Yona 3 - Deduamiti

Ninewe yeneng yakasege anggec

¹ Anu Kebuac yoac Yonaaru monggoc hau atac yohockang anec.

² Ye yofi edeec, “Ge yacma Ninewe taontoau kemma yoacngina edegubade imoc dekperagiyemmedacna.”

³ Ifi deu Yona ye yacma Kebuac yoac modacma Ninewe kenec. Nga Ninewe imoc Anutuac kicfu taontoa yombong anec nga imoc tegia monnu hanahema tegia monnu kengkeng imoc wenac harebec kemma kensikeandae.

⁴ Anu ye taontoau kensikema wenac mocgusac kengkecma yofi dekperagiyemmema edeyunuec, “Uameme foti wisickemanu Ninewe yomoc kpetotiegecde.”

⁵ Ifi deu Ninewe ngicngac yeni Anutu negengsinggegec. Amma ngicngac kunennunac makecma kapia yeni sasawango yakasege anggecdeac dekperagigec kendarec. Anu yeni toruwamba heigec kemeec.

Ninewe ngictauac yoac

⁶ Nga yoacsiduc imocngo Ninewe ngictauaru kensikeu yeng imoc negemma ngictau tatahaunac yacma mama ngakpihereha siriha gombunga imoc hesifaima toruwamba heima hama kpedzucnema witiau tarec.

⁷ Amma dedekperagingic yeneng ngickunenggac yoac kpacma dekperagiyemmegec Ninewe taontoau yoac yomoc sokodarudeac edeyunuec, “Ngictau nga ngickunengfora kpaeyoac yofi deserigec, ngicngac nga ramaburumaka amma amayang habuya habuya mongngo wiac mong mi nebeso. Yeni yaka nga doku mong mi nebisia.

⁸ Amma ngicngac ngenang nga yangfocngina ifingoc toruwamba heima kecma Anutuaru heregoc yombong kpacsambic ammibisia. Tembuc tembuc sasawango faka mangana angkecdae imocac sing wama godzufakangina wayombonggebisia.

⁹ Imoc yofi gedang, ifi annideu Anutungo negen negenga meremma ebic fingecnemmeudeac deec, imoc waude gedang. Ifi anu herebuyaac gereango mi nonohobac. Ifi amma komoc kpebing.”

¹⁰ Anu yeni yoac imoc modacma manganangina sasawa imoc ngadehedacma wadacgec. Wagec Anutungo imoc hemma memeting ayemmeudeac deec imoc waec.