Yoele 2 - Deduamiti

Ipua habu kuneng

¹ Tsionnu trampet fifibisia, neac kpetiac tikiu esamubung gigigec. Bangecfu kecdae sasawa yeneng dzonong fedefede ambisia imoc yofiac kebuac nasotoango hade nga imocngo bic mewegenengunude.

² Kebuac naso imocngo kundung dzicnambac nga hoeng amma hoeng dzadzuac naso anude. Anu ipua yeneng wasai habu kunengngoc kuctoanginagoc tiki witiau Unung unungmeragiaac iroroyango sokoma maande, ifi isoc hagecde. Warac naso ifia mong mi fingerec nga dengec fingecsahe feenude, imohai mong mi fingecbesandengoc.

³ gerecngo waraima gereagoc dzeec nga imocac ngadeau borangtoa tiec. Warac ama bangec imocngo Eden ua isoc feec nga wiac sasawa kpacandacgec sendung fingerec. Fingeru wiac mongngo yenearunac mi woraec.

⁴ Ipua imoc yeni becosi isoc nga becosingo dzikacfu kenudeac yuheiyuhei kengande yeni siricngina ifia.

⁵ Nga yeneng yuma tikibuma ferahagec udumengnginango keretacac udumeng isoc amma suruac borang udumenga isoc nga wasaihabu kuctoanginagocngo dzikacac meemegec udumeng fingecande, ifi isoc fingerec.

⁶ Ammanu imohaingoc yombong bangeha bangehango kpidohogec kicbacngina meaiu hakaegec.

⁷ Ifi ammagec yeni dzikacac areng merec-merecge ngicngo nedziandae isoc nga wasaihabu kuneng yeni isoc oda modacma meme enggec. Amma yeni feracmarabaha kpac arennu yombong modacemema enggec.

⁸ Amma yenaocngoc mi heihefacfu arennu feracmarabaha kpac dindingac enggec. Nga yeni kpaea kpac socfungoc kucgoc emmegec.

⁹ Anu yeni heihefacfu taonnu kemma odau nedzima emma firang naguusing hamangecngic isoc amasoc meme enggec.

¹⁰ Naso imohai bangecngo kpemindzaheude nga kurumenga kurumenga yeneng dzonong fedefede anggec ammanu wenac nga afo yereac kperagingirango kundung kpeu nga asomeng yeneng monggoc mi kperagigecde.

¹¹ Anu Kebungo wasaifora kpetengina kpac yenigoc waraiyemmema parandanggemanu wasaihabu yeac dederecgea modacgecac amma yeni kuctoanginagoc. Ifi anu Kebu nasotoa imocngo kuneng nga bibiagoc ammanu naso imohai merang naric serima nanude?

Ubamerenggac kpakpac

¹² Imocac Kebungo yaguc yofi dekperagide, “Ngeni kiac ubahodunggoc yakasege amma heregoc yombong nearu dzigenebisia.

¹³ Amma ngeni kopocsicngina heregoc yombong deficgedacbisia nga ngakpingina witiau eng mi kpesuckebisia.” Ngeni Kebu Anutungina yearu dzigenebisia, imoc yofiac, ye ruae nga wosoefactoa mingina amma herebuya tondzera nga songo fakayango mewakewakea. Amma ye kopocsicnina wama ebicfunac mesimesinunudeac efaikecde.

¹⁴ Merang negende? Kebu Anutuninango monggoc dzigenema wosoefac anemmema kenecnunudeu wit nga baliac sese amma waing dokuac sese meminide.

¹⁵ Anu ngeni Tsionnu trampet fifima ngicngac sasawa ihai kecdae, yeneng kpetiac anggedeac yakasege, imoc dekperagibisia. Amma enara nga ngicngac sasawa ihai kecdae, ngeni kpedzucemebisia.

¹⁶ Anu ngicngac sasawa kpekpedzuc sobenu kpeturanggema yadafocngina nga nambaracfocngina amma sabac namuu kpedzucemebisia. Anu memeturanggac ngicngo ama manaya wau enembingehango ifingoc tataha wabeso.

¹⁷ Amma yofi ambisia, womonggareng Kebuac amau waraiyemmeandae, yeneng nagu nga arata botucngirau kiacma yofi debisia, “Kebu, maridzomingfocga neneac ubaga manganebeso. Nga ifi mi annadeu ngicngac goa yeneng bangeha bangeha yeneac botucfu ngadenunuma desusuic anemmema yofi degecde, ‘yeneac Anutu ye dahai?’ ”

Kebungo Yehuda gombunga ayemmeude

¹⁸ Anu yeni ubamereng anggec Kebungo bangehaac kpetiac keracmangang amma ngicngacfora yeneac wosoefac ayemmeec.

¹⁹ AmmaKebungo turunga yofi merengyemeec, “Ni wit nga bali, waing gboria amma oliwa kereha socngina ngemmeba mewakengunuude. Anu bangeha bangeha yeneng desusuic monggoc mi angemmegecde.

²⁰ “Ifi anu neng not bigennac ngabafocngina meicyunuba agac bangec gbanggegbangea kereha kpacfu kenggecde. Anu ipua habu waracwarac yeni wenac ere ereau Kondung Homemeau merucyunubade nga ngade yeneng ine wenac kemekemeau Meditereniang kondungtoau, merucyunuba ihai homegec hoac homungngina mangana yarude.” yeni wiac kuneng homac yombong megec.

²¹ Foracngoc, Kebungo faka kuneng homacngoc meecac amma Yehuda bangec ge mi kengecguu, ge songo negemma sogaibesena.

²² Kpindzingngo bangec kisiu besaima urubeacbeac andae nga ic yeni foragoc andae amma fig ic nga waing witicngo fora kucgoc endziredeac amma kateyang ngeni kengec mi anggec.

²³ Tsionggac ngicngac ngeni Kebu Anutungina yearu sogaibisia. Ye monde mondea mi fedeac amma kpeacac kiasisic ebiriangoc suede nga asomoronggac kia ngemmekecde kia imocac nasongirango warac fekefec, ifi isoc.

²⁴ Tidzactidzacmeac sobeng imoc wit nga balingo mewakedarude, nga wainggac enang imoc waing gboriaac dokuya nga oliwaac kerecngo waketorockema kpakeecde.

²⁵ “Nga kifa dafigucac manau ipuango wiacngina nedacgec, imocac turunga merengngemmebade. Imoc ipua kuneng kuneng nga ipua medaha amma ipua goa nga ipua siricngina hania hania kpetengina kpac, imoc yeni neannaoc wasaingic habuya habuya isoc ngeneac botucfu sueyunuyai.

²⁶ Anu ngeni semengngina homacngoc negebec amma Kebu Anutunginaac kpara dengeregecde. Yeng ngeneac amma faka bibiagoc homac meec nga ngicngacfora ngeneng gamekpekpeu monggoc mi enggecde.

²⁷ Ifi amma ngeneng yofi negenggecde, neng Isracelu kecduae, nga neannaoc Kebu, ngeneac Anutu, kebu mongngo ni isoc mi kecde; amma neac ngicngacngo gamekpekpeu monggoc naric mi enggecde.

Nasotoaac yoac

²⁸ “Anu imocac ngadeu, Ni Asuna ngicngac sasawa yenearu kpakebade. Kpakeba naroangmedacfocngina yeneng profeteyoac degecde nga ngickpengeng yeneng gaukpefing henggecde amma sebigborifocngina yeneng onga henggecde.

²⁹ Ammanu naso imohai Ni wanacngicngacfocna yenearu Asuna ifingoc kpakebade.

³⁰ Amma ni faka bibiagoc kurumenga kurumengau mebade nga emu bangecfu sac nga gerec amma hosuctoa fingerude.

³¹ Kebuac nasotoa imocngo kpudamuyagoc mi fingecmanu wenackiwango meremma kundung kpedarude nga afongo sac anude.

³² Nga damoc yeneng Kebuac kpac kpacgecde, yeni komockpegecde. Imocac Kebungo yofi deec; ngicngac goa Tsion tikiu nga Yerusalaimnu kecdae, yenearu yungecyungec fingerude nga ebic imocngo ine mi memayunuude. Kebungo ngicngac meisingyunuec, yenennoc komockpegecde.