2 ቆሮንቶሳ 12 - ጌሻ ማጻፋ

ጳዉሎሳ ሳፃ

¹ ጬቀትያዌ ታዉ አይነ ጎኤናዋ ግዶፐካ፥ ታን ጬቀታናዉ በሴ። ሽን ታን ሳጻባነ ጎዳፐ ቆንጬዳዋ ሃሳያና።

² ታማነ ኦይዱ ላይፐ ካሰ፥ ሄዘን ሳሉዋ ፑደ ቤዳ እት ብታንያ፥ ክርስቶሳ አማንያዋ፥ ታን ኤራይ፤ ሄ ብታኒ ባረ አሳተን ቤዴ ዎይ ሳጻን ቤደንቶ፥ ታን ኤርከ፤ ጾሳይ ኤሬ።

³ ሄ ብታንያ፥ ሄዘን ሳሉዋ ፑደ ቤዳዋ፥ ኤራይ፤ እ ባረ አሳተን ቤደንቶነ ዎይ ሳጻን ቤደንቶ፥ ታን ኤርከ፤ ጾሳይ ኤሬ።

⁴ ሄዋን ሄ ብታኒ አሳይ ሃሳያናዉ ዳንዳየናዋ፥ አሳ እንጻርሳይካ ሃሳያናዉ ዳንዳየናዋ ስሴዳ።

⁵ ታን ሄ ብታንያባን ጬቀታና፤ ሽን ታን ዳቡራንቻ ግድያዋ ኤርስያ ድራዉ፥ ታ ሁጲያን ጬቀትከ።

⁶ ታን ጬቀታናዉ ኮይያዋ ግዶፐካ ኤያ ግድከ፤ አያዉ ጎፐ፥ ታን ቱሙዋ ሃሳያይ። ሽን አሳይ ታዋ ታናን በእያዋፐነ ታፐ ስስያዋፐ አደ ቆፐና ማላ ናገታይ።

⁷ ቃይ ጾሳይ ታዉ ዳሮ ቆንጬዳ ዎልቃማ የዉዋፐ ደንዴዳዋን ኦቶረተናዳን ድጋናዉ ታና ጫድ ኦይቂያ፥ ሴጻና ኪታንቻይ፥ ታና መቶናዉነ ታን ኦቶረተና ማላ፥ ታና ናጋናዉ ታዉ እመቴዳ።

⁸ ሄዋ ታፐ ሻካና ማላ፥ ታን ጎዳ ሄዙ ገደ ዎሳድ።

⁹ ጎዳይ ታና፥ “ታ አ ኬካተይ ነዉ ግዳናዋ፤ አያዉ ጎፐ፥ ታ ዎልቃይ ነ ዳቡራን ፖለቴ” ያጌዳ፤ ሄዋ ድራዉ፥ ክርስቶሳ ዎልቃይ ታናን ደአና ማላ፥ ታ ዳቡራን ጬቀታናዉ ታን ዳሮ ናሸታይ።

¹⁰ ታን ክርስቶሳ ድራዉ ዳቡርያዋን፥ አሳን ቦረትያዋን፥ ዋየትያዋን፥ የደርሰትያዋን፥ መቶትያዋን ናሸታይ፤ አያዉ ጎፐ፥ ታን ዳቡርያ ዎደ፥ ሄ ዎደ ምናይ።

ጳዉሎስ ቆሮንቶሳ አሳዉ ኡንኤቲደ ቆፔዳ

¹¹ ታን ጬቀቴዳዋን ኤያድ፤ ሽን ሄዋ ህንተ ታና ዎልቃን ኦስሴድታ፤ አያዉ ጎፐ፥ ህንተ ታና ጋላታናዉ በሴ፤ ታን አያንነ ኤረተናን ዮፐካ፥ የሱስ ኪቴዳ ቃ ጌተቴዳ ኡባቱዋፐ ላፍከ።

¹² ታና የሱስ ኪቴዳዌ ቱማ ግድያዋ ኤርስያ ማላይ፥ ኦራባይነ ዎልቃማ ኦሱ ህንተ ግዶን ዳሮ ገንጫን ኦሰቴዳ።

¹³ ታን ታ ሁጲያን ህንተና ዋይሳቤናዋፐ አትን፥ ሀራ አማንያ አሳቱዋፐ ህንተ አያን ላፊቴ? ሀያና ታን ህንተና ናቄዳዋ ታዉ አቶ ጊተ።

¹⁴ ታን ህንተኮ ባናዉ ጊጎደፐ፥ ሀዌ ታዉ ሄዘን ዎደ፤ ታን ህንተና ዋይስከ። ታን ህንተና ኮይያዋፐ አትን፥ ህንተ ሚሻ ኮይከ፤ አያዉ ጎፐ፥ አዉነ አታ ባረንቱ ናናዉ ሚሻ ምንጅያዋፐ አትን፥ ናናይ ባረንቱ አዎነ አትዉ ምንጅክኖ።

¹⁵ ታን ህንተ ሸምፖ ታዉ ደእያዋ ታናና ጋደ ናሸቻን እማና፤ ያትና፥ ታን ህንተና ሎይ ሲቅያ ድራዉ፥ ህንተ ታና ላፋ ሲቂቴ?

¹⁶ ግዶፐካ፥ ታን ህንተና ዋይሳበይከ፤ ሽን ህንተ ታና፥ “ኔን ኑና ጭማደ ማካላን ኦይቃዳ” ያጋንታ።

¹⁷ ታን ሀራይ አቶ፥ ህንተኮ ኪቴዳ እት አሳ ባጋናካ ህንተፐ ጎኤታድታ?

¹⁸ ቲቶ ህንተኮ ባና ማላ፥ ታን ዎሳድ፤ ቃይ አማንያ እሻካ አናና የዳድ። ቲቶ ህንተፐ ጎኤቴዴ? ኑን ኑ ኦሱዋ እት ቆፋን ኦበይኮ? ቃይ ኑ ሀኑካ እቱዋ ግደኔዬ?

¹⁹ ኑን ኡባ ዎደካ ህንተ ስንን ኑ ሁጰዉ ሞተትያዋ ህንተንቶ ማላቲ? ኑን ክርስቶሳን ደእያዋንቱዳን፥ ጾሳ ስንን ሀእ ጋካናስካ ሃሳዬቶ። ኑ ሲቃቶ፥ ኑን ኦያ ኡባባይካ ህንተና ማዳናሳ።

²⁰ አያዉ ጎፐ፥ ታን ህንተኮ ብያ ዎደ፥ ኦን ኤር ታን ኮይያዋ ማላ ህንተ ግደናን አጋነንቶነ፤ ቃይ ታንካ ህንተ ኮይያዋ ማላ ግደናን አጋነንቶነ። ቃይ ኦን ኤር ሄዋን ፓሉሚ፥ ቃናቲ፥ ሀንቁ፥ ዮራይ፥ ዝግርሳይ፥ ሳሮተ ድጉሳይ፥ ኦቶሩ፥ መቱ ደኤናን ዋዪ አጋና፤ ታና ያሼ።

²¹ ታን ህንተኮ ላኤንዋ ብያ ዎደ፥ ታ ጾሳይ ህንተ ስንን ታና ካዉሻነንቶነ ያያይ፤ ታን ናጋራ ካሰ ኦደ፥ ባረንቱ ኦዳ ቱናተፐ፥ ዎሹምያዋፐነ አሙዋፐ ስምቤና ዳሮ አሳቶ ዬከናን አግከ ጋደ ያያይ።