1 ካታቱዋ 12 - ጌሻ ማጻፋ

ሻከቴዳ ካዉተቱዋ ( 12:1—22:53 ) ፑደሃ ያራቱዋ ማካላ

¹ እስራኤልያ አሳይ ኡባይ ሮብኣማ ካተያናዉ ሰኬማ ካታማ ቤዳ ድራዉ፥ እካ ያ ቤዳ።

² ናባጻ ናአይ እዮርባም፥ ካትያ ሶሎሞነፐ ባቃቲደ ግብጼን ደእያዌ ሀዋ ስሴዳ ዎደ፥ ግብጼፐ ስሚደ ዬዳ።

³ እስራኤልያ አሳይ እዮርባማዉ ኪቲደ ጼስስና፥ እነ እስራኤልያ ማባራይ ኡባይ ሮብኣማኮ ቢደ፥

⁴ “ነ አዉ ኑና ዴጾ ሞርገ ም ቶሴዳ፤ ሽን ሀእ ኔን እ ኑና ኦስስያ ዎልቃማ ኦሱዋነ ዴጾ ሞርገ ም ኑዉ ካዉሽሳርኪ። ያቶፐ፥ ኑን ነዉ ሞደታና” ያጌድኖ።

⁵ ሮብኣመ ኡንቱንቶ፥ “ቢተ፤ ሄዘን ጋላስ ስሚደ ታኮ ዪተ” ያጌዳ፤ አሳይ ቤዳ።

⁶ ሄዋፐ ጉይያን ካቲ ሮብኣመ አ አዉ ሶሎሞነ ፓጻ ደእያ ዎደ፥ ሶሎሞና ዞሬዳ ጭማቱዋ ዞረታ በሴዳ። እ ኡንቱንታ፥ “ሀ አሳዉ ዋጋደ ዛራ ጊቴ?” ያጊደ ኦቼዳ።

⁷ ጭማቱ ሮብኣማ፥ “ሀቼ ኔን አሳዉ ቆማ ግዳደ ኦፐነ ኡንቱንቱ ኦችያዎ ኔን ሎኦ ቃላ ዛሮፐ፥ ኡባ ገደ ኡንቱንቱ ነዉ ቆማ ግዳናዋንታ” ያጌድኖ።

⁸ ሽን ሮብኣመ ጭማቱ ዞሬዳ ዞርያ አጊደ፥ አናና ድጪደ አዉ ኦያ ያላጋ አሳቱዋ ዞረታ በሴዳ።

⁹ እ ኡንቱንታ፥ “ህንተንቱ ታና ዞርያዌ አዬ? ‘ነ አዉ ኑና ቶሴዳ ዴጾ ሞርገ ም ኑዉ ካዉሽሳርኪ’ ያግያ ሀ ደርያዉ ዋጋደ ዛሮ?” ያጊደ ኦቼዳ።

¹⁰ ሽን አናና ድጬዳ ያላጋቱ፥ “ ‘ነ አዉ ኑና ዴጾ ሞርገ ም ቶሴዳ፤ ሽን ኔን ኑዉ ካዉሽሳርኪ’ ያግያ አሳዉ፥ ‘ታ ቄር ብራ ታ አዉዋ ጼሳፐ ኦርዴ።

¹¹ ታ አዉ ህንተንቱ ሞርገ ም ዴጽሴዳ፤ ሽን ታን ሄዋፐካ አደ ዴጽሳና። ታ አዉ ህንተንታ ልሱዋን ዋዳ፤ ሽን ታን ህንተንታ ማስማሱዋዳን ዱክያ ልሱዋን ዋና’ ያጋደ ዛራ” ያጌድኖ።

¹² ሄዋፐ ጉይያን ካቲ ሮብኣመ፥ “ሄዘን ጋላስ ስሚደ ታኮ ዪተ” ጌዳዋዳንካ፥ እዮርባምነ አሳይ ኡባይ ሄዘን ጋላስ ስሚደ ዬድኖ።

¹³ ካቲ ኡንቱንቶ ሀንቆ ዛሩዋ ዛሬዳ። ጭማቱዋ ዞርያ አግ ባሺደ፥

¹⁴ ያላጋቱ ዞሬዳ ዞርያ ካሌዳ። ያቲደ ሀዋዳን ያጌዳ፤ “ታ አዉ ህንተንቱ ሞርገ ም ዴጽሴዳ፤ ሽን ታን ሄዋፐካ አደ ዴጽሳና። ታ አዉ ህንተንታ ልሱዋን ዋዳ፤ ሽን ታን ህንተንታ ማስማሱዋዳን ዱክያ ልሱዋን ዋና” ያጊደ ዛሬዳ።

¹⁵ ካቲ አሳይ ግያዋ ስሰናን እጼዳ፤ አያዉ ጎፐ፥ መና ጎዳይ ሴሎፐ ዬዳ አኪያ ባጋና ካሰ ናባጻ ናኣ እዮርባማዉ ኦዴዳ ቃላይ ፖለታናዳን ሀዌ መና ጎዳፐ ሀኔዳ።

¹⁶ እስራኤልያ አሳይ ኡባይ ካቲ ኡንቱንቱ ግያዋ ስሰናን እጼዳዋ በኢደ፥ ካትያ ሀዋዳን ያጌድኖ፤ “ዳዊተዋፐ ኑና ጋክያባይ አዬ? እሰያ ናኣፐ ኑን ላታናዌ ባዋ! እስራኤልያ አሳዉ፥ ህንተንቱ ሶ ህንተንቱ ሶ ስምተ! ሀእ ስም ሮብኣመ ባረዉ ናገቶ!” ያጌድኖ። እስራኤልያ አሳይ ኡባይ ባረንቱ ሶ ባረንቱ ሶ ስሜድኖ።

¹⁷ ሽን ሮብኣመ ይሁዳ ካታማቱዋን ደእያ እስራኤልያ አሳ ቦላ ካተቴዳ።

¹⁸ ሄዋፐ ጉይያን ካቲ ሮብኣመ ባረ ጋባራቱዋ ካፑዋ አዶንራማ እስራኤልያ አሳኮ ኪቴዳ፤ ኡንቱንቱ ሹቻን ጫዲደ ዎድኖ። ያትና፥ ካቲ ሮብኣመ ባረ ፓራ ጋርያን ኤለካ ከስ ኡቲደ፥ የሩሳላመ ባቃቴዳ።

¹⁹ ሄዋፐ ዶሚደ ሀቼ ጋካናዉ እስራኤልያ ዛራቱ ታማቱ ዳዊታ ዛርያፐ ካተቴዳ ካተቱዋ ቦላ ማካሌድኖ።

²⁰ እዮርባም ግብጼፐ ስሜዳዋ እስራኤልያ አሳይ ኡባይ ስሴዳ ዎደ፥ አ ባረንቱ ያአዉ ጼስሲደ፥ እስራኤልያ ቦላ ካተዬድኖ፤ ዳዊታ ዛርያፐ ካተቴዳ ካተቶ አማነቲደ አቴዳዌ ይሁዳ ዛርያ ጻላላ።

ሻማእይ ትምቢትያ ኦዴዳ

²¹ ሶሎሞና ናአይ ሮብኣመ የሩሳላመ ካታማ ጋኬዳ ዎደ፥ እስራኤልያ ቢታ አሳና ኦለቲደ፥ ካዉተ ባረዉ ዛራና ማላ፥ ይሁዳ ዛርያፐነ ቢንያማ ዛርያፐ ዶረቴዳ እት ጼታነ ሆስፑን ታሙ ሻአ ኦላንቻቱዋ ሺሼዳ።

²² ሽን ጾሳ ቃላይ፥ ጾሳ አሳ ግድያ ሻማእያኮ ዪደ፥

²³ “ሶሎሞና ናኣ፥ ይሁዳ ካትያ ሮብኣማዉ፥ ይሁዳነ ቢንያማ ዛረቶነ አቴዳ አሳ ኡባዉ ሀዋዳን ያጋ፤

²⁴ ‘መና ጎዳይ ህንተንታ፥ “ህንተንቱ ዳቦቱዋና፥ እስራኤላቱዋና ኦለታናዉ ቦፕተ። ሀዋ ታን ኦዳ ድራዉ፥ ህንተንቱ ኡባይካ ህንተንቱ ሶ ህንተንቱ ሶ ስምተ” ያጌ’ ያጋደ ኦዳ” ያጌዳ። ኡንቱንቱ መና ጎዳ ቃላ ስሲደ፥ ስሚደ ሶ ቤድኖ።

እዮርባም ጾሳፐ ዎራ ስሜዳ

²⁵ ሄዋፐ ጉይያን እዮርባም ኤፍሬማ ገዝያን ደእያ ሰኬማ ጌሶ ኦ ግምቢደ፥ ያን ደኤዳ፤ ሄዋፐ ከስ ቢደ ጲንኤላ ግምቤዳ።

²⁶ እዮርባም ባረ ዎዛናን፥ “ካዉተይ ዳዊታ ዛርያዉ ስማና።

²⁷ ሀ አሳይ መና ጎዳ ጌሻ ጎልያን ያርሹዋ ያርሻናዉ የሩሳላመ ካታማ ብያዋ ግዶፐ፥ ኡንቱንቱ ቃይካ ባረንቱ ጎዳኮ፥ ካትያ ሮብኣማኮ ስማና። ኡንቱንቱ ታና ዎደ፥ ይሁዳ ካትያ ሮብኣማኮ ስማና” ያጊደ ቆፔዳ።

²⁸ ሄዋ ድራዉ፥ ካቲ ዞረቴዳዋፐ ጉይያን ዎርቃፐ ላኡ ማራቱዋ ምስለቱዋ መደ አሳዉ፥ “ህንተንቱ ሀዋፐ የሩሳላመ ቤዳዋ ኬሻይ ግዳናዋ። ህንተንቶ እስራኤልያ አሳቶ፥ ህንተንታ ግብጼፐ ከሴዳ ህንተንቱ ጾሳቱ ሀዋንቱሽ!” ያጌዳ።

²⁹ ኡንቱንቱፐ እቱዋ ቤቴለን፥ እቱዋ ቃይ ዳናን ዎዳ።

³⁰ ሀ የዉ ኡንቱንቶ ናጋራቴዳ፤ አያዉ ጎፐ፥ እት ማራ ምስልያዉ ጎይናናዉ አሳይ ዳና ጋካናዉ ቤዳ።

³¹ እዮርባም ደርያ ሁጲያን ጎይንያ ቃ ሳኣ ጊግሲደ ሌዊያ ዛርያ ግዳና ዮፐካ፥ ኡባ ቆሞ አሳፐ ቄሳቱዋ ኦደ ሱንዳ።

³² ይሁዳን ቦንችያዋዳን ሆስፑን አግናን ታማነ እቼሻን ጋላሳን ባላይ ቦንቼታናዳን፥ እዮርባም ጋላሳ ኬሬዳ፤ ያርሹዋ ያርሼዳ። እ ሀዋዳን ሀኔዳ፤ ቤቴለ ቤዳ፤ ባረ መዳ ማራ ምስልያዉ ያርሹዋ ያርሼዳ። ቃይ ባረ መዳ ጎይንያ ቃ ግሹዋን ቄሳቱ ዋ ቤቴለን ሱንደ ዎዳ።

³³ እ ባረ ሁጲያዉ ዶሬዳ ሆስፑን አግናን፥ ሄ አግናዉ ታማነ እቼሻን ጋላስ ቤቴለ ቤዳ፤ ሄ ጋላሳይ እስራኤልያ አሳዉ ባላ ግዳናዳን አዋዬዳ። ያቲደ እጻና ጩዋያናዉ ፑደ ያርሽያ ሳኣ ከሴዳ።