Mitiyegec 47 - Yoak kekehagocac Dzadzahac gboria nga Mitiyegec

Ngictaungo tatahau matacde

Yegecgareng yearu. Kora medacfora yeni mitiyegec yofi heigec.

¹ Ngiha ngiha sasawa, ngeni mari kpema Anutuac yegec sogac sogaigoc dendzerenggema heimibisia.

² kebu Engenatoa ye bibiagoc, ye bangectoa bangec imoac ngictautoa.

³ Ye ngiha ngiha memayunuma nenang bageu faiyunuec. Ye bangec monnunac ngicngac hanininaac bageau faiyunuec.

⁴ Yeng Yakoboac songo negendeac amma bangec imoc meisinggeu Yakobongo imoc negenu wiac engena anec. Kebungo bangec imoc maridzominggac arennu nemmeec. Selac

⁵ Anutungo sogac sogaiac arogoc kurumennu enec. kebungo trampet udumengtoagoc kurumennu enec.

⁶ Ngeni Anutuac oheha mema yegec heima eriendzong memima yegec heimibisia. Ngeni ngictaunina yaiyo kpemima yegec heimima dedengerec yegec heimibisia.

⁷ Anutu ye bangectoa bangec imocac ngictau. Ngeni yeac yegec heimima ye dengerebisia.

⁸ Anutu ye ngictau amma bangec monnunac ngicngac areng kucgoc garengyunuma kecde. Ye ngictau tataha kpetiacfu tacde.

⁹ Ngiha ngiha yeneac ngictauac medacfocngina yeni Abarahanggac Anutu yeac ngicngacfora. Nga yeni hama kpedzucnema tacgecde. Ngicngac bangectoa bangec imocac kaso amma kecandae, yeni Anutuac ngic. Imocac ye afehema afehekecbesonga.