ዬኬዳ።

⁴ እሳያሰ ካትያ ስንፐ ከሴዳ፤ ካትያ ጎልያ ዳባባፐ አደ ብ ክቼናን ደእሽን፥ መና ጎዳ ቃላይ ሀዋዳን ያጊደ፥ አኮ ዬዳ፥

⁵ “ጉየ ስማደ ባደ ታ አሳ ካለያ ህዝቂያሳዉ ሀዋዳን ያጋደ ኦዳ፤ ‘መና ጎዳይ፥ ነ ማይዛ አዉዋ ዳዊታ ጾሳይ ሀዋዳን ያጌ፡ “ታን ነ ዎሳ ስሳድ፤ ነ አፎካ በኣድ። ታን ኔና ፓና፤ ሄዙ ጋላሳፐ ጉይያን፥ ኔን ፑደ መና ጎዳ ጌሻ ጎልያ ባና።

⁶ ነ ላይ ቦላ ታን ነዉ ታማነ እቼሹ ላይ ጉጃና። ታን ኔናነ ሀ ካታማነ አሶረ ቢታ ካትያ ኩሽያፐ አሻና። ታን ታ ቦንቹዋ ድራዉነ ታ ቆማ ዳዊታ ድራዉ፥ ሀ ካታማዉ ኦለታደ አሻና” ያጌ’ ያጋ” ያጌዳ።

⁷ ሄዋፐ ጉይያን እሳያሰ፥ “ባላስያ ቴራ ዳጺደ፥ አ ጋፉዋ ቦላ ዎተ። ያቶፐ እ ፓጻናዋ” ያጌዳ።

⁸ ህዝቂያሰ ኢስያሳ፥ “መና ጎዳይ ታና ፓናዎነ ታን ሄዘን ጋላስ መና ጎዳ ጌሻ ጎልያ ፑደ ባናዎ ማላታይ አዬ?” ያጊደ ኦቼዳ።

⁹ እሳያሰ፥ “መና ጎዳይ ባረ ጌዳ ቃላ ፖላናዉ ነዉ መና ጎዳይ ማላታ እማና። ስም ኔን ሀዋፐ ሀቃዋ ዶራይ? ሀዌ ኩዋይ ታሙ ታንጉዋ ስንዉ ባናዋ ዶራይየ፥ ታሙ ታንጉዋ ሀዋፐ ጉየ ስማናዋ ዶራይ?” ያጊደ ኦቼዳ።

¹⁰ ያትና ህዝቂያሰ አ፥ “ኩዋይ ስንዉ ባናዌ መተና፤ ሄዋፐ ኩዋይ ጉየ ስማናዳን ኪተታ” ያጌዳ።

¹¹ ሄዋፐ ጉይያን፥ ትምቢትያ ኦድያ እሳያሰ መና ጎዳ ዎሴዳ፤ መና ጎዳይ ካቲ አካዝ ግምቢሲደ ደቱዋ ኩዋዬዳ ኩዋ ታሙ ደቱዋ ሄ ሳፐ ጉየ ዛሬዳ።

ባብሎነፐ ኪተቲደ ዬዳ አሳቱዋ

¹² ሄ ዎደ ባላዳና ናአይ፥ ባብሎነ ካቲ፥ ማሮዳክ ባላዳን ህዝቂያሰ ሀርጌዳዋ ስሴዳ ድራዉ፥ ዳብዳቢያነ እሞታ ህዝቂያሳዉ የዴዳ።

¹³ ህዝቂያሰ ኪተቲደ ዬዳ አሳቱዋ ሞኬዳ። ያቲደ ባረ ሚሻ ምንጅያ ጎለን ደእያ ብራ፥ ዎርቃ፥ ሳዉዋ፥ አልኦ ዛይትያ፥ ባረ ኦላ ሚሻነ ባረ ሚሻ ምንጅያ ጎለን ደእያዋ ኡባ ኡንቱንታ በሴዳ። ባረ ሶን ዎይ ባረ ካዉተ ግዶን ደእያዋ ኡባፐ ህዝቂያሰ ኡንቱንታ በሰናን አጌዳባይ አያይነ ባዋ።

¹⁴ ሄዋፐ ጉይያን፥ ትምቢትያ ኦድያ እሳያሰ ካትያ ህዝቂያሳኮ ዪደ፥ “ሀ አሳቱ ዋጌድኖ? ኡንቱንቱ ሀቃፐ ዬድኖ?” ያጊደ ኦቼዳ። ህዝቂያሰ፥ “ኡንቱንቱ ታኮ ሃኮ ጋድያፐ፥ ባብሎነፐ ዬድኖ” ያጌዳ።

¹⁵ እሳያሰ ቃይካ፥ “ኡንቱንቱ ነ ሶን አያ አያ በኤድኖ?” ያጌዳ። ህዝቂያሰ፥ “ኡንቱንቱ ታ ሶን ደእያ ኡባባ በኤድኖ፤ ታ ሚሻ ምንጅያ ጎለን ደእያባፐ ታን ኡንቱንታ በሳቤናባይ አያይነ ባዋ” ያጌዳ።

¹⁶ ሄዋፐ ጉይያን፥ እሳያሰ ህዝቂያሳ፥ “መና ጎዳይ ግያዋ ስሳ።

¹⁷ መና ጎዳይ ሀዋዳን ያጌ፡ ‘ነ ካትያ ጎለን ደእያባይ ኡባባይነ ነ ማይዛ አዎቱ ሀቼ ጋካናዉ ሺሼዳባይ ኡባባይ ሙለ ኦሞደቲደ፥ ባብሎነ ጋድያ ባና ጋላሳቱ ያና፤ አፐ አያይነ አተና።

¹⁸ ቃይ ነዉ የለታናዋ፥ ነ አሾነ ሱነ ግድያ ነ አቱማ ዛራቱዋፐካ ኦሞደቲደ ባና፤ ባብሎነ ካትያ ጎለን ጎይረቲደ ኦና’ ያጌ” ያጌዳ።

¹⁹ ህዝቂያሰ ዛሪደ፥ “ኔን ኦዴዳ መና ጎዳ ቃላይ ሎአ” ያጌዳ። አያዉ ጎፐ፥ ህዝቂያሰ፥ “ታን ደኤዳ ላይን ሳሩነ ዎፓይ ደአናዋ ግደኔ” ያጊደ ቆፔዳ።

ህዝቂያሳ ሀይቁዋ

²⁰ ህዝቂያሰ ሀኔዳ ሀራባይ፥ አ ምኖተይነ ሃ ዜሪደ፥ ቢታ ግዱዋና ዋሩዋን ካታማ እ ገልሴዳባይ ይሁዳ ካተቱዋ ታርክያ ማጻፋን ጻፈት ኡቴዳ።

²¹ ህዝቂያሰ ሀይቂደ፥ ባረ ማይዛን ጋከቴዳ፤ አ ኮሽያን አ ናአይ ምናሰ ካተቴዳ።