Nehemia 13 - Deduamiti

Bangec monnunac ngic yenigoc monggoc mi kecgec

¹ Anu naso imohai lewiareng yeneng ubangina miacma Moseac kibi imoc ngicngac osoyemmegec negenggec. Nga kibi imocac manau yofi meficgegec, Amongareng nga Mocawareng yeneng Anutuac habu yeneac botucfu mi yombong kecbisia.

² Yeni Isracelareng semeng nga doku mong mi yemmegec. Yeni ine Bilecamngo memanganeyunuudeac bung migec. Anu Anutungo imoc heimerenu kenecngina anec.

³ Anu habu sasawango singyoac imoc negemmagec kuric hahaya yeni yenaocngoc Isracel yenearunac meicemegec.

⁴ Yomoc mi fingecmanu womonggareng Eriatsibngo Anutuninaac seseac amamana nanec, imocac gareng kefudeac meisinggegec nga yeng ine Tobiagoc emenegengngira feecngoc.

⁵ Imocac amma amamana yada imoc wit nga baliac sesememe nga hosuc homung kerengngagoc oho ohoac wiac. Amma womonggac wiac sasawa nga wit bali gbomea gboriaac sese tennunac mocgu nga waing gboria amma oliwa kereha imoc Lewiareng nga eriendzongngic amma odagareng yeneac gosigosia tacande. Amma womonggareng yeneac sese kpekpedzucac mana momoc Eriatsibngo Tobia desimiec.

⁶ Naso imohai Atadzeksingo Babilongac ngictau kefec imocac kifaya 32 anec nga neng ine dzigenema yearu kemma kecbare wiac sasawa imoc fingerec. Amma ngictaungo negennenu Yerusalaimnu monggoc dzigenebadeac yearu dekpesi anai.

⁷ Ifi amma Yerusalaimnu monggoc dzigenema Eriatsibngo faka mangana yombong amma Anutuac amamana yada Tobia wamiec, siduc imoc negenai.

⁸ Negemba imocngo herebu kuneng meficgenenu Tobiaac wiac sasawa amamana imohacnac miacuku amba ngadeau madarec.

⁹ Anu amamanau dzuacdzuac ua mema Anutuac amamana imocac wiac sasawa nga seseac wit nga bali amma hosuc homung kerengngagocac wiac monggoc faigecdeac uayoac deyemmeai.

¹⁰ Amma Lewiareng semeng mi hendzicyemmegec nga Lewiareng sasawa amma eriendzonggac ngic yeni uangina imoc wama heikpenec sobengnginau monggoc dzigenedacma semengngina homecgec, imocac ifingoc negenai.

¹¹ Negemma ngicenara yoac kucgoc ayemmema yofi kpesiyemmeai, “Ngeni Anutuac ama nocac wagec eng nande?” Ifi dema kpacyunuba hadacgec nanangnginasoc faiyunudarai.

¹² Anu Yehuda yeneng wit nga bali imohanac tennunac mocgu mehagec amma waing gboria nga oliwa kereha mehama amamana nangkenecsoc faidacgec.

¹³ Anu womonggareng Tselemia nga singyoaac kpoukpou Dzadok amma Lewiarennunac Pedaia yeneng yakaamaac gareng faiyunuyai. Amma Dzakurac medac Hanang, Mataniaac esea yeng marimeficngina kefudeac faiyai. Anu ngicngac yeneng yeni negeng ngereeyunugecac amma yeni semeng hendzicma Lewiareng ogofocngina yemmegecdeac faiyunuai.

¹⁴ Anutuna ge faka yomocac negensinubesena amma Anutunaac amau uaareng meserima medarai, imoc mi nigecgubeso.

¹⁵ Anu naso imohai hemba Yehuda yeneng Sabata nasou waing tidzoctidzohoa nga wit nga bali amma waing nga wainggbomea amma fig nga wiac goa ebiria ifingoc suegecdeac donggiu faikecgec. Amma yeni Sabata nasou imoc medacma Yerusalaimnu enggecac amma neng Sabata nasou nenesemeng suesueac dekpetari ayemmeai.

¹⁶ Amma Sabataac nasou Tiro ngicngac Yerusalaimnu kecgec, yeneng kondungyang nga emekpesiac iwaingina goa mehama Yerusalaimnu Yehuda ngicngac yenearu suekecgec.

¹⁷ Ifi anggec Yehuda yeneac ngickiwafocngina yoac kucgoc ayemmema yofi deai, “Ngeni nocac faka mangana amma Sabata naso kpaburac kpedae?

¹⁸ Esangabofocngina yeneng warac faka imocngoc anggec taong yomocac ngicngac nenang kpendzengtoau ening. Anu yaguc ngeni ine Sabata naso kpaburac kpema Anutu heremiacmiac ammigec herebuya Isracel yeneac witiu faiudeac andae me.”

¹⁹ Ifi dema wenackiwango siroronggeu Sabata tatac naso mi ammanu Yerusalaimgac oda naguya heima mi witiwiti wagec nammanungoc Sabata tatac naso wisickeudeac edeyunuyai. Amma ni neanna ngicfocna goa faiyunuba Sabatau finac ebiria mi meenggecdeac gareng nanggec.

²⁰ Anu emekpesingic nga finac sueandae yeni atac mocgu me yohockang toforecfu Yerusalaimgac oda ngadeaungoc kecgec.

²¹ Ifi anggec neng gorongina kpema yofi edeyunuyai, “Ngeni tofocnac nocac oda ngadeau kecdau? Ngeni faka ifia monggoc anggecdeu ni yoacfu faingunubade.” Ifi deba naso imohai yeni Sabatau monggoc mi hakecgec.

²² Ammanu Lewiareng Sabata nasou dzuacemema kemma nagu garengge kecmagec Sabata naso imocngo kpetiac feudeac edederecge ayemmeai. O Anutuna, ge ngicngafocga yeneac songo negemma wosoefac ayemmekecnec. Imocac wiac sasawa andarai imoc negensima wosoefacga edzacnuna.

²³ Anu naso imohai hemba Yehudangic homacngo Asodo nga Among amma Mocawnac ngac meyunugec.

²⁴ Imocac amma Yehuda nambaracfocngina noboha yeni yenang amayoac dafi degecde imoc obohogec amma Asodo amayoac dekecgec ngicngac noboha yeni ngicngac goa yeneac amayoacsac dekecgec. Ifi amma yeni Yehuda yenang amayoac imoc mi dekecgec.

²⁵ Ifi hemma yoac kucgoc ayemmema sowecyunuyai amma goa yunuma orucdzongina memoronggeai. Amma yeni Anutuac kpacfu deserigecdeac edyunuyai, “Ngeni naroangfocngina ngicngac goa yeneac medacfocngina mi yemmebisia nga yeneac naroangfocngina yeneng medacfocngina mi meyunubisia amma ngenang ifingoc.”

²⁶ Dema yofi edeyununuyai, “Isracelac ngictau Saromo ye sing ifiau kopocsic meficgeec. Bangectoa bangecfu ngictau mongngo ye isoc mong mi kefecac amma ye Anutuyango hensongo ammima meisinggeu Isracel yeneac ngictau anecngo mikicngac meyunuma yeneng kopocsicfakau wangecgec kopocsihagoc anec.

²⁷ Anu neni ngeneac faka imoc modacma mikic yenearunac ngac meyunuma kopocsic mi angana amma Anutu ngadehenide me?”

²⁸ Womonggareng Eriatsibiac medac Yoiada, yeac medac mong ye Horoni yenearunac Sanbalatac kpegea anecac amma kporarai.

²⁹ O Anutuna, yeni womonggarenggac ama nga womonggareng ua amma Lewiareng yenigoc dzadzahac menec imoc marisako megec, imoc negensibesena.

³⁰ Anu ni womonggareng nga Lewiareng yeni mikic faka imohacnac medzuacyunuma uanginasoc faiyunuyai.

³¹ Amma sese oho ohoac gerec heigecdeac ngic meisingyunuma mehagecdeac naso yemmeai nga icgbomea fora waracwarac mehagecdeac ifingoc meseriai. O Anutuna, ni wiac sasawa andarai, imocac negensinubesena.