1 ካታቱዋ 15 - ጌሻ ማጻፋ

ይሁዳ ካትያ አብያ

¹ ናባጻ ናኣ እዮርባም ካተቴዳ ታማነ ሆስፑን ላይን አቢይ ይሁዳን ካተቴዳ።

² አቢይ የሩሳላመን ሄዙ ላይ ካተቴዳ። አ ዳያ አበሰሎማ ናት ናቶ፤ እ ሱንይ ማእኮ።

³ አፐ ካሰ አ አዉ ኦዳ ናጋራቱዋ ኡባ ኦዳ፤ አ ዎዛናይ አ አዉዋ አዉዋ አዉዋ ዳዊታ ዎዛናይ ፖሎ ግዴዳዋዳን መና ጎዳዉ፥ ባረ ጾሳዉ ፖሎ ግድቤና።

⁴ ግዶፐነ፥ አፐ ጉይያን የሩሳላመን ካተታና ማላነ የሩሳላመ ሳሮተ ናጋና ማላ፥ መና ጎዳይ አ ጾሳይ ዳዊታ ድራዉ አቢያዉ እት አቱማ ናኣ እሜዳ።

⁵ ጾሳይ ሀዋ ኦዳ ጋሶታይ፥ ዳዊተ መና ጎዳ ስንን ሱረባ ኦዳ፤ ሂትያ ኦርዮና ቦላ ናጋራ ኦንፐ አትና፥ ባረ ደኡዋ ላይ ኡባን መና ጎዳ አዛዞቱዋፐ እትባነ ናገናን አግቤና።

⁶ አቢይ ደኤዳ ላይ ኡባን ሮብኣማ አሳናነ እዮርባማ አሳና ኦለቲደ ደኤድኖ።

⁷ አቢይ ሀኔዳ ሀራባይነ እ ኦዳባይ ኡባይ ይሁዳ ካተቱ ታርክያ ማጻፋን ጻፈት ኡቴዳ። አቢይነ እዮርባም ኦለቲደ ደኤድኖ።

⁸ አቢይ ሀይቂደ ባረ ማይዛን ጋከቴዳ፤ እ ዳዊታ ካታማን ሞገቴዳ። አ ሳኣን አ ናአይ አሳይ ካተቴዳ።

ይሁዳ ካትያ አሳ

⁹ እስራኤልያ ካቲ እዮርባም ካተቴዳ ላታማን ላይን አሲ ይሁዳን ካተቴዳ።

¹⁰ አሲ የሩሳላመን ኦይታማነ እት ላይ ካተቴዳ። አ አዉዋ ዳይ ሱንይ ማእኮ፤ አ አበሰሎማ ናቶ።

¹¹ አሲ ባረ ማይዛ አዉ ዳዊተ ኦዳዋዳን፥ መና ጎዳ ስንን ሱረባ ኦዳ።

¹² ጎይኖ ዎጋ ኦደ አቱማ አሲ ሻርሙጽያ አቱማ አሳቱዋ አሳይ ባረ ቢታፐ ይሴዳ፤ አፐ ካሰ ደኤዳ ካተቱ መዳ ኤቃ ምስለቱዋ ኡባ ቆለረደ ኦሌዳ።

¹³ አ አዉዋ ዳያ ማእካካ አሼሮ ግያ ጾሳትዉ ቱና ኤቃ ምስልያ መዳ ድራዉ፥ ካትያ አቶ አ ጌተትያ ቦንቹዋፐ እዞ ድጌዳ። አሲ ሄ ኤቃ ምስልያ ቃንጸሬደ፥ ቀድሮና ዛንጋራን ጹጌዳ።

¹⁴ አሲ ጎይንያ ቃ ሳኣ ይሰናን አጎፐነ፥ እ ባረ ደኤዳ ላይ ኡባን መና ጎዳዉ ዎዛናፐ አማነትያ አሳ ግዲደ ደኤዳ።

¹⁵ እነ አ አዉ ጾሳዉ ዱማይ ዎዳ ብራ፥ ዎርቃነ ሀራ ሚሻቱዋ አሂደ፥ ጾሳ ጌሻ ጎልያ ግዶን ዎዳ።

¹⁶ ይሁዳ ካቲ አስነ እስራኤልያ ካቲ ባእሽ፥ ባረንቱ ካተቴዳ ላይ ኡባን ኦለቴድኖ።

¹⁷ እስራኤልያ ካቲ ባእሽ ይሁዳ ቦላ ዎራጄዳ፤ ማዪደ ይሁዳ ካትያ አሳ ቢታፐ ኦንነ ገለናዳንነ ከሰናዳን ተአናዉ ራማ ካታማ ዩሹዋ ምንሲደ ግምቤዳ።

¹⁸ ሄዋ ጋሱዋን ካቲ አሳይ መና ጎዳ ጌሻ ጎልያንነ ባረ ካትያ ጎለን አቴዳ ዎርቃነ ብራ ኡባ ከሲደ፥ ባረ ኦሳንቻቱ ኩሽያን ዎዳ። ሄዝያና ናኣ ናኣ፥ ጻብርሞና ናአዉ፥ ዳማስቆ ካታማን ደእያ ሶርያ ካትያ በንሀዳዳዉ፥ እሞታ ኦደ የዲደ ሀዋዳን ያጌዳ፦

¹⁹ “ካሰ ታ አዉዋናነ ነ አቡና ጫቀቴዳዋዳን፥ አነ ታናናነ ኔናና ጫቀቶይተ። በአ፥ ሀዋ ብራነ ዎርቃ ታን ነዉ እሞታ እማናዉ የዳድ። እስራኤልያ ካቲ ባእሽ ባረ ኦላንቻቱዋ ታ ጋድያፐ ከሳና ማላ፥ ኔን ካሰ አናና ጫቀቴዳ ጫቁዋ ኮላ” ያጌዳ።

²⁰ በንሀዳድ ካቲ አሲ ጌዳዋ ማዪደ፥ ባረ ኦላ ጋዳዎቱዋ እስራኤልያ ካታማቱዋ ኦላናዉ የዴዳ። ኡንቱንቱ አይኖ፥ ዳናነ አቤል-ቤትማእካ ጌተትያ ካታማቱዋ፥ ጋሊላ አባ ማታን ደእያ ቢታ፥ ንፍታሌማ ቢታናካ ጉጂደ ኡባ ጾኔድኖ።

²¹ ካቲ ባእሽ ሄዋ ስሲደ፥ ራማ ካታማ ግምቢያዋ አጊደ፥ ትርጻ ካታማ ቤዳ።

²² ሄዋፐ ጉይያን ካቲ አሲ ይሁዳን ደእያ አሳ ኡባ አዛዚና እቱነ አተናን ደንዲደ፥ ባእሽ ካሰ ያን ጎኤትያ ሹቻነ ም ራማፐ ኬዜድኖ። ካቲ አሲ ምጽጳነ ቢንያማ ቢታን ደእያ ገባአ አን ምንሲደ ግምቤዳ።

²³ አሲ ሀኔዳ ሀራባይ፥ አ ምኖተ ኡባይ፥ እ ኦዳባይ ኡባይነ እ ኬጼዳ ካታማቱ ይሁዳ ካተቱ ታርክያ ማጻፋን ጻፈት ኡቴድኖ። ሽን እ ጭሜዳ ዎደ ገድያ ሳከቴዳ።

²⁴ አሲ ሀይቂደ፥ ባረ ማይዛን ጋከቴዳ፤ ባረ ማይዛ አዉዋ ዳዊታ ካታማን ሞገቴዳ። አ ናአይ ዮሳፌጸ አ ሳኣን ካተቴዳ።

እስራኤልያ ካትያ ናዳባ

²⁵ ይሁዳ ካቲ አሲ ካተቴዳ ላኤን ላይ እዮርባማ ናአይ ናዳበ እስራኤላን ካተቴዳ፤ እ እስራኤልያ ቢታን ላኡ ላይ ካተቴዳ።

²⁶ ናዳበ ካሰ ባረ አዉዋ ኦግያነ እስራኤልያ አሳ እ ኦስሴዳ አ ናጋራ ኦግያን ሀመቲደ፥ መና ጎዳ ስንን ኢታባ ኦዳ።

²⁷ ይሳኮራ ዛርያ ግዴዳ አኪያ ናአይ ባእሽ ናዳባ ቦላ ማቀቴዳ። ሄ ዎደ ናዳብነ አ ኦላንቻቱ ፕልስጼማን ደእያ ግባቶና ካታማ ዶዲደ ደኢኖ።

²⁸ ይሁዳ ካቲ አሲ ካተቴዳ ሄዘን ላይን ባእሽ ናዳባ ዎደ፤ አ ሳኣን እ ባረዉ ካተቴዳ።

²⁹ ባእሽ ካዉተ ዶሞ ሳናካ እዮርባማ ሶ አሳ ኡባ ዎ ዉርሴዳ፤ መና ጎዳይ ሴሎፐ ዬዳ ባረ ቆማ ትምቢትያ ኦድያ አኪያ ባጋና ኦዴዳዋዳንካ እዮርባማ ጎልያ አሳይ ኡባይ ሀይቂ ዉሬዳ።

³⁰ ሄዌ ሀኔዳዌ እዮርባም ባረ ሁጲያዉ ኦዳ ናጋራ ድራሳ፥ እስራኤልያ አሳ እ ኦስሴዳ ናጋራ ድራሳነ መና ጎዳ እስራኤልያ ጾሳ ሀንቀዳ ድራሳ።

³¹ ናዳበ ሀኔዳ ሀራባይነ እ ኦዳባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ።

³² ይሁዳ ካትያ አስነ እስራኤልያ ካትያ ባእሽ ባረንቱ ካዉተ ላይ ኡባን ኦለቲደ ደኤድኖ።

እስራኤልያ ካትያ ባእሻ

³³ ይሁዳ ካቲ አሲ ካተቴዳ ሄዘን ላይን አኪያ ናአይ ባእሽ እስራኤልያ አሳ ኡባ ቦላ ካተቴዳ፤ እ ትርጻ ካታማን ላታማነ ኦይዱ ላይ ካተቴዳ።

³⁴ እዮርባም እስራኤልያ አሳ ኦስሴዳ ናጋራ ኦደነ አ ኦግያን ሀመቲደ፥ ባእሽ መና ጎዳ ስንን ኢታባ ኦዳ።