2 ካታቱዋ 14 - ጌሻ ማጻፋ

ይሁዳ ካትያ አመስያሳ

¹ እዮአካዛ ናአይ፥ እስራኤልያ ካቲ እዮኣስ ካተቴዳ ላኤን ላይን፥ ይሁዳ ካትያ ዮኣሻ ናአይ አመስያስ ካተቴዳ።

² እ ካተትያ ዎደ ላይይ አዉ ላታማነ እቼሻ፤ እ የሩሳላመን ላታማነ ኡዱፑን ላይ ካተቴዳ። አ አት ሱንይ ይሆኣድኖ፤ እዛ የሩሳላመ አሳ።

³ አመስያስ መና ጎዳይ ስንን ሱረባ ኦዳ፤ ሽን አ ማይዛ አዉ ዳዊተ ኦዳዋዳን ኦቤና። ኡባባካ እ ባረ አዉዋ እዮኣሳ ቁሌዳ።

⁴ አሳይ ጎይንያ ቃ ሳኣ ይስቤና፤ አሳይካ ሄ ግሹዋን ያርሹዋ ያርሽያዋነ እጻና ጩዋይያዋ አግቤና።

⁵ አመስያስ ካዉተ ባረ ኩሽያን ሎይ ኦይቄዳ ሳናካ፥ ካሰ ካትያ ባረ አዉዋ ዮኣሻ ዎዳ ኦሳንቻቱዋ ዎዳ።

⁶ ሙሴ ህግያ ማጻፋን ጻፈቴዳዋዳን፥ መና ጎዳይ፥ “ናናቱ ኦዳ ናጋራ ድራዉ፥ አዎቱዋ ዎናዉ በሰና፤ ቃይ አዎቱ ኦዳ ናጋራ ድራዉካ፥ ናና ዎናዉ በሰና። አሳይ ኡባይ ባረ ኦዳ ናጋራን ናጋራን ሀይቃናዉ በሰ ያጊደ አዛዜዳዋዳንካ፥ ዎዳዋንቱ ናና ዎቤና።”

⁷ አመስያስ ማጽነ ዛንጋራ ግያ ሳኣን ታሙ ሻአ ኤዶማ ቢታ አሳ ዎደ ሰላአ ግያ ካታማካ ኦላን ኦይቄዳ። ዮቅትኤላ ያጊደ ሱንዳ፤ ሀቼ ጋካናዉ ሀ ሱንን ጼሰቴ።

⁸ ሄዋፐ ጉይያን፥ አመስያስ ኢዩ ናኣ ናኣ፥ እዮአካዛ ናኣ፥ እስራኤልያ ካትያ እዮኣሳዉ አሳ ኪቲደ፥ “ሃያ፤ አነ ላኡ ኦላ ጋከቴቶ” ያጊደ ናሴዳ።

⁹ ሽን እስራኤልያ ካቲ ዮኣሽ ይሁዳ ካትያ አመስያሳ ሀዋዳን ያጌዳ፤ “ሊባኖሳን ደእያ ክንድቹ ሊባኖሳን ደእያ ዝጋዉ ኪቲደ፥ ‘ነ ናቶ ታ ናአዉ እማ’ ያጌዳ። ሽን ሊባኖሳን ደእያ እት ዶአይ ሄዋና አደ፥ ሄ ካሽያ የዳ።

¹⁰ ኤ፥ ኔን ቱሙካ ኤዶማ ቢታ አሳ ጾናዳ፤ ሄዋን ሀእ ኦቶረታሳ። ኔን ነ ጾኑዋን ናሸታደ፥ ነ ሶን ዎፑ ጋደ ኡታ አጋ። ነ ቦላነ ነ ቢታ ይሁዳ ቦላ መቱዋነ ባሻነ አህያዋ አያዉ ደንይ?” ያጊደ ዛሬዳ።

¹¹ ሽን አመስያስ ስሳ እጼዳ። ሄዋ ድራዉ፥ እስራኤልያ ካቲ ዮኣሽ ኦላናዉ ከስና፥ እነ ይሁዳ ካቲ አመስያስነ ይሁዳን ደእያ ቤት-ሸመሻ ግያ ካታማን ኦላ ጋከቴድኖ።

¹² እስራኤልያ አሳይ ይሁዳ አሳ ጾኔዳ፤ ይሁዳ አሳይ ኡባይ ባቃቲደ፥ ባረ ሶ ባረ ሶ ቤዳ።

¹³ እስራኤልያ ካቲ እዮኣስ አካዝያሳ ናኣ ናኣ፥ እዮኣሳ ናኣ፥ ይሁዳ ካትያ አመስያሳ ቤት-ሸመሻ ካታማን ኦሞዴዳ። ሄዋፐ ጉይያን፥ ዮኣሽ የሩሳላመ ቢደ፥ የሩሳላመ ድርሳ ግምቢያ፥ ኤፍሬማ ፐንግያፐ ቢደ፥ ዞዝያ ፐንግያ ጋካናዉ ደእያ ኦይዱ ጼቱ ዋ ግዴዳ፥ ሳኣ ላሌዳ።

¹⁴ መና ጎዳ ጌሻ ጎልያንነ ካትያ ጎልያ ሚሻ ምንጅያሳን ደእያ ዎርቃ፥ ብራነ ሻሉዋ ኡባ አኬዳ፤ ቃይ ዋብያዉ ኦይቀቴዳ አሳቱዋካ አኪደ፥ ሳማርያ ስሜዳ።

¹⁵ እዮኣስ ሀኔዳ ሀራባይ፥ እ ኦዳባይ፥ አ ምኖተይነ ይሁዳ ካትያ አመስያሳና እ ኦለቴዳባይ እስራኤልያ ካተቱዋ ታርክያ ማጻፋን ጻፈት ኡቴዳ።

¹⁶ እዮኣስ ሀይቂደ፥ ባረ ማይዛን ጋከቴዳ፤ እ ሳማርያ ካታማን እስራኤልያ ካተቱዋና ሞገቴዳ። አ ሳኣን አ ናአይ እዮርባም ካተቴዳ።

ይሁዳ ካትያ አመስያሳ ሀይቁዋ

¹⁷ እዮአካዛ ናአይ፥ እስራኤልያ ካቲ እዮኣስ ሀይቄዳዋፐ ጉይያን፥ እዮኣሳ ናአይ፥ ይሁዳ ካቲ አመስያስ ታማነ እቼሹ ላይ ደኤዳ።

¹⁸ አመስያስ ሀኔዳ ሀራባይ ይሁዳ ካተቱዋ ታርክያ ማጻፋን ጻፈት ኡቴዳ።

¹⁹ አመስያሳ ዎናዉ አሳይ የሩሳላመን ማቀቴዳ፤ ያትና እ ላክሻ ግያ ካታማ ባቃቴዳ። ሽን ኡንቱንቱ አ ጌዱዋ ላክሻ ካታማ አሳ ኪትና፥ አ ያን ዎድኖ።

²⁰ አ አሃ ፓራን ጫን አሂደ፥ ዳዊታ ካታማን የሩሳላመን አ ማይዛ አዎቱዋና ሞጌድኖ።

²¹ ሄዋፐ ጉይያን፥ ይሁዳ አሳይ ኡባይ ታማነ ኡሱፑን ላይ ናኣ ኦዝያና አ አዉዋ አመስያሳ ሳኣን ካተዬዳ።

²² አ አዉ አመስያስ ሀይቄዳዋፐ ጉይያን፥ እ ኦዝያነ ኤላታ ግያ ካታማ ዛረ ኬጺደ፥ ይሁዳን ኦራዳ።

እስራኤልያ ካትያ ላኤን እዮርባማ

²³ ዮኣሻ ናአይ፥ ይሁዳ ካቲ አመስያስ ካተቴዳ ታማነ እቼሻን ላይን፥ እስራኤልያ ካትያ ዮኣሻ ናአይ እዮርባም ሳማርያን ካተቴዳ፤ እ ኦይታማነ እት ላይ ካተቴዳ።

²⁴ እዮርባም መና ጎዳ ስንን ኢታባ ኦዳ፤ ናባጻ ናአይ እዮርባም እስራኤልያ አሳ ኦስሴዳ ናጋራ ኡባ ኦያዋ አግቤና።

²⁵ ጋተ-ሄፌርያ አሚታያ ናኣ ትምቢትያ ኦድያ ባረ ቆማ ዮናሳ ባጋና መና ጎዳይ እስራኤልያ ጾሳይ ባረ ቃላን ሃሳዬዳዋዳን፥ ሀማታ ፕኑዋ ግያ ሳፐ ዶሚደ፥ ማጽንያ አባ ጋካናዉ ደእያ እስራኤልያ ዛዋ ዮኣሻ ናአይ እዮርባም ጾኒደ ዛሬዳ።

²⁶ አያዉ ጎፐ፥ እስራኤላን ደእያ አሳይ ኡባይ አይልያ ግድና፥ ዎማኑዋ ግድና፥ አያ ኬሻ ቱጋ ቱጋቴደንቶ፥ መና ጎዳይ በኤዳ፤ ኡንቱንታ ማድያባይ ኦንነ ባዋ።

²⁷ መና ጎዳይ እስራኤልያ አሳ ሱን ሳሉዋፐ ጋርሳን ይሳና ያግቤና። ሄዋ ድራዉ፥ መና ጎዳይ ኡንቱንታ እዮኣሳ ናኣ እዮርባማ ባጋና አሼዳ።

²⁸ እዮርባም ሀኔዳ ሀራባይ፥ እ ኦዳባይ ኡባይ፥ እ ኦለቴዳዌነ ይሁዳ ባጋ ግዴዳ ዳማስቆ ካታማነ ሀማታ ካታማ እስራኤልያዉ ዛሬዳባይ እስራኤልያ ካተቱ ታርክያ ማጻፋን ጻፈት ኡቴዳ።

²⁹ እዮርባም ሀይቂደ፥ ባረ ማይዛ አዎቱዋን እስራኤልያ ካተቱዋን ጋከቴዳ፤ አ ሳኣን አ ናአይ ዛካራስ ካተቴዳ።