Yona 4 - Deduamiti

Herebu nga onggoc onggongge

¹ Ifi anu Yona ye negenu mi ngereeu ngaba kuneng amma

² Kebu yofi numumiec, “O Kebu ni bangecnau kecmangoc yofi deai, ‘Faka imocnoc fingerude.’ Ni ifi negenaiac amma bic worama Tarsis imohai kembadeac negenai. Anu Anutu, ge wosoefacgagoc nga ngicngac yeneac ubaga manganeande, ge ngaba bic mi annade nga yoac dedzege amma imoc modacyombonggeannec amma memanganeyunubeso negengannec imoc waannec, ni imocnoc negenai.

³ Imocac amma ni gbori kekec wama homebadengo naric anudeac Kebu ge kekecna nearunac meickena.”

⁴ Ifi deu Kebungo yofi meremmiec, “Geac ngabaga imoc faka gombunga mi modacde.”

Kebuac icbarama

⁵ Ifi deu Yona ye taontoa wama taonggac wenac ere ereaubigeng kemma imohai tatac mong gombunga meficgema bedzo bedzo mong imohai mema imocac manau funuhau tarec. Tacmanu naso hau taontoau dafi fingeru henudeac negenec.

⁶ Anu Kebu Anutungo deu kastor icbarama mongngo fingecma yadima erema Yonaac ubaebiha menomaneudeac oruhau funuc meficgemiu Yonango icbarama imoc hemma ubangerec kuneng negenec.

⁷ Anu ama werec wereckenggac Anutungo kipac meficgeu fingecma icbarama Yona funuc meficgemiec imoc kiu ururuema dzanggeec.

⁸ Nga ama wereckenu wenac ereu Anutungo firang gerea meficgeu wenac ere ereaunac hama Yonaac oruhau yombong kpekecfu Yona ye kiwa gigiu homebeso ammiu yofi deec, “Gbori kekecacsoc mi anende, homebadengo ngereeyombonggebac.”

Anutungo ngicngac nga yang yeneac ubea manganeec

⁹ Ifi negenu Anutungo Yona yofi edeec, “Ge kastor icbarama ururuema dzanggedac imocac ngaba annec nga imocac negenna naric mi ande.” Deu deec, “Ni ngaba anduae imoc hemba ngereede nga ngabanagoc homebadengo naric anude.”

¹⁰ Ifi deu Kebungo deec, “Icbarama imoc tofocnacngoc eredac nga tofocnacngoc homedac, imoc geng mi homecdang me geng mong mi garenggena yadidac imocac ubahodung negennec.

¹¹ Anu Ninewe taontoau ngicngac yeneng kana foi mi negentegecdae yeneac kpetengina 120,000 ferahede amma donggiburumakafocngina homac kecdae. Ni yeneac amma ge annec, ifi isocngoc ubahodung kuneng negenduae.”