Nehemia 6 - Deduamiti

Nehemia memanganegecdeac dedzege anggec

¹ Anu Arabngic amma ngabafocnina yeni neng oda memengere anai, imoc titinga mong mi nande nga nagusac mi faifaiya, yoac imocngo Sanbalat, Tobia nga Gesem yeneac kedzacfu kemeec.

² Kemeu Sanbalat nga Gesem yereng memanganenuecdeac negemma yoac yofi fainenoc: “Ge hana Ono tumeaac ama areng mong tacde, ihai ewacbisina.”

³ Ifi deec, neng yoackisang yoac turunga yofi merengyemerai: “Ni ua kuneng garenggeduaeac amma ngenearu mabadeu, uangicfocna yeni ua wagec feude. Imocac ni ngenearu mi mabade.”

⁴ Deba yereng yoac siriha imocngoc faikefec atac 4 anec. Anu neng yoac faiec, imocac turunga merengyemmerai ifi isocngoc merengyecmekefai.

⁵ Kecma atac 5 imohai Sanbalatngo uangiha yengena wegenac kecande, ye kibi siriha imocngoc mima nearu sueec. Nga kibi mehaec, imocngo ine sangoya kpac.

⁶ Kibi imocac manau yoac yofi oho ohoya feec, “Bangeha bangeha yeneng yofi degec Gesemngo imocac hepuc andac. Ge Yehudaareng yeneac ngictaungina ambesonga annec, imocac ngeni oda memengere amma here miacmiac anemmedae.

⁷ Amma ge profete meisingyununa yeni Yerusalaimnu kemma geanggac negemma ‘Ngictau mong Yehuda kecde!’ Yoac imoc dekperagigec nga imocngo ngictauac Atadzeksisac kedzacfu kemebacac amma ge bic hana nenang yoac imoc desorongaini.”

⁸ Ifi hemma neng yoara turunga yofi meremmiai, “Nenearu faka ifia mong mi fingecdac. Ge yoac imoc geangga momoronnunac denec.”

⁹ Ngic imoc yeni yofi negenggec, “Nenang ifi dema dekengec ayemmeni ua imocac kucmama amma wagec febeso.” Anu neng ine yofi numuyai, “Anutunina ge meserinununa.”

¹⁰ Anu uameme monnu Deraiaac medac Mehetabe esea Semai, ye amea mi wawa nagu heihei tarecac amma ye hembesonga kenai. Kemba yeng yofi edenuec, “Ngic yeneng kpebucgubeso tofocnacfu hagecdeac amma nerang Anutuac amau emma womong naguya heima ihai sufubisira.”

¹¹ Deu neng yofi deai, “Negenna ni ngicenango dafi nedzinima Anutuac womonu emma sufuma kekecna onggonggebadeac denec? Imoc naric mi yombong ambade.”

¹² Ifi demaguc yofi negentegerai, Anutungo ye mi sueec, Tobia nga Sanbalat yereng ni kererenuudeac bung mioc.

¹³ Imoc yofiac, Semaingo seriyobonggema deu neng yeac yoac negemma womonnu emma kopocsicgoc ambade nga kpacna memanganeba memanugecde.

¹⁴ Ifi negemma yofi numuai: O Anutuna, ge Tobia nga Sanbalat yeri noc faka andaoc imoc negensina. Amma profete ngac Noadia nga profete sasawa goa yeni kengec meficgenengkecgec, imoc ifingoc negensibesena.

Oda wisickeec

¹⁵ Anu odango uameme 52ac manau afo kpaka imocac uameme 25, imohai wisickedarec.

¹⁶ Anu ngabafocnina sasawa nga bangec noboc noboc neneac wegenac tackenggec, yeni Anutuninango meficnunumanu oda medaring yeneng imoc negenggemma damuyunuu kerectegec anggec.

¹⁷ Amma naso imohai Yehuda yeneac ngic kiwa yeneng Tobiaaru kibi homac faigec kengkefecc. Anu Tobiango turunga ifingoc merengyemmekefec.

¹⁸ Anu Araac medac Sekaniaac kpegea Tobia, yeac medac Yehohanango ine Berekiaac medac Mesuranggac naroang meec, ifiaac amma Yehuda yeneng Tobia wiac goa migecdeac deserigec.

¹⁹ Imocac Yehudareng yeneng Tobiaac fakaya gombunga imocac siduc anenggec nga neng yoac dekefai, imoc kemma Tobia edekecgec. Anu Tobiango nearu dekengec kibi homac faikefec.