Nehemia 2 - Deduamiti

Nehemiango Yerusalaimnu kenec.

¹ Kifa tuenti imocac afo Nisan imohai ngictau Atadzeksiac waing mimi naso anu neng waing mehama ngictau miai. Nga ni warac yeac kicfu ubahodunggoc mong mi kefai.

² Ifi anu ngictaungo kpesinenec, “Ge hafei mi anggemmanu kic mesugango nocac ubahodung siric ande? Imoc wiac monggac kpahac, heregau ubaebic mong fede gedang. Deu ni homac yombong kengecnuec.”

³ Anu ngictauac yofi deai, “Ngictau kecengkecbesande! Taong esangabofocna tonggoyunugec imoc gerecngo oda naguya dzedaru manganema sobengasac femanu, neng dafiu ubahodunga kpac siric kecbade?”

⁴ Ifi debare ngictaungo kpesinenec, “Ge nocwiacac anggende?” Deu neng kurumenggac Anutu numumima,

⁵ ngictauac yoac turunga yofi meremmiai, “Ngictau geng negenna ngereeudeu nga uangicga neac negenna naric anudeu Yehudaac taongtoau suenuna kemma esangabofocna tonggoyunugec bangec imohai, amagerec imoc monggoc medzuacbesare.”

⁶ Anu naso imohai ngactaungo ngictauac tegiau tacmanu ngictaungo yofi kpesinenec, “Ge noc nasou kembeso negennec amma noc nasou monggoc dzigenenade?” Deu, ngictaungo negennenu naric anu suenuudeac ande, ifi negemma naso meai.

⁷ Amma monggoc yofi deai, “Ngictau geng negenna ngereeudeu, naric Eufrata doku tegiau prowins sasawa yeneac gawanafocngina yeneac kibi tembuc tembuc ohonenna imocngo gombunga meficnumanu Yehuda bangecfu kembai me?

⁸ Amma geng naric ichasaac gareng Asafac kibi mong ohonenna yeng Yerusalaimgac nagu sasawa imocac icsira nga nagu gareng yeneac ama seriaac ic amma neanna tacyac ambadeac amana imocac ifingoc nembeso.” Anu Anutunaac mariseriango nearu feecac amma ngictaungo kpesikpesinaac turunga merenec.

⁹ Amma ngictaungo wasai gareng amma ngic becosifu nedziandae yenearunac goa isingyunuma nigoc sueyunuec. Ifi anu ni Eufrata doku tegiau prowins sasawa yeneac gawanafocngina yenearu kemma ngictauac kibi imocnoc garengenara yemmeai.

¹⁰ Anu naso imohai Horoningic Sanbalat nga Among areng yeneac garengenara Tobia, yereng siduc yofi negenoc: Ngic goa yeneng Isracelareng meficyunugecdeac kendae ifi negemma herebacngira sicsauc anec.

Nehemiango Yerusalaimgac oda manganeec imoc hennegeng anec.

¹¹ Anu Yerusalaimnu kemma ihai kecba uameme harebec ammanu,

¹² ngic goa meisingyunuba tofocnac nigoc yerecgeing. Nga ni noc ua Yerusalaimnu mebadeac Anutunango negennegeng herenau faiec, imoc mong me mong mi edeai. Anu naso imohai becosi mongngo mong mi nanggec, becosi mocgungo nanecac amma nengsac imohai emma tacba yerecgeing.

¹³ Anu neni tofocnacngoc Tumea Nagu ferecgema, Katekasi Dokutennu bigeng kemma nagu kpara Seuc naguu singngoc Yerusalaimgac oda barackeu naguya sasawa gerecngo dzembarackeu manganeec, imohai hennegeng amma kening.

¹⁴ Ifi amma imohacnac naguu kpara Dokukiwa imohai bigeng ferecge kemma ngictauac doku dzohonnu kensikeing. Kensikema sing titinga fofonga anecac amma becosingo ferecgeudeacsoc mi anec.

¹⁵ Ifi anu tofocnac imohaingoc tumeausing emma oda hennegeng aning, andacni wisickeu, monggoc dzigenema Tumea Naguu singngoc ferecgema amau haing.

¹⁶ Ni Yehudangic me womonggareng me ngickiwa me garengenara amma ngicngac goa ua megecde, yeni yoac mong mi edeyunuyaiac amma garengenara yeneng dahai kenai nga noc ua meai, imoc mi negenggec.

¹⁷ Anu neng yofi edeyunuyai, “Hendae, Yerusalaimngo manganedarec nga oda naguya sasawa gerecngo dzedaru nenang ebic imocac manau kecdimbe. Imocac amma hagec nenang Yerusalaimgac oda monggoc medzuacma yeneac deendemaac bageu mi kecbisina.”

¹⁸ Dema Anutunaac mariseriango nearu feu ngictaungo yoac dedarec, imocac siduc ayemmedarai. Ayemmeba turunga yofi merenggec, “Nenang hanahema oda medzuacni.” Ifi dema yeni ua mong gombunga imoc hanahegec.

¹⁹ Anu Horoningic Sanbalat nga Among arennunac garengenara Tobia amma Arabangic Gesem yeneng siduc imoc negemma deendema anemmema memanunuma yofi degec, “Ngeni imoc noc ua medae? Ngeni ngictauac here miac miac faka andae me?”

²⁰ Ifi degec neng merengyemmema yofi deai, “Kurumenggac Anutungo meficnunuudeac amma uangicfora neni oda medzuacnide. Nga ngeneac wiac mong Yerusalaimnu mi fede, imocac wiac monggac kperi naric mi anggecde amma ngeneac kpacsiduc yei mong mi yombong fede.”