Ruka 21 - Deduamiti

Ngachotsecngo sese faiec

¹ Anu Yesungo kic fima henu ngicngac dzofinacgoc yeni sesengina Anutuac womonggac sesekatapau faigec kemeu

² ngachotsec makpekpea mongngo ewea homemea hocdzo sacsac yohockang, ifisac faiu kemeu hemma

³ yofi deec, “Foracngoc, ngachotsec yomoc ye hiedzoya kpac kecma dzo faima ngic sasawa sese faidau, imoc feracyunuma faidarec, imoc edengunuduae.

⁴ Imoc yofiac, yeni finactoangina wakema fede, imohacnac tosea mema sesengina faidau. Ngac ye ine noc wiac femidac imocnoc hafoangoc faidacma entegeng kecde.”

Anutuac womong manganebesande

⁵ Anu ngic goa yeneng Anutuac womong hoc kibia gombungango memea amma sese nga ubangerec hania haniango Anutu mikecgec, imocngo womong kibiagoc anudeac memengere anggec, imoc hemma siduc degec Yesungo yofi edeyunuec,

⁶ “Ama yomoc hensongo homac andae, imoc naso herea mi tarude. Naso mong haude, imohai ngic yeneng imoc sasawa hembarackegecde. Hembarackegec hoc mongngo monggac witiau wagec mi tacbesande.”

Yesu habesande

⁷ Ifi deu yeneng kpesimigec, “Kpoukpou, ge faka denec, imoc noc nasoac fingerude nga naso imohai noc soi fingeru hemma naso wegenede negembesandimbe, imoc edenununa.”

⁸ Ifi degec Yesungo deec, “Ngic yeneng ikocfu wangecngunubauac ngeni henghomema kecbisia. Ngic homac yeneng hama neac kpac kpacma yofi degecde, ‘Ni Messia.’ nga ‘Naso bic hadac.’ ifi degec ngeni mi modacyunubisia, kpac.

⁹ Nga ewekpekpetoa amma ubakpekpe udumengtoagoc fingeru ngeni imoc negemma kengec mi ambisia. Wiac ifia hanahema fingecbeso nga naso ine imohaingoc yombong mi kpac ambesande.”

¹⁰ Amma monggoc torokpema yofi deec, “Bangec goa yeneng ogofocngina yenigoc ewekpekpe anggecde nga ngictau monggac arengngo ngictau monggac areng yenigoc ngaba angemegecde.

¹¹ Usoctoa meude nga bodinaso nga hafei kuneng bangec monnu nga monnu ifiangoc fingeckenude. Fingeckenu bangecfu nga sawau soi hania hania fingeru hembesandae.”

¹² “Faka ifia mi fingecmanungoc yeni kpacnaac amma ngeni ngunukporac angemmema mengunuma kpekpeturanggac amaareng yeneac mariu faingunugecde. Nga yeneng witicamau faingunugec ngeni ngictau nga gawana yenearu mengunuma kenggecde.

¹³ Nga naso imohainoc neac dedekperagi yoac edeyunugecdeac sing fingecngemmebesande.

^14-15 Ni negen negentegec ngemmema yoac enacnginau faibade. Ifi amba ngabafocngina yeneac botucfunac mongngo yoac ngemmebade, imoc naric mi memaude me kpeude. Imocac amma ngeni yeneac kicfu noc yoac deni dema mi arenggekecbisia.

¹⁶ Kecma nonggomang nga dacmunafocngina amma sactoso nga ogofocngina yeneng kererengunuma ngaba yeneac mariu faingunugec ngenearunac goa yunuhomegecde.

¹⁷ Neac kpacnaac amma ngicngac sasawango ubango ukungunugecde.

¹⁸ Nga ngeneac orucnginaunac orucdzongina mongngo ine naric mi sufuude.

¹⁹ Ngeni seriangoc namma kekecngina onggonggebesandae.

Yerusaleng manganebesande

²⁰ Wasaingic habu yeneng hama Yerusaleng oronggegecde, naso imohai ngeni yofi bic negenggecde, taong manganeudeac naso bic hade.

²¹ Imohai ngicngac Yudaia bangecfu kecdae, yeni worama tikiu embisia nga Yerusaleng taong manau kecdae, yeni worama ngadeau kemebisia amma ngadeau kecdae, yeneng Yerusaleng manau mi embisia.

²² Naso imoc turung kpoukpou naso anude. Imohai yoac sasawa oho ohoya fede, imocac fora fingecbesande.

²³ Naso imohai ngac heregoc kecdae nga nenggac sabac namuu meyunukecdae, yeni ebicnginagoc anggecde. Bangec yomohai ebic kuneng fingerude nga bangecac ngicngac witinginau ngaba fingerude.

²⁴ Nga ngaba yeneng dzikacac beangngo ngic noboha yunuhomema noboha witicyunuma bangeha bangeha meyunuma kemma faiyunugecde. Amma bangeha bangeha ngicngacareng Anutu mi negemmidae, yeneng hama Yerusaleng haninginango tima kecmagec nasongina dedea, imoc wisickeu kenggecde.

Ngicac Medacngo habesande

²⁵ Naso imohai wenac nga afo amma asomeng yenearu soi fingecbesande. Nga bangeha bangeha ngicngac yeni ubaebic mema kondunnu namma kondung tembonggac udumeng negemma negengyohoc amma dafi ambesonga obohogecde.

²⁶ Ebic imocngo bangecfu fingerudeac ngicngac yeni imoc negemma negengyohoc nga kengec amma homecgboric anggecde. Sawau kuc sasawa yeni kockpac anggecde.

²⁷ Anu naso imohai yeni Ngicac Medac henggec ye kuctoayagoc nga kibikperagitoayagocngo hoeng witiau haude.

²⁸ Faka imoc fingecbeso ammanu ngeni kpehengaima yacma orucngina miacma nambisia. Naso imohai ebicfunac mesingunugec enggecdeac naso wegenebesande.”

Fig ic hembesonga

²⁹ Anu Yesungo yoac mong heima yofi edeyunuec, “Ngeni fig ic nga ic sasawa hemma negembisia.

³⁰ Ic yeni maringina besaiudeu wenac naso wegenede, imoc ngenaoc bic negenggecde.

³¹ Ngeni wiac sasawa deduae, imoc fingeru hemma ifingoc yofi negembisia, Anutuac eucerereng bic mewegenengunude.

³² Foracngoc, ngicngacareng yomoc, yeni mi homemagec wiac yomoc fingecdarude, imoc edengunuduae.

³³ Bangec nga kurumeng, yeri kpac anecde nga neac yoac imoc naric mi kpac ambesande.

³⁴ Ubasufu nga dokunene amma bangecac negengyohoc imocngo meebiringunubauac ngeni garengngina meemebisia. Wenac imoc utac fingecngemmebacac.

³⁵ Wenac imohai subango yang kpeande, ifi isoc bangectoa bangec imohai hama ngicngac sasawa yenearu fingecdarude.

³⁶ Imocac ngeni nasosoc garengemema kecma nunumu ua mekecbisia. Mekecma wiac sasawa yomoc fingecbeso ande, imohacnac woragecdeac kuc mema Ngicac Medac, yeac kicfu serima nambesandae.”

³⁷ Yesungo naso imohai wenacsoc Anutuac womonnu kpoukpou ua meec. Mema kecmanu ama marai anu tiki mong kpara Oliwa, imohai kenu toforeu takefec.

³⁸ Wereckenu ngicngac sasawa yeneng Anutuac womonnu yeac yoac monggoc negenggecdeac kengkecgec.