Yona 2 - Deduamiti

Yona ye Kebu kpacsambic ammiec

¹ Anu Yona ye kondungyanggac here manau fema Kebu Anutuya numumima

² yofi deec, “Ni hereebictoanagoc fema Kebu kpacsambic ammiba yeng imoc negemma yoacna merendac. Ni homecamaac hereau yombong fema meficnunadeac kpacguba geng ubaudumenna negendang.

³ Geng ukununa keme kemeau kemedua, ge kondunggac herea manau yombong ukununa ihai kemedua. Kemeba dokutunggbaungngo semenuu feba kondungsiriga nga siritembongga kucnginagoc sasawango kucgoc kpema neac witinau kendau.

⁴ Ifi anu yofi negendua: Kpae fainemma ni geac kicfunac meicnudau amma sifu kicna geac kpetiac womonnu monggoc fima kecbade.

⁵ Dokungo witinau semenuma kekecna mebeso andac. Wiac keme kemeango neac witinau hama semenuu kondunggac kpindzingngo orucnau mendanggedac.

⁶ Ni tiki yeneac haninginau yombong kemedua. Kemeba bangec imocac kpaeyango ngadenau bic tacma monggoc dzigec dzigeneac sinna hedzickeu nasoya nasoya ihai kecbesandua. Ammanu geng ni teng keme kemeaunac kekecnagoc menu eredang. O, Kebu neac Anutuna.

⁷ Ni bangecsebi hesibeso angfema Kebu negensidua. Ni nunumuna faiba gearu ereec, imoc kpetiac kekecgaac womong manau enec.

⁸ Nemuonga ua mong mi megecdeacsoc andae nga ngicngac goa yeni yeni hoangyunuma eweheihei ayemmeandae. Yeni Anutu memeficngicngina wosoefac ayemmeude ye wama eng kecgecde.

⁹ Ni ine ubaudumeng kunengngoc dangge edegubade. Ni sese gembade. Ni yoac deserigemma deduae imoc dedena modacma faima mesibade. Ebicfunac mesi mesi imoc Kebu ge mocgusac.”

¹⁰ Anu Kebungo kondungyangtoa edeu ye kemma Yona urunu bangec kerengau maec.