तितस 2 - देवास राईसत्य सिच्छा 1 तर तुँइसेहे जेहे सत्य सिच्छाइ रैल्ह उहे कहिन् अनुसार सिखाउ। 2 बुढ्रा मानुसलाइ सान्त, गम्भिर, समझदार, बिस्वासै पक्का, पेरेम आउँ धैर्य भेबा पोर्लाहार बाजिहिन् सिखाउ। 3 उहेरङ् करिहिन् बुढ्रि अइमाइलके परमेस्वरलाइ आदर कर्लाहार जिबन बिताउस् बाजिहिन् सिखाउ। उखर्ह्वाइ ओर्कोलाइ निन्दा बुन् करुस्, अङ्गुरक् मद्ध धेरेक्कुर नहिंखाइलाहार भेबा पोर्लाहार, आउँ उखर्ह्वाइ ता ओर्कोलकलाइ राम्रो काम कर्बा पोर्लाहार बाजिहिन् सिखाबा पोर्लाहार। 4 उखर्ह्वाइ तरुनि अइमाइलकलाइ आफ्निक्-आफ्निक् साँयथालकलाइ आउँ छाउरा-पुटालकलाइ माया कर्बा पोर्लाहार बाजिहिन् सिखाबा पोर्लाहार, 5 आउँ उखर्ह्वा समझदार भेबा पोर्लाहार, पबित्र मन भेल, राम्रोइसौ घर चालाबा पार्लाहार, दयालु आउँ आफ्निक् साँयथाक् अधिनै बस्लाहार भेबा पोर्लाहार बाजिहिन् सिखाउस्, ताकि परमेस्वरक् बचनलाइ कुन्हुँहि निन्दा कर्बा बुन् पाउस्। 6 उहेरङ् करिहिन् जबान मानुसलकलाइ आको आत्मसंयमि भेबाक्लाइ अर्ति देउ। 7 तुँहि सेब्भ्रोउ कहिनै राम्रो नमुना बनिबानाइ आफ्निलाइ उखर्ह्वाक् आगारि देखाउ, आउँ तोरा सिच्छाइ इमान्दार, गम्भिर भेइबानाइ, 8 कुन्हुँहि निन्दा कर्बा बुन् पाउस् बाजिहिन् सहि कहिन् सिखाउ, ताकि तोहोराखर्ह्वाक् बिरोध कर्लाहारलके किच्छु बाज्बा नहिंपारिहिन् आफ्निय लाजै पोरोट्थ्ला। 9 तसौ कामारालक् आको आफ्निक्-आफ्निक् मालिकलकक् अधिनै बसिबानाइ उखर्ह्वालाइ सेब्भ्रोउ कहिनै खुसि पार्बाक् काम करुस्, आउँ उखर्ह्वा आफ्नि मालिकक्सङ्हिं मुख-मुखे बुन् लागुस्। 10 उखर्ह्वाइ किच्छु थोक् बुन् चोराउस्, तर सेब्भ्रोउ कामै पुरा बिस्वासिलो भेहिन् रहुस्। उहेसिहिरे उखर्ह्वाइ कर्ल जम्मा कामै हाम्रा मुक्ति देलाहार परमेस्वरक् सिच्छाक् सोभा बार्हाउस्। 11 किसाबुने सेब्भ्रोउ मानुसलकलाइ मुक्ति देबाक् लागि परमेस्वरक् अनुग्रह पर्कट भेल रहेला। 12 यिहे अनुग्रहै हाम्रानि परमेस्वरलाइ मन नहिंपोर्लाहार जिबन आउँ सन्सारक् थोकलकक् लालच छार्बा लागायला, आउँ यि अनुग्रहक् कारने हामि आफ्निलाइ अधिनै धरिबानाइ उ सन्सारक् सहि आउँ परमेस्वरलाइ मन पोर्लाहार जिबन बिताबा पारुहुँक्ला। 13 यहेरङ् करिहिन् हामि माहान् परमेस्वर आउँ मुक्ति देलाहार येसु खिरिस्ट महिमाइ फेरि आबाक् उ आसिकक् दिनक् लागि अस्याहिन् बसुहुँक्ला। 14 खिरिस्ट येसुइ हाम्रानि सेब्भ्रोउ पापक्भटे छुट्कारा देबाक्नि, हाम्रालाइ पबित्र बानाबाक्नि आउँ राम्रो काम कर्बाक् जोसिलो भेल मानुस बानाबाक्नि आफ्निक् पारान हाम्रा लागि देलक्। 15 तुँइ यि कहिनलक् सिखाउ तसौ पुरा अधिकारेसौ उत्साह आउँ अर्ति देउ। तसौ कुन्हुँहि तोरानि हेला बुन् करुस्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.