Nehemia 5 - Deduamiti

Nehemiango makpekpea meficyunuec

¹ Anu ngicngac homac yeneng iwaiac kpekpedadang amma Yehuda dacmunafocngina yeneac negenggec naric mi anu kunengngoc dekiac anggec.

² Ifi anggec goango degec, neni nambaracfocnina seregurutoa nga hereninaac homebinggac amma bali gbomea nemmebisia.

³ Ifi demagec goa yeneng degec, neni bodi nasou turung aninggac amma waing uanina nga heikpenec bangecnina imocngo turunnina imoc kpounide.

⁴ Degec goango ifingoc degec, neni ogotosofocnina yenearunac hiedzo mema heikpenec sobennina nga waing uaninaac takesi ngictauaru fainide.

⁵ Anu yeni ine nenang ngicdaramunafocnina nga sactosofocnina nenang bangec areng mocgungoc andimbe nga nenang nambaracfocnina imoc yeneac isocngoc. Nga nenang kucnina kpacac amma heikpenec bangec nga waing uaninango yeneac anec. Amma faka ifiau nenaoc naroang nga medacfocnina wanac bic meyunuing nga naroangfocnina sueyununi sebinginango hiedzo kirecgeec.

⁶ Anu yeneac dekiacngina imoc negemba imocngo herebu kuneng meficgenenec.

⁷ Ifi anu ni negen negentegecgoc henanggema ngickiwa nga garengenara yeneng faka anggec, imocac yofi dema edeyunuai. “Ngeni ine ngenang sactosofocngina yeneng turungngina witiau monggoc faima kpoungemmegecdeac demakecdae!” Ifi dema ebic imoc mengerenideac adzocadzoroho kuneng meing.

⁸ Mema ngickiwa nga garengenara yeneac yofi deai: “Nenang ua kuneng mema, Yehudaareng sactosofocnina mikic yenearu dzoac amma sueyunuing, imoc yeni monggoc bummeyunuing. Anu ngeni yaguc sactosofocngina yenearu sueyunugec yeneng nenanggaru monggoc sueyunugecdeac dedae me.” Ifi deba yoac hofocgecac amma yoacngina dugungkpeec.

⁹ Ifi anggec yofi torokpeyemmeai, “Ngeni faka andau, imocngo naric yombong mi ande nga mikicfocnina yeneng deendema mi anemmegecdeac ngeni Anutuninaac kicfu eweheiheigoc naric kecbau me?

¹⁰ Ni sactosofocnagoc amma uangicfocna neni ngicngac wayununi nenearunac dzo nga bali turung anggec. Imocac nenang turungngina witiau faima kpougecdeac yoac mi debisina.

¹¹ Amma ngeni yaguc yombong heikpenec sobengngina nga waing uangina amma oliwa nga amagerecngina imoc sasawa monggoc merengyemmebisia. Amma imocngo dzo kirecgeu, bali, waing gboria nga kerec tosea torokpema mekecgec, imoc hafoangoc merengyemmedacbisia. Anu yeni dzo me waing me wit me oliwa kereha imocngo turung mi kpoubisia.”

¹² Ifi deba yeneng yofi degec, “Neni monggoc merengyemmenide, amma turunggac yoac yenearu monggoc mi denide nga geng denec ifi isoc andacnide.” Degec ni womonggareng kpacyunuba hama, yeneac kicfu dzadzahac imoc modacgecdeac deserigec.

¹³ Anu ni tiging kebannaunac mesima gigiba mau yofi deai, “Mongngo dedeseri yoac dema mi tofohoudeu Anutunngo ifinoc kpemindzaheu amagerecha kpacanu sobengasac ambeso!” Ifi deba ngicngac sasawango dendzerenggema degec, “Imoc Fora!” Ifi dema Kebu dengerema dedeseringina imoc modacgec.

¹⁴ Amma imocsac kpac, ngictau Atadzeksingo ngictau anecac kifa 20 ammanu ni Yehuda bangecac gawana fainugec kifa 12 kefai. Anu Atadzeksingo ngictau kecmanungoc kifa 32 anecac amma kifa botuc imohai ni uangicfocnagoc neni gawana semeng yemmeandae isoc neni mong mi nemmegec.

¹⁵ Nga warac gawana keceregec yeni ine ngicngac yenearunac waing nga semeng amma silwa dzo 40ac torokpema mema ngicngac ebic kuneng yemmekecgec. Amma yeneac uamedacfocngina yeneng ine ngicngacfocngina yenearu siric ifiugeng wangecyunugec. Nga neng faka ifia mi angang Anutuac kicfu kengec nga eweheiheigoc kefai.

¹⁶ Amma ni uangicfocnagoc bangec mong mi meme, Yerusalaimgac oda dafi mengerenide, negen negennango imohaisac feu uangicfocna yenigoc kpekpedzucfu ua mekecfing.

¹⁷ Amma monggoc uamemesoc Yehudaareng kpetengina 150 nga garengenara amma bangec monnunac ngic neneac wegenac kecgec, yeneng ifingoc neac amau hama semeng nekecgec.

¹⁸ Anu neng dzegocngic yofi edeyunuyai, ngeni uamemesoc burumaka ngiwa mong nga rama sebingina sorotoc 6 amma neng goa momoc memengere anenggec. Ifi amma uameme 10 imohai waing haniahania imohacnac mema ngicngac yemmebisia. Nga ngicngac yeni ebicfu kecgecac amma yakaac takesi gawana mimi, imoc hemba obohou neanna dzongo yaka bummekefai.

¹⁹ O Anutuna; Ni ngicngac yomoc yeni wiac ayemmedarai, imocac negennenna ngereeu negensinuna!