Yona 1 - Deduamiti

Kebungo Yona uayoac miu kpeec

¹ Kebuac yoac yofi Amittai medaha Yona yearu haec,

² “Ninewe taontoa kunenggac mingina yeni mangana ubanginau arenggema faka mekecdae imocngo neac kicfu ereu hendacduaeac ge yacma imohai kemma imoc dekperagiyemmedacna.”

³ Ifi deu Yona ye ine yacma Kebuac kicfunac worama Tarsis kenudeac negenec. Ifi negemma Yafo kemema wage mong Tarsis kembeso anu meficgeec. Meficgema Kebuarunac worama Tarsis kenudeac wage bummema wageu enec.

Firangtoa

⁴ Emma kemmanu Kebungo firangtoa mong kondung witiau sueu imocngo kucmadzidzic yombong kpema wage kpembarackebeso anec.

⁵ Anu wageac uangic yeni homac kengecyunuu tembuc tembuc anutufocngina yenearu memeficac kpacsambic ayemmegec. Amma wage kisang kisang efaudeac yeni finac mekenggec imoc mema wageunac miacma ukugec kondunnu kemeec. Anu Yona ye ine emu wage manau yombong kemema gau ebira feec.

Kpeing kpegec Yona heficgeec

⁶ Fekecmanu wageac uangic yeneac kaptengngo emu wagebuyau kemema meficgema yofi deec, “Ge gau nocac fenec? Ge bic yacma anutuga kpacsambic ammina yeng gedang neni naric onggonnunuu komoc kpenide.”

⁷ Anu yenaocngoc yofi denegeng anggec, “Meracac amma ebictoa yomoc fingecnemmede, imoc negennideac nenang kpeing kpeni.” Ifi dema kpeing kpegec Yona heficgeec.

⁸ Heficgeu yofi kpesimigec, “Ebictoa yomoc nocac witininau ende imoc edenununa. Amma ge noc ua mema kecannec nga ge dahacnac hanec nga ge amabangec amma ngicngacarengga damohacnac?”

⁹ Ifi degec yofi deec, “Ni hebiraiongic amma ni kurumenggac Kebu Anutu yeac kengec amma eweheimianduae yennoc kondung nga bangec kerenga meficgeec.”

¹⁰ Ifi deu negemma yeni kengec kuneng amma yofi edegec, “Ge yeac noc faka andang.” Ye Kebuarunac woraec, yeni imoc bic edeyunuu negenggecac amma ifi degec.

¹¹ Ifi dema henggec firang kpema feu kondung siritembong kuneng yombong yaru yofi degec, “Neni ge dafi anggenni kondung ye fefeaungoc febeso?”

¹² Ifi degec yofi edeyunuec, “Firangtoa yomoc neac amma ngenearu kpede, imoc negenduaeac ngeni menuma kondunnu ukunugec kemeba kondung ye fefeaungoc febeso.”

¹³ Anu firang kuneng yombong kpeecac amma wageac uangic yeneng wage kondung tegiau puri kpema wangechagecdeac uatoa mema ambibiegec.

¹⁴ Ambibiema Kebu kpacma yofi dema numumigec, “O Kebu neni ngic yomocac kekeha meickedimbeac onggonnununa mi dzonggobisina. Amma ge neni ngic kopocsiha kpac yeac sawa kpakema kopocsic meficgedimbeac amma yoacfu mi fainunubesena. O Kebu faka yomoc geac faka imocac ifi anemmena.”

¹⁵ Ifi dema yeni Yona mema kondunnu ukugec kemeec. Kemeu siritembong monggoc mi kpeec nga kondungngo fefeau feec.

¹⁶ Feu ngic yeni Kebuac kengec kuneng amma eweheimima seseyang kpema faimima ye yoac goa deserimima degec.

Kondungyang meficgeec

¹⁷ Anu Kebungo kondungyangtoa mong meficgema uayoac mima sueu hama Yona gbokoec. Gbokou Yona ye yeac here manau wenac harebec nga tofocnac harebec feec.