1 ካታቱዋ 10 - ጌሻ ማጻፋ

ሳባ ካታቶ

¹ ሳባ ካታታ መና ጎዳ ሱንን ዋረቴዳ ሶሎሞና ዋርያ ስሳደ፥ ዴጽያ ኦሻቱዋ አካደ፥ አ ፓጫናዉ ደንዳዱ።

² ሳዉዋ፥ ሎይ ዳሮ ዎርቃነ አልኦ ሹቻ ጫነቴዳ ዳሮ ጋሎቱዋ ጩጉዋና ሎይ ዳሮ አጃባና የሩሳላመ ጋካደ፥ ሶሎሞና ስን አአዱ። ባረ ዎዛናን ደእያዋ ኡባ ሶሎሞናዉ ኦዳዱ።

³ ሶሎሞነ አ ኦቼዳዋ ኡባ ኦዴዳ፤ እዝዉ ብርሸናን አፐ ጌም አቴዳባይ አያይነ ባዋ።

⁴ ሳባ ካታታ ሶሎሞና አዳ ኤራ፥ እ ኬጼዳ ካትያ ጎልያ፥

⁵ አ ማዳን ሺቅያ ቁማ፥ አ ኦሳንቻቱ ኡትያ ኡተ፥ አ ቆማቱ ኦያ ኦሱዋነ ማይያ ማዩዋ፥ አ ኤሳ ትግያዋንታነ መና ጎዳ ጌሻ ጎልያን እ ጹግያ ያርሹዋ በኤዳ ዎደ፥ እዝ ዎዛናይ ጋገቴዳ።

⁶ ሄዋፐ ጉይያን እዛ ካትያ፥ “ነዋነ ነ አዳ ኤራተባ ታን ታ ጋደን ደኣደ ስሴዳዌ ቱማ።

⁷ ሽን ታን ያደ፥ ታ አይፍያ ብራናን በአና ጋካናዉ ኡንቱንቱ ታዉ ኦዴዳዋ አማናበይከ። ታዉ አሳይ ኦዴዳዌ ባጋነ ጋከና፤ አዳ ኤራተንካ ዱረተንካ ታን ስሴዳዋፐ ሎይ ዳሬ።

⁸ ኡባ ዎደ ነ ስንን ኤቂደ፥ ነ አዳ ኤራ ስስያ ነ አሳቱነ ነ ኦሳንቻቱ አያ ናሸቲኖሻ!

⁹ ኔናን ናሸቲደ፥ ኔና እስራኤልያ ካዉተ አራታን ኡትሴዳ መና ጎዳይ ነ ጾሳይ ጋላተቶ! መና ጎዳይ እስራኤልያ አሳ መናዉ ሲቄዳ ድራዉ፥ ኔን ሱረ ፕርዳነ ጽሎተ ኦና ማላ እ ኔና ካተዬዳ” ያጋዱ።

¹⁰ ካታታ ኦይዱ ሻአ ኪሎ ግራመ ዴጽያ ዎርቃ፥ ሎይ ዳሮ ሳዉዋነ አልኦ ሹቻ ካትያዉ እማዱ። ሳባ ካታታ ካትያ ሶሎሞናዉ እሜዳዋ ኬሻ ዳሮ ሳዉዋ ሄዋፐ ስምና ኦንነ አህቤና።

¹¹ (ካትያ ኪራማ ማርካባቱ፥ ኦፍራፐ ዎርቃ አሄዳዋንቱ ያፐካ ሳንዳለ ጌተትያ ሎይ ዳሮ ምነ አልኦ ሹቻ አሄድኖ።

¹² ካቲ ሶሎሞነ ሄ ሳንዳልያፐ መና ጎዳ ጌሻ ጎልያነ ካትያ ጎልያ ቱቀቱዋ፥ ማዝሙርያ የጽያዋንቶ ዲነ ማስንቁዋ መሴዳ። ሄዋ ማላ ሳንዳሊ ሄ ጋላሳፐ ሃ ስምና ይነ ኤረና፥ ቤትነ ኤረና።)

¹³ ካቲ ሶሎሞነ እማናዉ በስያ እሞታፐ ሀራ፥ ሳባ ካታታ አሞታደ አ ኦቼዳዋ ኡባ እዝዉ እሜዳ። ሄዋፐ ጉይያን ሳባ ካታታ ባረ አጃባና ደንዳደ፥ ባረ ጋደ ስማዱ።

ካትያ ሶሎሞነ ዱረታ

¹⁴ ሶሎሞነ ላይን ላይን አክያ ዎርቃይ ላታማነ ሄዙ ሻአ ኪሎ ግራመ ዴጽያዋ።

¹⁵ ሄዌ ዛልአንቻቱዋፐ አኬዳ ቃራጻነ አራባ ቢታ ካተቱዋ ኡባፐነ እስራኤልያ ቢታ ሞድያዋንቱፐ አኬዳ ጊራ ቦላ ጉጃ።

¹⁶ ሶሎሞነ ላኡ ጼቱ ዎጋ ጎንዳለቱዋ ቆጼዳ ዎርቃፐ መሴዳ፤ እት እት ጎንዳልያን ላፑን ኪሎ ግራመ ግድያ ዎርቃይ ገሌዳ።

¹⁷ ቃይካ እ ሄዙ ጼቱ ቄር ጎንዳለቱዋ ቆጼዳ ዎርቃፐ መሴዳ፤ እት እት ቄር ጎንዳልያን ላኡ ኪሎ ግራመ ግድያ ዎርቃይ ገሌዳ። ካቲ ሄ ጎንዳለቱዋ ሊባኖሳ ዎራ ጎልያ ጌተትያ ጎለን ዎዳ።

¹⁸ ቃይካ ካቲ እት ዎልቃማ ካዉተ አራታ ዳንጋርሳ ዛልያፐ መሴዳ፥ ሙሩታ ዎርቃን ሼሼዳ።

¹⁹ ካዉታ አራታይ ደእያ ሳኣ ፑደ ከሳናዉ የያ ኡሱፑን ደቱ ደኢኖ። ሄ አራታዉ ጉየ ባጋይ ጻ። አራታዉ ላኡ ባጋናካ ቀስያ ዘምፕስያ ሳአቱ ደኢኖ፤ ሄ ላኡ ሳአቱ ላንቂያንካ ኤቄዳ እት እት ጋሙዋ ምስሊ ደኤ።

²⁰ ሄ አራታ ፑደ ከስያ ኡሱፑን ደቱዋን ያ ባጋናነ ሀ ባጋና እት እት ጋሙዋ ምስሊ፥ ኡባና ታማነ ላኡ ምስለቱ ደኢኖ። ሀዋ ማላ ካዉተ አራታይ ሀራ ካዉተን ሀቃንነ ኦሰትቤና።

²¹ ካቲ ሶሎሞነ ኡሻ ኡሽያ ሚሻ ኡባይ ዎርቃፐ መቴዳ፤ ሊባኖሳ ዎራ ጎለን ደእያ ሚሻ ኡባይካ ሙሩታ ዎርቃፐ መቴዳ። እትባይነ ብራፐ መትቤና፤ አያዉ ጎፐ፥ ሶሎሞነ ዎደ ብራይ ኡባካ ጎእያባዳን ፓይደት ኤረና።

²² ካትያዉ ኪራማ ማርካባቱዋና ዛልእያ ዎልቃማ ማርካባቱ አባን ደኢኖ። ሄ ማርካባቱ ዎርቃነ ብራ፥ ዳንጋርሳ አቻ፥ ገለሾቱዋነ ቃረቱዋ ጫን አኪደ፥ ሄዙ ላይፐ እት ገደ ዪኖ።

²³ ካቲ ሶሎሞነ ዱረተንነ አዳ ኤራተን ሳኣን ደእያ ካተቱዋ ኡባፐ ዳሬዳ።

²⁴ ሳኣን ደእያ አሳይ ኡባይ አ ስን አናዉነ ጾሳይ አ ዎዛናን ዎዳ አዳ ኤራ ስሳናዉ ኮዬ።

²⁵ ላይፐ ላይን ይያ ኡባይ አዉ እማናዉ ዎርቃነ ብራ ሚሻቱዋ፥ ማዮቱዋ፥ ኦላ ሚሻቱዋነ ሳዉዋ፥ ፓራቱዋነ ባቁሎቱዋ አኪደ ዬ።

²⁶ ሶሎሞነ ፓራ ጋረቱዋነ ፓራቱዋ ሺሼዳ፤ አዉ እት ሻአነ ኦይዱ ጼቱ ፓራ ጋረቱነ ታማነ ላኡ ሻአ ፓራቱ ደኢኖ። እ ኡንቱንቱ ፓራ ጋረቱዋ ካታማቱዋንነ ባረናና የሩሳላመን ዎዳ።

²⁷ ካቲ የሩሳላመን ብራይ ሹቻዳን ኬለታናዳን፥ ዝጋይካ ጋን ድጭያ ኤዳን ጮራታናዳን ኦዳ።

²⁸ ሶሎሞነ ፓራቱ ግብጼፐነ ቃዌ ጌተትያ ቢታፐ ዬድኖ። ካትያ ዛልአንቻቱ ኡንቱንቱ ቃዌፐ ሻሉዋን ሻሚደ አሂኖ።

²⁹ ኡንቱንቱ እት እት ፓራ ጋርያ ኡሱፑን ጼቱ ጻጋራ ብራን፥ እት እት ፓራ ጼታነ እሻታሙ ጻጋራ ብራን ግብጼፐ ሻሚደ አሂኖ፤ ኡንቱንቱካ ሂተቱዋ ካተቶ ኡባቶነ ሶርያ ካተቶ ዛልኢኖ።