Nehemia 8 - Deduamiti

¹ Ifi amma ngicngac sasawa yeni Doku Naguu ihai adzoc adzoroho sobennu hama kpedzucnedacma habu mocgu anggec. Amma singyoacac kpoukpou Edzera ye Isracel yeneac singyoac KebungoMosearu faiec, kibi imoc mehaudeac edegec.

² Anu afo sewengac uameme hanac hanaheau ngic nga ngac amma damoc yeneng naric negengtegecgecde, yeni hama kpedzucnemagec womonggareng Edzerango singyoacac kibi imoc yenearu mehaec.

³ Mehama kiwa Doku Naguugeng fima ngic nga ngac sasawa amma damocngo naric negen tegecgecdeacsoc andae, yeneac kicfu namma ubia miacma kunengngoc osoec. Ye asoacngoc hanahema osokecmanu wenackiwa merenec. Anu ngicngac yeni singyoacac kibi imohai kedzac gombunga yombong faigec.

⁴ Singyoacac kpoukpou Edzerango kandze mong kpougec imocac witiau emma nanec. Yeac foiyau bigeng imoc Matitia, Sema, Anaia, Uria, Hirkia, Maseia, yeneng nanggec nga kanayau bigeng ine Pedaia, Miser, Markiya, Hatsum, Hatsbadana, Dzekaria nga Mesurang yeneng nanggec.

⁵ Anu Edzera ye kibi mema kandze witiau nanecac amma ngicngac sasawango kibi kparatiu hemma imohaingoc yenahafoc yacma nandacgec.

⁶ Ifi nandacmagec Edzerango KEBU Anutu Engenatoa dengereec. Dengereu ngicngac sasawango maringina miacma ningkpedacma, “Imoc Fora! Imoc Fora!” Dema yenahafocngoc KEBU dengerema ngonducnema kicngina bangecfu hetutuckedacgec.

⁷ Ifi amma nammagec Lewiareng yenearunac Yesuha, Bani, Tserebia, Yaming, Akub, Tsabetai, Hodia, Maseia, Kerita Adzaria Yodzabad, Hanang nga Peraia yeneng singyoacac hania ngicngac monggoc dekpou ayemmegec.

⁸ Yeni Anutuac singyoacac kibi osomasoc hania deireckeyemmegec, ifi anggec ngicngac yeni singyoac osogec imocac titiha negentegecgec.

⁹ Ngicngac yeneng negentegecma wosongina homac heihodungaiu kiac ubahodung anggec, gawana Nehemia, womonggareng nga singyoacac kpoukpou Edzera nga Lewiareng yeneng yofi edeyunugec, “Uameme yomocngo Kebu Anutuninaac kicfu kpetiac andeac amma ngeni kiac ubamangang mi ambisia.”

¹⁰ Anu Nehemiango yofi edeyunuec, “Uameme yomocngo Kebuac kicfu kpetiac andeac amma ngeni kemma semengngina nga waing songeagoc nesogai anggec. Amma ngicngac damoc yeneng semengngina memengere mi anggec, yeni yemmegec negec. Ngeni imocac ubamangang mi ambisia. Kebuac sogacsogai imoc ngeneac kucngina.”

¹¹ Anu Lewiareng yeneng ifingoc ngicngac herengina mengisima yofi edeyunugec, “Uameme yomoc kpetiac, imocac ngeni ubahodung homac mi ambisia.”

¹² Anu ngicngac yeni singyoac osoma negentegecgecac amanginasoc kengha amma nenedokungina songogoc nesogai amma tosea ngicngac kpedadanggegec yeni yemmegec negec.

¹³ Anu afo imocac uameme yohockanggac ngadeau amamanasoc oruha nga womonggareng amma Lewiareng yeneng singyoacac kpoukpou Edzerango singyoac monggoc kpouyemmeudeac yearu kenggec.

¹⁴ Amma Kebungo Mosearu singyoac yofi faiec, afo sewengac hombang nasou, Isracel yeni bedzobedzo mema imohai tacdacbisia, imoc hennegeng anggec.

¹⁵ Anu yeni imohaingoc yoac yofi deyadigec taongnginasoc nga Yerusalaimnu kenec, “Ngeni Sifec bumau emma singyoac kibiu oho ohoya fede, imoc modacma bedzo bedzo menideac oliwa fawa nga kate oliwa, dzundzuang amma pam maria nga ic maria sabeagoc memabisia.”

¹⁶ Anu ngicngac yeni kemma ic fawa mehama amangina witiau nga ama sobengnginau amma Anutuac womonnugeng bedzobedzo megec. Mema goa kpekpedzucac sobennu megec nga Doku Nagu imocac tegiau amma mong Efrayimgac Nagu hoangau ifingoc megec.

¹⁷ Ngicngac witicuaunac dzigenegec yeni ine hafoangoc bedzongina mema ihai kecgec. Yosuha Nunggac medac yeac nasou, Isracelareng yeni nesogai kuneng ifia mong mi megec.

¹⁸ Anu Edzerango uameme hanahegec ihacnacngoc Anutuac singyoac imocac kibi imoc osoyemmekecmanu uameme sewennu wisickeec. Anu uameme 8 imohai singyoac modacma kpekpedzuc kuneng megec.