1 Sammeela 1 - ጌሻ ማጻፋ

ሳመል እስራኤልያ ካለያዋ ግዱሳ ( 1:1—7:17 ) ኤልቃናነ አ ሶይ አሳ

¹ ኤፍሬማ ገዝያን፥ ራማ ጌተትያ ካታማን ደእያ፥ ኤፍሬማ ዛረነ ጹፋ ያራ ግዴዳ፥ ኤልቃና ጌተትያ እት ብታኒ ደኤ፤ እ ይሮሃማ ናኣ፤ ይሮሃም ኤልሁ ናኣ፤ ኤልሁ ቶሁ ናኣ፤ ቶሁ ጹፋ ናኣ።

² ኤልቃናዉ ላኡ ማቻቱ ደኢኖ፤ እትን ሱንይ ሃኖ፤ የንኮር ሱንይ ፕኒኖ። ፕኒናዉ ናናይ ደኢኖ፤ ሽን ሃንዉ እት ናእካ ባዋ።

³ ኡባፐ ዎልቃማ መና ጎዳዉ ጎይናናዉነ ያርሻናዉ ኤልቃን ላይን ላይን ባረ ካታማፐ ሴሎ ቤ። ኤልያ ናናይ ላኡ፥ ሆፍኒንነ ፒንሃስ ያን መና ጎዳ ቄሳቱ ዋ።

⁴ ኤልቃን ያርሹዋ ያርሽያ ዎደ አዉደነ አሹዋፐ እት ኩሽያ ባረ ማቻት ፕኒንዉ፥ ቃይ እት እት ኩሽያ እ አቱማ ናናዉነ ማጫ ናናቶ ሁጲያን ሁጲያን እሜ።

⁵ መና ጎዳይ ሃኖ የሉዋ ድግንቶካ፥ ኤልቃን እዞ ዶስያ ድራዉ፥ እዝዉ ላኡ ኩሽያ እሜ።

⁶ መና ጎዳይ ሃንዉ ኡባና የሉዋ ድጌዳ ድራዉ፥ እዝ ላጋታ እዞ ሀንቀዉነ ይሎያዉ።

⁷ ሀዌ ላይፐ ላይን ሀንያዋ፤ ሃና መና ጎዳ ጎለ ቤዳ ዎደ አዉደነ እዝ ላጋታ እዞ ዬካና ጋካናዉ ቁማ ሙሳ እጻና ጋካናዉ ይሎያዉ።

⁸ እዝ አስናይ ኤልቃን እዞ፥ “ሃኔ፥ ኔን አያዉ ዬካይ? አያዉ ቁማ ሚኪ? ነ ዎዛናይ አያዉ ካዮቲ? ታን ነዉ ታሙ ናናቱዋፐ አክታየ?” ያጌ።

ሃን ዎሳ

⁹ እት ጋላስ ኡንቱንቱ ሴሎን ሜዳዋፐነ ኡሼዳዋፐ ጉይያን፥ ሃና ደንዳ ኤቃዱ። ኤቂያ ዎደ፥ መና ጎዳ ጎልያ ፐንግያ ማታን ደእያ ኦይድያን ቄስያ ኤል ኡቴዳ።

¹⁰ ሃና ሎይ ሴለታደ፥ ጫሞ ዬኩዋ ዬካደ መና ጎዳ ዎሳዱ።

¹¹ እዛ ሀዋዳን ያጋደ ቃንገ ቃንገታዱ፤ “ኡባፐ ዎልቃማ መና ጎዳዉ፥ ታና ነ ቆማቶ ጼላ! ታ ምሹዋ በኣደ፥ ታና ሀሳያ፤ ታና ነ ቆማቶ ዶጎፓ። ኔን ታዉ ነ ቆማትዉ አቱማ ናኣ እሞፐ፥ አ ደኡዋ ላይ ኡባን ታን አ ነዉ እማና፤ አ ሁጲ ኡባካ ሜደተና” ያጋዱ።

¹² ሃና መና ጎዳ ዎሳ አዱሴዳ ዎደ፥ ኤል እ ዶና ጼሌ።

¹³ ሃና ባረ ዎዛና ግዶን ጾሳ ዎስያ ዎደ፥ እ መተርሻይ ቃጽያዋፐ አትና፥ እዝ ቃላይ ስሰተና፤ ሄዋ ድራዉ፥ ኤል እዞ ማቴዳዋዳን ቆፔዳ።

¹⁴ ሄዋፐ እዞ፥ “ኔን አዉደ ጋካናዉ ማታይ? ዎይንያ ኤሳ ነ ዶናፐ ድጋ” ያጌዳ።

¹⁵ ሄዋፐ ጉየ ሃና ሀዋዳን ያጋደ አዉ ዛራዱ፤ “ቱይት፥ ታ ጎዳዉ፥ ታን ሎይ መቶታንቻ ማጫ አሳ፤ ታን ታ ሸምፑዋፐ መና ጎዳ ዎሳይፐ አትና፥ ዎይንያ ኤሳ ዎይ ማይያ ኡሻ ኡሻበይከ።

¹⁶ ታን ታ ቱጋነ ታ ምሹዋ ዳሩዋ ሀዋን ሃሳዬዳ ድራዉ፥ ታና ነ ቆማቶ ‘ፓና ማጫ አሳ’ ጋደ ቆፖፓ” ያጋዱ።

¹⁷ ሄዋፐ ጉየ ኤል እዝዉ ዛሪደ፥ “ሳሮተን ባ፤ ኔን አ ዎሴዳዋ እስራኤልያ ጾሳይ ነዉ እሞ” ያጌዳ።

¹⁸ ሄዋፐ ጉየ ሃና፥ “ነ ቆማታ ነ ስንን ናሹዋ ደሙ” ያጋዱ። ሄዋፐ ጉይያን፥ አ ባረ ኦግያ ባደ፥ ቁማ ማዱ፤ ሄዋፐ ስምና ሙለካ ካዮታበይኩ።

ሃና ሳመላ የላዱ

¹⁹ ዎንተ ጋላስ ጉራና ደንዲደ፥ ኤልቃንነ አ ሶ አሳይ መና ጎዳዉ ጎይኔዳዋፐ ጉይያን፥ ባረንቱ ሶ፥ ራማ ካታማ ስሜድኖ። ኤልቃን ባረ ማቻት ሃንና አቄዳ፤ መና ጎዳይ እዞ ቆፔዳ፤

²⁰ አ ሻሃሮ ዎደ ዎዲ ዉርና አቱማ ናኣ የላዱ። ሃና፥ “ታን መና ጎዳ ዎስና ስሴዳ” ጋደ አ ሱን ሳሙኤኤላ ሱንዱ።

²¹ ኤልቃን ባረ ሶ አሳ ኡባና ላይ ያርሹዋ መና ጎዳዉ ያርሻናዉነ ቃንጌዳዋ ጋናዉ ሴሎ ቤዳ፤

²² ሽን ሃና ባበይኩ። አ ባረ አስና፥ “ታ ናአይ ን ዱዳዋፐ ጉይያን፥ ታን አ አፋደ፥ መና ጎዳዉ እማና፤ መናዉ እ ያን ደአናዋ” ያጋዱ።

²³ እ አስናይ ኤልቃን፥ “ኔና ሎኦዋ ኦ፤ አ ኔን ን ዱና ጋካናዉ ሶን ጋምአሻ፤ ያንናካ መና ጎዳይ ባረ ቃላ ፖሎ” ያጌዳ። ሄዋፐ ጉየ ሃና ን ዱና ጋካናዉ ባረ ናኣ ንደ ሶን ጋምኣዱ።

²⁴ ሃና እዝ ናአይ ን ዱዳዋፐ ጉይያን፥ ሳመላነ ሄዙ ላይ ኮሩማ፥ ታሙ ኪሎ ግራመ ልያነ ኦጎሩዋ ኩመን ዎይንያ ኤሳ አካደ መና ጎዳ ጎልያ ሴሎ ባዱ፤ ናአይ ሄ ዎደ ጉ።

²⁵ ኡንቱንቱ ኮሩማ ሹኬዳዋፐ ጉይያን፥ ናኣ ኤልያኮ አፌድኖ።

²⁶ ሃና ኤልያ፥ “ታ ጎዳዉ፥ ነ ደኡ ኤሮ! ነ ስንን ኤቃደ መና ጎዳ ዎሴዳ ምሽራታ ቱሙ ታናቴ።

²⁷ ታን ሀ ናኣ የላናዉ ዎስና፥ መና ጎዳይ ታን አ ዎሴዳዋ እሜዳ።

²⁸ ሄዋ ድራዉ፥ ታን መና ጎዳዉ አ እማድ፤ እ ባረ ደኦ ላይ ኡባን መና ጎዳዉ እመቴዳ” ያጋዱ። ሄዋፐ ጉይያን፥ ኡንቱንቱ መና ጎዳዉ ያት ጎይኔድኖ።