Yoele 3 - Deduamiti

Anutungo Isracel yeneac ngabafocngina yoacfu faiyunuude

¹ Anu Kebungo monggoc yofi dede, “Uameme nga naso imohai Ni Yehuda nga Yerusalaim me-mengere amba tatacngirau monggoc tatuckeecde.

² Amma yeni ngicngacfocna Isracel yeneac faka mangana ayemmema kporacyunugec bangec monnuu kenggec bangecna hendzicma medacgec, imocac amma bangeha bangehaac ngicngac sasawa kpedzucyunuma Yehosafata bangec tumeau wangecyunu kemema yoacngina isinggema desibade.

³ Yeni ngicngacfocna meyunugecdeac kpeing kpegec. Amma yeni sintoangac yeneac amma medacfocngina yenigoc emekpesi anggec nga waing dokuya negecdeac amma naroangfocngina sueyunukecgec.

⁴ “Anu Tiro nga Sidong taong amma Perestia bangec sasawaac ngicngac, ngeni neac noc yoac mekecdae? Ngeni wiac andua imocac turung kpougecdeac negendae me? Ngeni turunga kpounenggecdeu, Neng imoc meremba ngenanungoc haude.

⁵ Imoc yofiac, ngeni neac womonnunac silwa nga gol amma wiacna gombunga buma kuneng meickema kebungina ikohaac yeneac womonnu mekenggec.

⁶ Amma ngeni Yehuda nga Yerusalaim ngicngac meicyunuma Grik yenearu sueyunugec, yenang amabangecngina wama agac kenggec!

⁷ “Ammanu neng, ine amabangec sueyunugec imohacnac miacyunubade, amma faka anggec imocac turunga kpoungemebade.

⁸ Ni ngeneac naroang medacfocngina Yehuda ngicngac yenearu dzoac sueyunuba yeneng ihacnac monggoc Sabeaareng yenearu bangec hereau yombong sueyunugecde.” Kebungo ifi dede.

⁹ Ngeni yoac yomoc bangeha bangeha yenearu dekperagigec: Amma dzikacac ngic herengina miacgec! Dzikacac efackpefac anggec! Anu dzikdackpekpe ngic sasawango wegenacfu kemma dzikacac kasomegec.

¹⁰ Ngeni bangec hendzic hendzicac aieng kpegec kemema wasaibeang anu nga waing ic memengereac honac beang imoc kpegec kemma sangara ambeso, amma kucmama kecdae yeneng yofi debisia, “Ni dzikacngic kucnagoc!”

¹¹ Imocac bangeha bangeha ngeni noboc nobocnac bicbic hama Yehosafata bangec tumeau kpedzucnegec. Nga Kebu geangga wasaihabu yeni meyunuma imohaingoc mana.

¹² Kebungo yofi dede, “Bangeha bangeha ngicngac yeni efaima yacma Yehosafata bangec tumeau hadacbisia. Anu ni ihai tacma bangeha bangehaac tegia noboc noboc yeni desiyunubade.

¹³ Semengngo kpekpau andaeac amma kpememeac soe taima gigigec. Hagec, hama waing gbomea tipusuckegec, waing tidzoctidzohoac sobengngo mewakeu waing dokuyango enang waketorockema kpakede, ifi isoc yeneac mangananginango yadiyombonggede.”

¹⁴ Anu Kebuac isingisinggac nasotoango wegenedeac amma isingisinggac tumeatoa imohai habuya habuya kpetea kpacngo kpedzucnedae.

¹⁵ Naso imohai wenac nga afo yeri kundung kpeecde nga asomeng yeneng monggoc mi kperagigecde.

Kebungo ngicngacfora garengyunuude

¹⁶ Anu Kebungo Tsionnunac laionggac aro isoc arohoude nga Yerusalaimnunac parandanggeude ammanu bangec nga kurumeng sasawango gbigbiheude. Ifi anu Kebungo ine ngicngacfora yeneac debang amma Isracel ngicngac yeneac memeseri anude.

¹⁷ Ifi fingecmanu ngeneng Ni Kebu Anutungina kpetiac tikina Tsionnu kecduae, imoc negenggecde. Ammanu Yerusalaimngo kpetiac anude. Anu kuricngic yeneng ihai susuferecge monggoc mi anggecde.

¹⁸ “Anu naso imohai tikiu waing gboria songeagoc homacngo ereude, amma bangecbuma bisicbisicfu noningburumaka homacngo wakegec namu ebiriangoc megecde, ammanu Yehudaac kperemeng sasawa imohai dokungo nedzidarude. Anu Kebuac amaunac doku kiwagocngo ihacnac mama Akasa icac tumea meu borocboroc anude.

¹⁹ Aigita yeneng ine Yehuda ngicngac yenearu kopocsic meficgema hania kpacfu sac kpakegecac amma Aigitango kperemkpesima fekefude amma Idomngo ine kisi fingerude.

²⁰ Nga Yehuda ngicngac yeneng kecengkecgecde amma Yerusalaimgac fingecsahengo fefeseri feengkefude.

²¹ Yeni hania kpacfu sac kpakegec, imocac ni turunga kpouyemmebade. Kebu neng Tsionnu nasoya kpac kecduae!”