Nehemia 3 - Deduamiti

Oda memengic.

¹ Womonggarengtoa kpara Eriatsib, ye womonggareng ogofora goa yenigoc odanagu kpara Rama, oda imoc monggoc memengere anggecdeac oda imocac wegenahau kenggec, amma oda mengeregecsoc Kebuac mariu faigec. Faima imocac naguya sasawa mengeredacma oda torokpegec kemma, ngic handret yeneac kicfifi amaherec wegenahau geng kemma Hananelac kicfifiac amaherec imohai kensikeec.

² Anu Yerikongic yeneng womonggareng yenearunac oda metorokpe anggec nga Imiriac medac Dzaku yeng ngic goa yenigoc Yeriko yenearunac torokpegec kenec.

³ Hasenaac medacfora yeneng nagu kpara Kondungyang, oda imohaigeng megec. Amma fombongtoatoa faima nagu mengerema nagu meseriudeac kpetinga momoc faigec.

⁴ Imoc yeneac ngadeu Meraimotngo ngic goa yenigoc ifingoc megec. Meraimot ye Uriaac medac nga Uria ye Hakosac medac. Nga yeneac ngadeu Mesurango ngic goa yenigoc yenahafoc megec. Mesurang ye Berekiac medac nga Bereki ye Mesedzebeac medac. Anu oda tosea mong imoc Banaac medac Dzadokngo ngic goa yenigoc ifingoc mengeregec.

⁵ Anu imoc yeneac nobocgengau Tekoa ngic yeneng oda memengere anggec nga Tekoaac ngicenara yeneng ine uagarengfocngina yeneac bageu mi memaemema kecgecac ua mong mi megec.

⁶ Pesaac medac Yoiada nga Besodeiac medac Mesurang yereng ngic goa yenigoc nagu kpara Yesana imoc mengeregec. Anu oda imocac naguyaac fombongtoatoa faima mengerema nagu meseriudeac kpetinga momoc faigec.

⁷ Gibeong nga Mitspa taonnunac ngic amma Gibeonnac ngic kpara Meretia nga Meronotnac ngic kpara Yadong, imoc yeni Yoiada nga Mesurang yereac nobocgengngau oda metorokpe anggec kengkecma bangecgarenggac amau Eufrata doku ihaigeng kensikeec.

⁸ Yeneac ngadenginau golngo wiac mengereande ngic Harahaiac medac Udziel yeng ngic goa yenigoc imoc ifingoc mengeregec. Nga yeac ngadeu kerecdoku homungkerengagoc mengec mengerengic Hanania yeng ngic goa yenigoc torokpema megec. Yeni ifi amma Yerusalaimgac oda megec kengkecma oda kpara Odatoa ihai kensikeec.

⁹ Anu Hur medaha Repaingo Yerusalaimgac bangec noboha imocac gareng kefec, yeng oda noboha goa ifingoc mengereec.

¹⁰ Harumapaac medac Yedaiango amea tegiaubigeng imohacnaac oda torokpema mengereec nga Hasabaniac medac Hatusngo yeac nobocgengau ifingoc mengereec.

¹¹ Nga Harimgac medac Markiya nga Pahat-Mocawac medac Hatsup yereng oda noboha mengerema Ohonecac Ama mong torokpema meoc.

¹² Ifi anggec Horesac medac Salumngo Yerusalaim bangec noboha monggac gareng kefec, naso imohai naroangfora yeneng mefickemagec oda noboha mong mengeregec.

¹³ Hanung ye Dzanoa ngicngac yenigoc nagu kpara Tumea yeac botuhau oda mengerema naguya meseriudeac kpetinga momoc fagec. Faima tosea torokpegec kemma nagu kpara Seucac nagu ihai kensikeec nga imocac sawea imoc 500 mitaacsoc anec.

¹⁴ Rekabac medac Markiya ye Bet-Hakerem bangec yeneac gareng, yeng nagu kpara Seuac nagu imohai oda mengerema naguyasoc memeseria ifingoc faidarec.

¹⁵ Nga Kohodzeac medac Sarung ye Yerusalaim bangec noboha Mitspa areng yeneac gareng mong, yeng nagu kpara Dokukiwa nagu, imocac oda mengerema nagu imohai bubuyagoc mema memeseria faidarec. Amma ye Siroang dzohong tegiaunac oda mengereu kengkecma ngictauac ua ferecgema Dawidac taonggac tire nanec, ihaigeng kemeec.

¹⁶ Anu yeac ngadeu Bet Dzurac bangec noboha imocac gareng Adzubac medac Nehemia, yeng imohacnac mengereu Dawidac kicsere noboc bumaugeng engsikeec. Amma kengkecma dzikacac ngic seria yeneac ama wegenac doku dzohong mong ngicngo megec feec, imohai kenec.

Lewiareng ua garenggegec yeneac kpacareng

¹⁷ Imocac ngadeu Lewiareng nga Baniac medac Rehum yeac dederecge bageu kecgec, yeneng oda tosea memengere anggec. Nga Rehumgac nobohau Keira bangec monggac noboha imocac gareng Hasabia, ye yengena bangec nobohau bigeng ifingoc kpetofohoma mengereec.

¹⁸ Yeac ngadeu Henadaac medac Binui ye Keira bangec noboha monggac gareng kefecc, yeng Lewiareng waraiyemmeu mengeregec.

¹⁹ Imocac ngadeu Mitspa yeneac gareng Yesuhaac medac Edzerngo noboha imoc mengereu kemma dzikacac wiac ihai faigec tacande, ama imocac wegenahau ferecferecge oda tuturunga heasickedeu kensikeec.

²⁰ Anu Dzabaiac medac Baruk yeng tuturunga imohacnac kucmamea kpac oda meu ferecgema womonggarengtoa Eriatsib, yeac amau engenggac nagu imohai kensikeec.

²¹ Meraimotngo Eriatsibac amanaguunaac torokpema memengere anu kemma womonggac oda wisickede ihai sikeec. Meraimot ye Uriaac medac nga Uria ye Hakosac medac.

Womonggareng ua megec yeneac kpacngina

²² Anu memengere imocac ngadeau, Yerusalaim wegenahau guruama tackenec yeneac womonggareng yeneng Meraimotac noboha ihacgeng torokpema mengeregec.

²³ Ifi anggec Binyamin nga Hasub yeri amangira kiwaugeng oda imoc memengere anoc. Nga yereac ngadeu womongareng Adzaria ye Maseiaac medac Anania esea, yeng amea nobohau oda ifingoc mengereec.

²⁴ Yeac ngadeu Henadaac medac Binui yeng Adzariaac amaugeng oda tegia feec, imoc mengereu kemma tuturungau ewaroc.

²⁵ Nga Udzaiac medac Paralngo tuturunga imohacnac kemma ngictauac amagerecfu kicfifi amaherec nanec nga gareng yeneac sobeng feec, botuc imoc mengereec. Nga yeac nobohau Pedaiac medaha Paros

²⁶ amma womonggac uangic Ofel bangecac buririhau kecandae, yeneng oda medzuacgec kemma Doku memeac nagu ferecgema kicfifiac amaherec nanecfu kenec. Kemma wenac ere ereaugeng kensikeec.

²⁷ Yeneac ngadeu Tekoangic yeneng kicfifi amaherec imocac odaya mengeregec kemma Ofelac odatoa tegiaugeng sikeec.

²⁸ Sikeu womonggareng yeneng Becosicac naguu kende, ihai amangina kiwausoc ifingoc memengere anggec.

²⁹ Anu yeneac ngadeu Imerac medac Dzadokngo amea kiwaubigeng mengereec. Nga wenac ere ereaugenggac nagu gareng Tsekaniaac medac Tsemai yeng ifingoc medzuarec.

³⁰ Ifi anu Tselemiaac medac Hanania nga Dzarapa medacfora marimong yeneac ngadeu mong fingerec kpara Hanung, yereng oda noboha monggoc mengereoc. Nga yereac ngadeu Berekiaac medac Mesurangngo amea kiwaubigeng ifingoc mengereec.

³¹ Yeac ngadeu Markiya ye wiac golgoc meande yenearunac mong, yeng womonggac uangic nga emekpesingic yeneac ama imoc mengereu kemma Uagarenggac Nagu tuturunga wigeng ihai kensikeec.

³² Anu wiac golgoc meandae yeni nga emekpesingic yeneng oda dzongia wisic wisickeaac mana wigenggac tuturunga, imohacnac memengere anggec kemma Nagu kpara Rama imohai wisickeec.