1 Sammeela 24 - ጌሻ ማጻፋ

ዳዊተ ሳኦላ ሸምፑዋ አሼዳ

¹ ሳኦል ፕልስጼማ አሳቱዋ የደርስያ ሳፐ ስምና፥ “ዳዊተ ኤንጋዳ ካታማ ማታን ደእያ ዎራን ደኤ” ጊደ አዉ ኦዴድኖ።

² እስራኤልያ ኡባ ግዶፐ ዶረቴዳ ሄዙ ሻአ አሳ ሳኦል አኪደ፥ ዳዊታነ አ አሳ ኮያናዉ፥ “ዎራ ዴሻቱ ጌስያ ዛላ” ግያ ሳኣ ማታ ቤዳ።

³ ሳኦል ኦግያ ዶናን ዶርሳ አቁዋ ማታን ደእያ ጎንጎሉዋኮ ዬዳ፤ ሼሻዉ ኡታናዉ ጎንጎሉዋ ግዶ ገሌዳ። ዳዊተነ አ አሳይ ጎንጎሎ ግዱዋኮ ሺቂደ ኡቴድኖ።

⁴ ዳዊታ አሳይ አ፥ “ሄኮ ታን ነ ሞርክያ ነ ኩሽያን አ እማና፤ ኔን አ ነ ኮዬዳዋዳን ኦና ያጊደ መና ጎዳይ ነዉ ኦዴዳ ጋላሳይ ሀቻ” ያጌድኖ። ዳዊተ ሳኦላ ኤርሰናን ሺቂደ፥ ሳኦላ ማዩዋ ጼራፐ ቃንጽ አኬዳ።

⁵ ቃንጼዳዋፐ ጉይያን፥ ዳዊተ ባረ ዎዛናን ካዮቴዳ።

⁶ ዳዊተ ባረ አሳቱዋ፥ “መና ጎዳይ ኦኪደ ካተዬዳ ታ ጎዳዉ ታን ሄዋ ኦናዋ ዎይ አ ቦላ ታ ኩሽያ ደንናዋ ጾሳይ ታፐ ሃሶ፤ አያዉ ጎፐ፥ ጾሳይ ኦኪደ ካተዬዳዌ አ” ያጌዳ።

⁷ ዳዊተ ሀዋዳን ሴሪደ፥ ሳኦላ ባረ አሳን ቦሽሰናን ድጌዳ። ሳኦል ጎንጎሉዋ ግዶፐ ከሲደ፥ ባረ ኦግያን ገሌዳ።

⁸ ሳኦል ቤዳዋፐ ጉይያን፥ ዳዊተ ጎንጎሉዋ ግዶፐ ከሲደ፥ ሳኦላ፥ “ታ ጎዳዉ፥ ካትያዉ!” ያጊደ ጼሴዳ፤ ሳኦል ጉየ ዛሪደ ጼሌዳ፤ ዳዊተ ቢታን ዱገ ጉፋኒደ፥ ሳኦላዉ ጎይኔዳ።

⁹ ያቲደ ዳዊተ ሳኦላ፥ “ዳዊተ ኔና ቆሀናዉ ኮዬ ግያ አሳቱዋ ቃላ ኔን አያዉ ስሳይ?

¹⁰ ሀ ጎንጎሉዋ ግዶን መና ጎዳይ ኔና ሀቼ ታዉ አ እሜዳዋ ኔን ነ አይፍያን በኣዳ፤ ታን ኔና ዎናዳን አማሬዳዋንቱ ታና ደንድኖ፤ ሽን ታን፥ መና ጎዳይ ኦኪደ ካተዬዳዋ እ ግድያ ድራዉ፥ ታን ታ ጎዳ ቦላ ታ ኩሽያ ደንከ ያጋደ ኔና አሻድ።

¹¹ ታ አዎ፥ በአ፤ ታ ኩሽያን ደእያ ነ ማዩዋ ጼራ ሀዋ ጼላ! ነ ማዩዋ ጼራፐ ቃንጻ አካድ፤ ሽን ኔና ዎበይከ፤ ታን ኔና ቆሀቤናዋነ ማካላቤናዋ አኬካደ ኤራ፤ ታን ኔና ቆሀበይከ፤ ሽን ኔን ታና ዎናዉ ሻንካታሳ።

¹² ነዋነ ታዋ መና ጎዳይ ፕርዶ፤ መና ጎዳይ ኔን ታና ቆሄዳዋ ሀሉዋ ከሶ፤ ሽን ታን ነ ቦላ ታ ኩሽያ ደንከ።

¹³ በን ዎደ፥ ኢታ ኦያዋንቱፐ ኢታባይ ከሴ ያግያ ሌምሱ ደኤ፤ ሄዋ ድራዉ፥ ታን ኔና ኩሽያንነ ቦችከ።

¹⁴ እስራኤልያ ካቲ ኦ ቦላ ከሴዴ? ኔን ኦና ኦይቃናዉ ኮያይ? ሀይቄዳ ካና ዎይ ካቶልያ ኮያይ?

¹⁵ መና ጎዳይ ኑ ግዶን ዳናቶ፤ ነዋነ ታዋ እ ፕርዶ፤ ታ የዉዋ ጼሊደ፥ ታ ድራዉ እ ሞተቶ፤ ነ ኩሽያፐ ታና እ አሾ” ያጌዳ።

¹⁶ ዳዊተ ሳኦላዉ ሃሳይያዋ ዉርሴዳ ዎደ፥ ሳኦል ዳዊታ፥ “ታ ናአዉ ዳዊታ፥ ሄዌ ነ ቃሌ?” ያጌዳ፤ ሳኦል ባረ ቃላ ቂሲደ ዬኬዳ።

¹⁷ ቃይካ ዳዊታ፥ “ኔን ታፐ አዳ ጽሉዋ፤ አያዉ ጎፐ፥ ታን ነዉ ኢታባ ኦና፥ ኔና ታዉ ሎኦባ ኦዳ።

¹⁸ መና ጎዳይ ታና ሀቼ ነዉ አ እምናካ ኔን ታና ዎቤና ድራዉ፥ ታዉ ኔን ኦዳ ሎኦባ ታና በሳዳ።

¹⁹ አሳይ ባረ ሞርክያ ደሚደ ቆሄናን የዲየ? ኔን ታዉ ሀቼ ኦዳ ኬካተ ድራዉ፥ መና ጎዳይ ኔና አንጆ።

²⁰ ሀእካ ኔን እስራኤልያዉ ካትያ ግዳናዋነ እስራኤልያ ካዉተይ ነ ማታ ጋርሳን ኤቃናዋ ታን ኤራይ።

²¹ ሀእ ስም ታፐ ጉይያን፥ ታ ዘረ ኔን ዱናዳንነ ታ ሱንካ ታ አዉዋ ጎልያፐ ቁጨናዳን መና ጎዳ ሱንን ታዉ ጫቃ” ያጌዳ።

²² ዳዊተ ሳኦላዉ ጫቄዳ። ሄዋፐ ጉይያን፥ ሳኦል ባረ ሶ ስሚደ ቤዳ፤ ዳዊተነ አ አሳይ ፑደ ጌሱዋ ቤድኖ።