Ruti 1 - Deduamiti

Elimelek arengfora Mocaw kenggec

¹ Yehuda bangecfu desi desingic yeni gareng ua mema kecgec, naso imohai boditoa fingecma feec. Anu Bet-Lehem ama Yehuda bangecfu tarec, imohacnac ngic mongngo enemmedacforagoc Mocawbangecfu kifa mocgu nganoc kuric kecma dzigenegecdeac kenggec.

² Ngic yeac kpara Elimelek nga enema kpara Nacomi amma medachora kpacngira Mahelon nga Kilyon. Yeni Efrataac kisicfunac, Yehuda bangecfu Bet-Lehem amaunacngo Mocawbangecfu kemma kecgec.

³ Kecma Nacomi ewea Elimelek ye homeec. Homeu Nacomi medachoragoc yenengsac kecgec.

⁴ Kecma medachora yeri Mocawngac meyuruoc, monggac kpara Orepa nga mong Ruti. Anu yeni ihaingoc kecmagec kifangina tennganoc wisickeec.

⁵ Ifi kecma Mahelon nga Kilyon yeri ifingoc homeoc. Homeec Nacomi ye ewemedacfora kpac kefec.

Nacomi nga Ruti Bet-Lehem dzigeneoc

⁶ Ifi kecmanu, Kebungo ngicngacfora monggoc hoangyunuma yenenggareng ayemmema semeng monggoc meficgeyemmeec, siduc imoc Mocawbangecfu kenu negemma Nacomi nga erangihora yenahafocngoc Mocawbangecfunac dzigenegecdeac wiacngina sasawa mekpedzuc amma efaigec.

⁷ Efaima erangihora yerigoc bangec kecgec, imoc wama Yehuda bangecac sing imoc modacma Yehuda bangecfu monggoc dzigenegec.

⁸ Dzigenema sinnu kemma Nacomingo erangihora yofi edeyuruec, “Ngeri fingec fingec amangirau nonggohocngiragoc kecma yadioc ama ihai monggoc dzigenebesera. Amma ngeri ni nga ewehocngira homeoc, neni nenenggareng gombunga yombong anemmekefoc, ifi isocngoc Kebungo dedzegeya modacma henggareng angecmebeso.

⁹ Amma Kebungo meficnguruma ewehocngira gboria meficgengecmeu meyuruma amangirau kekec gombunggoc kecbisia.” Ifi dema titikokoc ayecmeu yereng ine arohoma kiaroc.

¹⁰ Kiacma yofi deoc, “Kpac, neri gegoc nenahafoc geac arengfocga yenearu kennide.”

¹¹ Ifi deec Nacomingo ine yofi edeyuruec, “Naroanghocna dzigenema kenec! Nigoc kefecdeac negemba naric mi ande. Ni medac monggoc meyuruba yadima ewehocngira anecdeac siriha kpac.

¹² Naroanghocna, ngeri amangirau dzigenema kembesera! Ni ngac kpengengngo ngic monggoc memeac siriha kpac. Amma ni negemba naric angana ambac dede, ni ngic gboria tofocnac yomohai mebai. Meba medac fingecbaocfu

¹³ ngeri monnu mi kekeng medac yadiecdeac yerembima yereac tomai naric mi kecbaocngoc. Naroanghocna imoc fora yombong edenguruduae. Kebungo memanuma wanuecac ubahodungtoagoc kecduae nga ngereac ebic imoc efea.”

¹⁴ Ifi deu yeri monggoc arohoma kiaroc. Kiarec Orepango erangia titikokoc ammima dzigene kenec. Nga Rutingo ine erangiaaru kpeketaheseriu Nacomingo yofi edeec,

¹⁵ “Henna, baruga ye arengfora nga nemufora yenearu dzigenede. Ge ifingoc baruga modacma dzigenena.”

¹⁶ Deu Rutingo ine yofi meremmiec, “Ni ge waguma dzigenebadeac mi hatahenenna.

¹⁷ Kennade ihai ni kembadengoc nga kecnade ihai ni ifingoc kecbade. Amma geac arengfocga imoc neac arengfocnangoc. Nga geac Anutu imoc neac Anutungoc. Anu ge dahai homenade ni ihaingoc homeba tonggonubisia. Homecngosac ni gearunac mesinuude. Wiac mongngo mesinuudeu imocac turunga Kebungo ebirangoc nembeso.”

¹⁸ Ifi dema yearu seria yombong kpeketaheec. Anu Nacomingo ifi hemma imocac yoac monggoc mi deec engsac wau yerahafocngoc kenoc.

¹⁹ Kengkecma Bet-Lehem amau kensikeec ngicngac sasawango yerenggec. Yeremma kpidohoma orommegec. Amma ama mingina ngac yeneng yeri yerensima kpesiemema degec, “Imoc Nacomi gedang.”

²⁰ Ifi kpesiemegec deec, “Neac Nacomi monggoc mi debisia. Kuc mingina yengenaoc negemmanu nearu ubahodungtoa fingerec, imocac neac kpacna Mara kpacnubisia.

²¹ Ni warac finactoanagoc kenai. Nga yaguc ine Kebungo merennuu iwaina kpac, entegeng dzigeneduae. Kebu Kuc Minginango ebic witinau faima monggoc faitobannu fainuec. Imocac ngeni Nacomi monggoc mi kpacnubisia.”

²² Anu Nacomi nga erangia Ruti yeri Mocawbangecfunac Bet-Lehem amau dzigeneoc. Nga yeri bali kpememenaso hanac hanaheau imohai hasikeoc. Nga Ruti ye ine mocawngac.