1 Sammeela 12 - ጌሻ ማጻፋ

ሳመላ ዉርሰ ሳሮታ

¹ ሄዋፐ ጉይያን፥ ሳመል እስራኤልያ ኡባ ሀዋዳን ያጌዳ፤ “ህንተንቱ ታዉ ኦዴዳ ኡባባ ታን ስሳደ፥ ህንተንቱ ቦላ ካትያ ካተያድ።

² ሀእ ዛር ህንተንታ ካለናዉ ካቲ ደኤ። ታና ግዶፐ፥ ታን ዳሮ ደኣድነ ጭማድ፤ ታ ናናይ ህንተናና ደኢኖ። ታን ታ ያላጋተፐ ሀቼ ጋካናዉ ህንተንታ ካለድ።

³ ሄኮ ታን ሀዋን ኤቃድ፤ መና ጎዳ ስንንነ እ ኦኬዳ ካትያ ስንን ታ ቦላ ማርካትተ። ታን ኦ ቦራ አካድታ? ኦ ሀርያ አካድታ? ኦና ጭማድታ? ኦና ኡቁናድታ? ታ አይፍያ ቆቅሳናዉ ኦ ኩሽያፐ ማጋንጻ ማድታ? ሀዋንቱፐ እቱዋነ ታን ኦዳዋ ግዶፐ፥ ታን ጭጋና” ያጌዳ።

⁴ ሄዋፐ ጉየ ኡንቱንቱ ዛሪደ፥ “ኔን ኑና ጭማባካ፤ ዎይ ኑና ኡቁናባካ፤ ኔን አሳ ኩሽያፐ አያነ ማጋንጻ ማባካ” ያጌድኖ።

⁵ ሳመል ኡንቱንታ፥ “ህንተንቱ ታ ኩሽያን አያነ ደምቤናዎ መና ጎዳይነ እ ኦኬዳ ካቲነ ሀቼ ህንተንቱ ቦላን ማርካ” ያጌዳ። ኡንቱንቱካ፥ “ኤ፥ እ ማርካ” ያጌድኖ።

⁶ ሳመል አሳ፥ “ሙሳነ አሮና ዶሬዳዌነ ህንተንቱ አዎቱዋ ግብጼፐ ከሴዳዌ መና ጎዳ።

⁷ ሀእ ስም ህንተንቱነ ህንተንቱ አዋቶ መና ጎዳይ ኦዳ ጽሎ ኦሶ ኡባዉ ታን ህንተናና መና ጎዳ ስንን ሞተታናዳን፥ ሀዋን ኤቂተ።

⁸ ያቆብነ አ ሶ አሳይ ግብጼ ቢደ ደእሽን፥ ግብጼ አሳቱ ኡንቱንታ ናቄዳ ዎደ፥ ህንተንቱ አዎቱ መና ጎዳዉ ዋሴድኖ፤ መና ጎዳይ ሙሳነ አሮና ኪቴዳ፤ ኡንቱንቱ ህንተንቱ አዎቱዋ ግብጼፐ ከሲደ፥ ሀዋን ዎድኖ።

⁹ “ሽን እስራኤልያ አሳቱ መና ጎዳ ባረንቱ ጾሳ ዶጌድኖ፤ ጾሳይ ኡንቱንታ ሀጾራ ኦላንቻቱ ጋዳዋ ሲሳራ ኩሽያን፥ ፕልስጼማ አሳቱዋ ኩሽያንነ ሞኣበ ካትያ ኩሽያን አደ እምና ኡንቱንታ ኦሌድኖ።

¹⁰ ኡንቱንቱ መና ጎዳዉ፥ ‘ኑን ናጋራ ኦዶ፤ ኑን መና ጎዳ አጊደ፥ ባኣላዉነ አስታሮታዉ ጎይኔዶ። ሽን ሀእ ኔን ኑና ኑ ሞርከቱዋ ኩሽያፐ አሻ፤ ኑን ነዉ ጎይናና’ ያጊደ ዋሴድኖ።

¹¹ መና ጎዳይ ጌዶና፥ ባራቃ፥ ዮፍታሀነ ሳመላ ኪቲደ፥ ህንተንቱ ዩሹዋ ኡባን ደእያ ሞርከቱዋ ኩሽያፐ ህንተንታ አሼዳ፤ ያትና፥ ህንተንቱ ሳሮ ደኤድታ።

¹² “አሞና አሳ ካትያ ናኦስ ህንተንቱኮ ዬዳዋ በኤዳ ዎደ፥ መና ጎዳይ ህንተንቱ ጾሳይ ህንተንቱ ካትያ ግዶፐነ፥ ህንተንቱ ታና፥ ቱይት፥ ኑን ኑና ሞዳናዉ ካትያ ኮዬቶ ያጌድታ።

¹³ ሀእካ ህንተንቱ ዶሪደ ኦቼዳ ካቲ ሀዌሽ! በእተ፤ መና ጎዳይ ህንተንቱ ቦላ ካትያ ዎዳ።

¹⁴ መና ጎዳዉ ህንተንቱ ያዮፐ፥ አዉ ኪተቶፐ፥ አ ቃላዉ አዛዘቶፐ፥ አ አዛዞ ማካለናን አጎፐነ ህንተንቱካ ህንተንቱ ቦላ ካተትያ ካቲካ ጾሳ ህንተንቱ ጾሳ ካሎፐ፥ ያቶፐ ሎአ።

¹⁵ ሽን መና ጎዳ ቃላዉ ህንተንቱ አዛዘተናን ዮፐነ አ አዛዞ ማካሎፐ፥ ጾሳ ፕርዳይ ካሰ ህንተንቱ አዎቱዋ ቦላ ዬዳዋዳን፥ ህንተንቱ ቦላካ ያናዋ።

¹⁶ “ስም ሀእ ኤቂ ባሽተ፤ መና ጎዳይ ህንተንቱ አይፍያ ስንን ኦያ ሀ ግታባ በእተ!

¹⁷ ዛርጋ ጫካ ዎዲ ሀአ ግደኔየ? መና ጎዳይ ጉጉንነ እራ የዳና ማላ፥ ታን ጾሳዉ ዋሳና። ያትያዋ ግዶፐ፥ ካትያ ህንተንቱ ኦቼዳዌ መና ጎዳ ስንን ዎልቃማ ኢታተ ግድያዋ ህንተንቱ ኤራናነ በአና” ያጌዳ።

¹⁸ ሳመል መና ጎዳዉ ዋሴዳ፤ መና ጎዳይ ሄ ጋላስ ጉጉንነ እራ የዴዳ፤ ሄዋ ድራዉ፥ አሳይ ኡባይ መና ጎዳነ ሳመላ ሎይ ያዬዳ።

¹⁹ አሳይ ኡባይ ሳመላ፥ “ኑን ካትያ ኦቺደ፥ ኑ ናጋራ ኡባ ቦላ ሀ ኢታተ ጉጄዳ ድራዉ፥ ኑን ነ ቆማቱ ሀይቀናዳን ኑዉ መና ጎዳ ነ ጾሳ ዎሳርኪ” ያጌዳ።

²⁰ ሄዋፐ ጉየ ሳመል አሳዉ ሀዋዳን ያጌዳ፤ “ያዮፕተ፤ ቱሙካ ህንተንቱ ሀ ኢታተ ኡባ ኦድታ፤ ሽን ህንተንቱ ኩመን ዎዛናፐ መና ጎዳዉ ኪተትተፐ አትና፥ መና ጎዳ ካልያዋ አጎፕተ።

²¹ ማደና፥ አሸናነ ፓና ኤቃቱዋ ካሎፕተ፤ አያዉ ጎፐ፥ ሄዌ ፓናዋ።

²² መና ጎዳይ ባረ ዎልቃማ ሱን ድራዉ ባረ አሳ አገና፤ አያዉ ጎፐ፥ መና ጎዳይ ህንተንታ ባረ አሳ ኦናዉ ናሸቴ።

²³ ህንተንቱ ድራዉ ዎስያዋ አጋደ መና ጎዳ ቦላ ናጋራ ኦናዌ ታፐ ሃኮ፤ ታን ህንተንታ ሎኦነ ሱረ ኦግያ ታማርሳና።

²⁴ መና ጎዳዉ ያይተ፤ ህንተንቱ ኩመን ዎዛናፐ አማነቲደ፥ አዉ ኪተትተ፤ ህንተንቶ እ ኦዳ ግታባ ሀሳይተ።

²⁵ ሽን ህንተንቱ ኢታባ ዛር ዛሪደ ኦፐ፥ ህንተንቱካ ህንተንቱ ካቲካ ያና” ያጌዳ።