Owadya 1 - Deduamiti

Kebungo edomngicngac memayunubesande

¹ Kebu kpara Kebungo edomngicngac yenearu noc faka fingecbesande imoc profete Owadya edzaheu hennegeng anec. Amma nenang Kebuac yoac imoc yofi negening ye siduc dedea sueu ngicngac bangec noboc noboc yenearu kemma yofi dekperagiyemmeec, “Ngeni efaima yacgec kemma edomngic yenigoc yare miacni.”

² Negendae, Kebungo Edom yoac yofi dema edede, “Ni bangec noboc noboc yeneac botucfu kuc hesihesi anggemba kucga kpac ammanu seuc isoc ukugugecde.

³ Ngeni wi hofe kebangau kedzebeac singau ifi isoc tacma ine ubaherenginau yofi negengandae, ‘Mongngo naric mi kpedzinunuu kperemennu kemenide.’ Imocac yofi edengunuduae, imoc ngeni sebiengengnginango tobangngunukecde.

⁴ Ngeni hasaukpesac neng isoc kpututucke sawau wi yombong emma amagerecngina asomeng yeneac botucfu megecdeu neng sifu kpedzingunuba madacgecde.”

⁵ Kebungo monggoc yofi dede: Hamangecngic yeneng tofocnac amagau erema noc wiacac songongina angkecde imocsac megecde nga waing uameme ngic yeneng wainggbomea mesima goa ferahagecde.

⁶ Amma Esawac bangecfora ngeneac hiedzo sufu sufuya imoc ine sasawa kpedzamma medacgecde.

⁷ Amma gegoc dzadzahacngina urec feec imoc yeneng bangecnginaunac meicngunugec bangecnginaac kpete wama ferahema ngadeau kemema faingunugecde. Amma bangec goa yeni ngenigoc ruaegoc kecgec yeneng tobangngunuma dzikacfu serima feracngunugecde nga tosofocngina ngenigoc yaka urec negec yeneng botac faingemmegec naric mi negentegecgecde.

⁸ Ni naso imohai edomngicngac negen negentegecnginagoc yeni kpetotieyunudacbade nga Esawac sifecfunac ngicngac yeneac negen negengngina meickebade.

⁹ Anu Temanggac dzikackpekpengic yeni kerectegec anggecde amma Edomgac wasaingic yeni sasawa yunudacbesandae.

Edom yeneac memetinggac hania

¹⁰ Ngeni namafocngina Yacakowac bangecfora kpenggodzu hania hania ayemmegecac amma game witinginau takefude. Imocac kpacngina dzuacba monggoc mi febesande.

¹¹ Bangec monnunac yeneng Yerusalaim odanagutoa ferecge emma hiedzogedangngina mema emekpesi amma mekem meha anggec naso ihai ngeni sebi heima ihoc bahoc anggec. Ifi amma ngaba yeneac tosofocngina isoc anggec.

¹² Ngeni namafocngina yehudangicngac yeneac naso manganau ngeni feac feac anggec. Amma ngabafocngina yeneng amabangecngina memanganegec ngeni naso manganggac ebic imoc hemma sogac sogai nga dearogoc dzomoreyemmegec. Faka ifia imoc mi anganggacsoc anggec.

¹³ Amma ngicngacfocna yeneac ebicnasou ngeni amabangecnginaac odanagu ferecgema emma sogac sogai meficgema dzofinacngina mi wangecyunubau debacfu ngereebac.

¹⁴ Ngeni ebic nga kpendzengnasonginau sing eacdapeu namma Yehuda worabeso ammagec yeni meyunuma ngaba yeneac mariu mi faiyunubau debac imocngo ngereebac.

Anutungo bangec isinggebesande

¹⁵ Kebuac nasotoango ngiha ngiha mewegenengunuude. Edom ngeni faka anggec faka siriha imocngoc ngenearu fingerude. Amma angammemengina imocngoc monggoc ngenang witiu dzigenengemmebesande.

¹⁶ Amma Yehuda ngeneng kpetiac tikinau memetinggac doku negec ifi isocngoc bangeha bangehaac ngicngac sasawa yeni ifingoc ayemmeba memetinggac doku nema ubangina gogoema mau kpac andacbesandae.

Isracel yeneac firang naso fingecbesande

¹⁷ Anu goa worama Tsiontikiu enggecde. Amma bangec imocngo yeneac kpataning bangec ambesande. Ammanu Yacakowac areng yeni bangecngina monggoc tigec enude.

¹⁸ Anu Yacakowac areng yeneng gerec isoc anggecde amma Yosefac areng yeneng gerecborang isoc borang tigecde nga Esawac areng yeneng kpindzingmaria dzanggedzangea isoc ammagec Yacakow nga Yosefac areng yeneng dzemusungyunuma yonohodacgec mongngo mong komoc mi kpebesandae.

¹⁹ Yehudaac foecbangecfu kecdae ngeni Edomgac sifecbangec megecde. Nga sepelangic yeni pelistingic yeneac kondungbangec tumia fede imoc tigec enude nga isracelareng yeni Efrayim nga Someronbangec megecde amma Benyaminggac areng ngeni Gilecadbangec mebesandae.

²⁰ Isracelac arengfora yeni bangec kurihau meyunu kenggec imoc yeni monggoc bangecnginau dzigenema dzikac kpema Tsarefat bangecac kpete fede imoc torokpema tigec enude. Amma Yerusalaimgac arengfora ifingoc kuric meyunu kenggec. Tsarefat bangecfu kecdae yeni dzigenema Negewbangecfu taong fekende imoc tigec enude.

²¹ Amma Isracelngicngac ngabaunac mesiyunugec yeneng Tsiontikiu emma ihai tacma Edombangecac sifec garenggebesandae. Garenggegec ngictau ua imocngo Kebuac ambeso.