Nehemia 9 - Deduamiti

Isracelareng yeneng kopocsicngina deficgegec

¹ Anu afo imocac uameme 24 imohai Isracel ngicngac yeni kpedzucnema yakasege amma yukung heima mateng nadzicma tacgec.

² Amma Isracel ngicngac yeni bangec monnunac ngicngac yenearunac kperectegecma namma yenang nga esangabofocngina yeneac kopocsic deficgedacgec.

³ Deficgema nammagecngoc Kebu Anutunginaac singyoac kibi imoc aua harebecac manau osogec. Osoma aua harebec mong imocac manau koposicngina deficgema Kebu Anutungina dengeregec.

⁴ Lewiareng yeneac kandzeu Yesuha, Bani, Kadmier, Tsebania, Buni, Tserebia, Bani nga Kenani yeneng namma kunengngoc arohoma Kebu Anutungina kpacsambic ammigec.

⁵ Anu Lewiareng kpacngina; Yesuha, Kadmier, Bani, Hatsabanie, Tserebia, Hodia nga Tsebania amma Petahia yeneng degec: “Yacma Kebu Anutungina dengeregec. Ye nasoya kpac kechereema kecbesande amma kpara imoc kibikperagiagoc nga engena kenehagoc, imocac dengereni.

⁶ Ge mocgungo KEBU, geng kurumeng nga sawau asomeng amma angero habufocnginagoc meficyununec. Amma bangec nga bangec witiau wiac fekende nga kondung amma kondung manau wiac sasawa fedacde imoc meficyunudacnec, ge mocgungo wiac sasawa kekec yemmeannec. Anu kurumennu angero habuya habuya yeneng dengeregu kecdae.

⁷ Ge Kebu nga Anututoa, geng Awram meisinggema Babilong bangec mong Ur imohanac wangecma hama kpara Awraham minec.

⁸ Amma ye here nengennegenga hafoangoc gearu feecac geng imoc henna ngereeu Kenacangareng, Hitiareng, Amoriareng, Peridziareng nga Yebuareng amma Gilgarareng, yeneac bangec sasawa imoc esamedacfora yemmenadeac yegoc dzadzahac menec. Ge dzadzahacga imoc modacnec amma geac fakaga imoc dindingac.

⁹ Ge Aigita bangecfu neneac esangabofocnina yeneac kpendzengngina hennec amma Kondung Sacsacfu kiacngina negennec.

¹⁰ Amma Aigitangic yeneng ngicngacfocga wicgiric ayemmegec geng yeni memayununec. Amma Pareco nga uangicfora amma bangec imocac ngicngac yenearu faka morora nga bibiagoc menec. Imoc ge geanggaoc kpac kunengga mekperagiemenec, imocngo yaguc fedengoc.

¹¹ Geng kucfakaga mena kondungngo tohomanu ngicngacfocga yeni bangec gbange gbanggeau ferecgegec. Ammanu Aigita yeneng ngadenginau kisangyunuma hagec, geng kondung dzongiau merucyununa hocngo dokudzohonnu kemeandae isoc kemegec.

¹² Hadzinnu hoeng manau tacma waraiyemmenec nga tofocnacfu gerecborang manau tacma sing kenggecde, imohai waraiyemmema edzacyunukecnec.

¹³ Ge kurumenunac Sinai tikiu mama dedeseriyoacga, nonoyoacga nga singyoacga fora nga gombunga amma dederecgeyoac dindingac imoc edeyununec.

¹⁴ Ge kpetiac nasoga Sabata, imocac nonoyoac nga singyoac nga dederecgeyoac imoc uangicga Mosearusing yemmenec.

¹⁵ Amma yeni yakaac homegec geng kurumennunac yaka yemmenec nga dokuac ayemmeu geng hocfunac doku gumecyununa negec amma bangec yemmenadeac deserinec, imoc kemma megec.

¹⁶ Amma esangabofocnina yeneng ine sebiengeng nga ubaseri amma geac dederecgeyoac mi modackecgec.

¹⁷ Nga geng faka kuhagoc yenearu menec, imoc nigecyunuu ubaseri amma yenang songou sebiengenggoc enara meficyunugec. Amma enara imoc yeneng waraiyemmegec Aigita bangecfu wanac uau kecgec, imohai monggoc dzigenegecdeac negenggec. Anu geng ine kopocsic wawa nga ruaetoa amma wosoefacac Anutu nga herebuga tondzera amma songo fakagango mewakewakeguya, imocac amma ge mi ngadeheyununec.

¹⁸ Yeni ubanginaac netohoma golngo burumaka ongea mema yofi degec, ‘Yomocngo neneac anutu. Yennoc Aigita bangecfunac wangecnunu haec,’ Dema faka wonongagoc eweheiheiya kpac anggec.

¹⁹ Ammanu ge ruaetoaga engenaac amma bangeckisiu mi wayununec, geng ine hadzinnu hoeng manau tacma mi wayununec nga toforecfu, sing kengkengnginau gerecboranggac kperagiau tacma mekperagiyununa kengkecgec.

²⁰ Ge Asuga gombunga yemmena dederecge ayemmeec. Nga mana yakaga mi segereyemmenec amma ubangina gbanggeu doku yemmenec.

²¹ Anu kifa 40ac manau bangeckisiu kecgec, imohai wiac monggac mi kpedadanggegec. Ngakpikporucnginango mi dzameec nga haninginango ifingoc mi yadiec.

²² Geng bangeha bangeha ngictaufocnginagoc nga ngihangiha amma bangec tegiaac kpete fedacde yemmenec amma Sihong bangec, Hesbonggac ngictau nga Og bangec amma Basanggac ngictau yeni ifingoc memayunuma yeneac mariu faiyununec.

²³ Ifi amma nambaracfocngina mesaheyununa sawau asomeng isoc sahegec nonggomangfocngina bangec megecdeac deseriyemmenec, ihai wangecyunu enec.

²⁴ Ifi anna nambaracfocngina yeneng bangec imoc tigec enu geng Kenacangngic bangec kecgec, imohai yeni memayunuma ngicngac nga ngictaufocngina yenahafoc yeneac mariu faiyununec, ifi amma imocngo herengina ferahanec.

²⁵ Anu taong oda seriango memea nga bangec kerehagocfu wangecyunu enna yeni amagerecngina imohai minginasoc kemme hame anggec. Amma wiac gombunga gombunga sasawa feec, imoc ifingoc megec nga dokuteng bic usuusuya nga waing ua amma oliwa ic nga ic gbomeagoc haniahania homac imoc sasawa tigecenu menec amma geac gombung imocac manau nesogai anggec.

²⁶ Anu yeneng ine ifi ammaguc yoacga kpema ngadegugec nga singyoacga uba ngadenginau faiandae. Amma faka wonongagoc eweheiheiya kpahac amma Profetefocga yeneng ubangina dzigeneudeac goroyoac edeyunugec, yeneng imoc kpebucyunudacgec.

²⁷ Anu geng ngabafocngina yeneac mariu faiyununa yeneng meenti memati ayemmegec. Ifi amma meficyununadeac kpacsambic anggenggec geng kurumennunac kiacngina negemma onggong-onggongngic meisingyununa yeneng ngabafocngina yeneac mariunac mesiyunugec.

²⁸ Anu yeneng tacngisigec mi hereemanu geac kicfu faka damocngo mangana ande, imoc monggoc anggec. Anu geng ngabafocngina yeneac mariu faiyununa yeneng garengyunukecgec. Ifi ayemmegec yeni gearu kiacgec geng kurumennunac kiacngina negemma ubamangangga hafoa fedeac amma nasoya nasoya onggongyunukecnec.

²⁹ Nga ge singyoacga ngadehebauac gorongina kpenec ammanu yeneng ine ubaseri amma dederecgeyoacga mi modacgec. Nga yeni dedeseriyoacga bic dedea feec, imohai kopocsic meficgegec. Amma yeneac botucfunac yoacga modacgec yenengsac kekec gombung meficgegec. Nga ubaseri amma ngadegugec, yeni dzingfong kpema geac yoacac kedzac mi kpegec.

³⁰ Anu geng kifa homac yumiau tomaingina kecnecac amma Asugango profete yeneac enacfu yoac faiu gorongina kpemagec yeneng sifu yoacngina mi negenggec. Ifi anggec geng ngicngac wegenac kecgec yeneac mariu faiyununec.

³¹ Anu ge wosoefac nga ruaeac Anutu, imocac ubamangang ayemmema mi ngadeheyunuma meicyununa homedacgec.

³² Anutunina ge Anutu engenatoa amma kuctoagagoc nga damudamugagoc amma ge dzadzahac mema songoga edzacnunuannec. Imocac ge ngictaufocnina, enarafocnina, womonggarengfocnina, profetefocnina nga esangabofocnina amma ngicngacfocga sasawa Asiriaac ngictau yeneac nasounac erekecma yaguc ebic sasawa fingecnemmede, imoc hemma meficnununa.

³³ Nga wiac sasawa imoc fingecnemmeec, naso imohai ge fakaga dindingac modacma garennunukecnec nga neneng ine mangana haniahania angkefing.

³⁴ Ngictaufocnina, enarafocnina nga womonggarengfocnina amma esangabofocnina yeni geac singyoacga mi modacgec. Yeni geng singyoac hafoangoc modacgecdeac edeyununec, imocac kedzac mi kpema dedeseriga imocac gorokpenec, imoc wagec.

³⁵ Amma yeni bangec kerehagoc yemmenec imohai geac gombung manau nesogai amma kecgec. Ifi amma ewega mi heigec nga fakangina mangana imohacnac uba dzigecdzigene mong mi anggec.

³⁶ Anu geng esangabofocnina yeni wiac nenea gombunga nema kecgedeac bangec kerehagoc yemmenec nga neneng ine yaguc bangec yomohai yeneac wanacngic amma kecdimbe.

³⁷ Anu nenang kopocsicac amma ngictau damoc yeneac bageu kecdimbe, yenearu semeng endzira kengande. Ifi anu yeni yenang songo modacma nenang sebi kpehenninau nga burumakafocnina sicsauc anemmegec kpendzeng imocac manaungoc kecdimbe.”

Ngicngac yeneng ubamocgu anggec.

³⁸ Haifaka imoc sasawa hennegeng andacma neni dzadzahac mong mema kibiu faima meseriing. Ifi amma imoc ohoma ubamocgu amma faini enarafocnina nga Lewiarengfocnina amma womonggarengfocnina sasawango memeseriac kpeteago faima mendanggegec.