२ तिमोथि 2 - देवास राईखिरिस्ट येसुक् राम्रो सिपाहि 1 उहेसिहिरे मोरा पियारो छाउरा, तुँइसेहे, खिरिस्ट येसुमा भेल अनुग्रहक्भटे बल्यो भेउ। 2 थुप्रोय जेना मानुसलकक् आगारि तुँइ मोराभटे जेहे कहिनलक् सुन्ल धरस्ला, उ कहिन् तुँइ ओर्कोलकलाइ सिखाबा पार्लाहार बिस्वासयोग्य मानुसलकलाइ सोंपिदेहिखान्। 3 खिरिस्ट येसुक् राम्रो सिपाहिक् परौ भेइबानाइ तुँइ आको दुक्खइ सहभागि भेउ। 4 सेनाइ भर्ति भेल सिपाहि ओर्को कामै अलमल नाकरै, किसाबुने सेनापतिलाइ खुसि पार्बाक् कामै लाग्ल भेट्थ्ला। 5 उहेरङ् करिबानाइ खेलै भाग लेलाहारे खेलक् नियमअनुसार भाग नहिंलेबाइसौ कुन्हुँ खेलारिय आको इनाम पाबा नाप्पारेक्। 6 मेहेनत करिहिन् काम कर्लाहार किसाने बालिक् पैल्हो भाग पाबा पोर्लाहार। 7 मुँइ बोल्लो यि कहिनलकै ध्यान देउ, किसाबुने पर्भुइ यि सेब्भ्रोउ कहिनलक् बुझ्बाक् सक्ति तोरालाइ देस्ला। 8 मोर्लोक्भटे जिउँटिहिन् उठ्ल राजा दाउदक् सन्तान येसु खिरिस्टलाइ सम्झिहिन् धर। मुँइ पर्चार कर्ल सुसमाचार यिहे हो। 9 यिहे सुसमाचार पर्चार कर्लसैर्हे मुँइ दुक्ख भोग्तिहि रहम्ना, आउँ अपरारिक्परौ साङ्लाइ बाँर्हिजाइल रहम्ना। भेटौ परमेस्वरक् बचनसेहे साङ्लाइ बार्ल नाहा। 10 उहेसिहिरे परमेस्वरे चुन्ल मानुसलकक् लागि मुँइ सेब्भ्रोउ दुक्ख सहबा पारम्ना, ताकि उखर्ह्वाहु खिरिस्ट येसुक्ठालाइ रैल्ह अनन्तक् महिमा आउँ मुक्ति पाबा पारुस्। 11 यि कहिन् पक्काय हो, “यदि हामि ओक्रिहिंक्सङ्हिं मोरुहुँक्ला भेने, फेरि हामि ओक्रिहिंक्सङ्हिं जिउँटुहुँक्ला। 12 हामि ओक्राक्सङ्हिं दुक्ख भोगिगलुहुँक् बुनेमा ओक्रिहिंक्सङ्हिं राज्जे करुहुँक्ला। हामि ओक्रालाइ इन्कार करिबुने, ओउहुँ हाम्रालाइ इन्कार करैस्। 13 हामि बिस्वासयोग्य नहिंभेटौ, उसेहे बिस्वासयोग्य भेहिनेरहैस्, किसाबुने ओहिं आफ्निलाइ इन्कार कर्बा नाप्पारै।” परमेस्वरक् राम्रो सेबक 14 पर्भुक् आगारि यि कहिन् तोरा मानुसलकलाइ सम्झाहिखान्। आउँ उखर्ह्वाइ सब्दलकक् बिसइमा तर्क-बितर्क बुन् करुस्, जैहिं किच्छु फाइधा नाभेक्, तर सुन्लाहार मानुसलकलाइ नास कारायट्थ्ला। 15 लाजै नहिंपोर्लाहार आउँ सत्यक् बचनलाइ राम्रोइसौ सिखाबा पार्लाहार कामदारक् परौ भेहिन् आफ्नि-आफ्निलाइ परमेस्वरमा सुइकारयोग्य भेबाक् एकदमे कोसिस करह। 16 सन्सारक् मुर्ख कहिनलकक्भटे अलग बसह, यहिं ता मानुसलकलाइ परमेस्वरक्भटे झन्-झन् टार्हो लेगायला। 17 यरङ् सिच्छा कख्नुहुँ राम्रो नहिंभेलाहार सइनक् घाओक्परौ भेला। हुमेनियस आउँ फिलेतसक् सिच्छा आको यहेरङे रहेट्थ्ला। 18 उखर्ह्वाइ सत्य कहिनलाइ छार्ल धरट्थ्ला, आउँ मोर्लोक्भटे जिउँटो भेबाक् काम आगारिय भेहिन् सक्ल रहेला बाजिहिन् कट्का जेनाक् बिस्वासलाइ उखर्ह्वाइ खलबल्याइ देल धरेट्थ्ला। 19 तर परमेस्वरे बानाल बल्यो जग सटौघरि रहिरहेला। यछि यरङ् सब्द लेख्ल रहेलाः “पर्भुइ आफ्निक् मानुसलकलाइ चिन्ल्ह धरैस्,” आउँ पर्भुक् नाउँ लेलाहार जट्का जम्माय अधर्मक् कामक्भटे टार्होय रहुस्। 20 कुन्हुँ एक्टा धनि मानुसक् घरै सोनो आउँ चाँरिक् भाँरालक् माटेन् नाभेक्, तर काठ आउँ माटिक् भाँरालक् आको भेला, कुन्हुँ बिसेस कामक् लागि भेने कुन्हुँ साधारन कामक् लागि चालाइजायला। 21 यदि कुन्हुँ मानुसे आफ्निलाइ खाराब कामक्भटे सुद्ध पारैस् भेनेमा उ बिसेस कामक् लागि एक्टा पात्र बनैस्, आउँ घरक् मालिकक् लागि सुद्ध, काम लाग्लाहार आउँ जम्मा राम्रो कामक् लागि तियार भेइस्। 22 उहेसिहिरे जबानिक् अभिलासालक् छारह, आउँ सुद्ध हिर्दयाइसम् पर्भुक्सङ्हिं पाराथ्ना कर्लाहारलकक् सङ्सङ्हिं धार्मिकता, बिस्वास, पेरेम आउँ सान्तिमा लागह। 23 तर मुर्ख आउँ बेसमझक् बाद-बिबादक्भटे अलग्गे बसह। तोरालाइ थाहा रहेस्ला कि, यरङ् कहिने ता झग्रा माटेन् भेला। 24 पर्भुक् सेवा कर्लाहार मानुसे झग्रा कर्बा नाभेक्, तर जम्माहिलाइ दया कर्लाहार, सिखाबा पार्लाहार आउँ सहनसिल मानुस भेबा पोर्लाहार। 25 तसौ ओहिं आफ्निक् बिरोधिलकलाइ नम्र भेइबानाइ सिखाबा पार्लाहार भेबा पोर्लाहार। ओरोङ् करिबुनेमा माटेन् परमेस्वरे उखर्ह्वाक् मन परिबर्तन काराइबानाइ सत्यलाइ बुझ्बाक् मन देट्थ्ला। 26 उहेरङ् करिहिन् उखर्ह्वाक् चेत खोलिहिन् सैतानक् फान्दाक्भटे उम्कबा पाट्थ्ला। किसाबुने उखर्ह्वालाइ सैताने आफ्निक् इच्छा अनुसार चालाबाक्नि कैदि बानाल धरैस्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.