Yoele 1 - Deduamiti

Ipua yeneng Yehuda bangec memanganegec.

¹ Kebuac yoacngo Petuereac medac Yoelearu haec.

² Ngicenara sasawa ngeni negenggec nga bangecfu kecdae ngeni kedzac faigec. Ngeneac nasou me esangabofocngina yeneac nasou faka ifia mong fingerec me?

³ Ngeni nambaracfocngina wiac imocac edeyunubisia nga nambaracfocngina yeneng yenang nambarac edeyunugec, yeneng nambaracfocngina nga fingecsahe ngade feenudesoc edeeme kecbisia.

⁴ Ipua sirircngina arenga arenga yeneng iwai maria neti anggec, imoc ipua kuneng kuneng yeneng waraima hama negec, negec tosea taru ipua medaha yeneng ngade hama negec. Negec tosea feec imoc ipua goa yeneng hama negec tosea engngoc feu ipua siricngina hania hania yeneng hama wiac sasawa nedacgec.

⁵ Imocac minggongngic ngeni yacma kiacgec nga waingnenengic ngeni waing kpac andeac amma songgong engenggec.

⁶ Anu bangeha bangehaunac wasai habu kuneng kpetea kpac yeneng neac bangecfu eredae. Nga yeni enacngina imoc laionggac isoc amma ngiwengngina imoc laiong ngageraac isoc.

⁷ Yeni waing icnina memanganedacma neti anggec feec nga fig icnina heimerendacgec. Amma ic sasawaac sebera kitigec ic fawango kongac kpema nangkenec.

⁸ Ngeni ngac naroangngo ewebingeha homeu yukung heima kiac ubahodung angande, ifi isoc kiacbisia.

⁹ Kebuac amaunac bali nga wit sese amma waing dokuac sese imocngo dzikeec. Imocac womonggareng damocngo Kebuac kicfu waraiyemmeandae, yeni kiacubahodunggoc kecdae.

¹⁰ Nga heikpenec sobengngo manganeu wit nga bali sasawa dzonggodacgec amma waing gboriango ifingoc dzanggeu oliwa icac kerehango kpedadanggeec.

¹¹ Anu semeng fora kpememe anggec imocngo manganedarecac amma heikpenec angandae ngeni kucmama amma songgong engenggec nga waing heihomecngic ngeni wit nga baliac ubahodung negembisia.

¹² Waing icngo gbanggedaru fig ic, icgbomea guafeng isoc nga pam amma epol ic yeneng ururuemagec sobenggac ichasa sasawango dzanggedacgec, ammanu ngicngac yeneac sogac sogainginango ifingoc kpac anec.

Ubahodunggac yegec

¹³ Womonggareng arata kiwau waraiyemmema sese meandae, ngeni yukung heima arohoma torengkpegec. Amma Anutunaac hoannu wit nga baliac sese nga waing dokuac sese faiandae, imocngo Anutunginaac amau monggoc mi faigecac amma toforecfu hamma yukunggoc kecbisia.

¹⁴ Nga kpetiac anggedeac yakasege, imoc dekperagigec amma ngeni enara nga ngicngac sasawa ihai kecdae, ngenang tembuc kpekpedzuc mema Kebu Anutunginaac amau Kebu kpacsambic ammibisia.

¹⁵ Naso imocac kuku heigec! Imoc yofiac: Kebuac nasotoango bic mewegenenunude, imoc Anutu Kuctoa Mingina yearunac kpendzengngagoc haude.

¹⁶ Semeng sasawango kicninagoc yombong kpacandaru hendimbeac nenang Anutuninaac amau kennide nga sifu songo nga sogacsogai naric mi meficgenidengoc.

¹⁷ Komocngo bangecfu kemema mi ereec amma semeng amango ameasac namma manganeec. Anu wit nga balingo dzaratanggeecac amma ameango eng namma barackema maec.

¹⁸ Anu kpindzing maria tengging sasawa kpac andarecac amma burumakahabu kuneng yeneng yakaac homema yeregegec kpac andaru arohogec nga ramahabu kuneng yeneng kpendzeng kpegec.

¹⁹ O Kebu, bangec kisiac kpindzing maria tengging imoc gerecac nenea anec nga kateac ichasa sasawa borangngo dzedarec, imocac kpacguduae.

²⁰ Nga doku dzuamagocngo dzikegec nga bangec kisiac kpindzingngo gerecac nenea anggec amma kateyang yeneng dokuac gbanggema gearu arohodae.