Nehemia 12 - Deduamiti

Womonggareng nga Lewiareng.

¹ Womonggareng nga Lewiareng yomoc yeneng Tseatielac medac Dzerubawel nga womonggarengtoa Yosuha yerigoc dzigenegec: Seraia, Yeremia, Edzera,

² Amaria, Maruk, Hatusi,

³ Tsekania, Rehum, Meraimot,

⁴ Ido, Ginetong, Abiya,

⁵ Miyaming, Moadia, Biriga,

⁶ Tsemaia, Yoiarib, Yedaia,

⁷ Salu, Amok, Hilkia Yedaia. Womonggarengtoa Yesuhaac nasou ngic yomoc yeneng womonggareng enara amma kecgec.

⁸ Lewiareng yeneac kpacngina yofi; Yesuha, Binui, Kadmiel, Tserebia, Yehuda nga Matania. Matania nga marimeficfora yeneng dedengerecac yegecfu waraiyemmekecgec.

⁹ Amma Bakbukia nga Uni yeri marimeficfocngiragoc yeneng yeneac nobohau namma yegec tosea heikecgec.

Womonggareng yeneac esamedac

¹⁰ Yesuha ye Yoiakimgac mama nga Yoiakim ye Eriatsibiac mama, Eriatsibi ye Yoiadaac mama,

¹¹ Yoiada ye Yonatanggac mama nga Yonatang ye Yaduaac mama.

¹² Anu Yoiakimgac nasou womonggareng habu yeneac enara yomoc yeneng kecgec, Meraia ye Seraia areng yeneac enara, Hanania ye Yeremia areng yeneac enara.

¹³ Metsulam ye Edzera areng yeneac enara nga Yehohanang ye Amaria areng yeneac enara,

¹⁴ Yonatang ye Maruk areng yeneac enara nga Yosef ye Tsekania areng yeneac enara,

¹⁵ Adna ye Harim nga Helkai Meraimot yeneac enara,

¹⁶ Dzekaraia Ido areng yeneac enara nga Metsulam ye Ginetong yeneac enara,

¹⁷ Dzikiri ye Abiya yeneac enara amma Piltaingo Miniamin nga Moadia areng yeneac enara,

¹⁸ Tsamua ye Bilga yeneac enara nga Yehonatang ye Tsemaia yeneac enara,

¹⁹ Matenai ye Yoiaribi yeneac enara nga Udzi ye Yedaia yeneac enara,

²⁰ Kalai ye Salai yeneac enara nga Eber ye Amoko yeneac enara,

²¹ Hatsabia ye Hilkia yeneac enara nga Netanel ye Yedaia yeneac enara.

²² Pesia bangecac ngictau Darius yeng garengyunuec nasou imohai, Eriatsibac Yoiada, Yohanang nga Yadua yeneac nasou Lewiareng oruha nga womonggareng goa kpacarengngina ifingoc ohoma meserigec.

²³ Lewiacareng yeneac enara yeneac kpacareng imoc Yehuda bangecac siduc kibiu oho ohoya feec, imoc erekecma Eriatsibac medac Yohanangac nasou eresikeec.

²⁴ Anu Lewiareng yeneac enarafocngina Hatsabia, Tserebia nga Kadmielac medac Yesuha yeni amma marimeficfocngina yenennoc Anutuac uangic Dawidngo yoac deec, imoc modacma noboc nga noboc namma noboha yeneng dedengerec yegec nga ubangerec yegec heigec noboc yeni waickema namma negengyemmegec wisickeu noboc yeneng mong heikecgec.

²⁵ Matania, Bakbukia, Obadia, Metsulam, Tamong nga Akub yeni womonggac oda naguyau semeng kpekpedzucac amamana nangkenec, imoc garenggekecgec.

²⁶ Anu Yesuhaac medac Yoiakinngo Yodzadakac esea nga gawana Nehemia amma womonggareng Edzera singyoacac kpoukpou yeneac nasou ua ifi fingerec.

Yerusalaim Oda desidesiac areng

²⁷ Yerusalaim oda desidesi naso hau Lewiareng noboc noboc kecgec yeni Yerusalaimnu dedengerec yegec heima sogacsogaigoc yoming nga gita kpema eriendzong megecdeac kpacyunugec hagec.

²⁸ Amma eriendzonggac ngic imoc yeni Yerusalaim bangec nobohaac guruama Netofa,

²⁹ Bet-Gilgalnac nga Geba amma Adzamawe guruamaunac. Guruama imoc yeni Yerusalaim wegenahau tarec.

³⁰ Anu womonggareng nga Lewiareng yeni yenang nasotoaac heitigogong meemegec. Amma ngicngac nga oda amma odanaguyasoc dzuacdzuac ua medacgec.

³¹ Anu ni Yehudanac enara sasawa meyunuma oda witiau yombong emma ubangerecac yegec heigecdeac habu kuneng yohockang megosiyunuyai. Megosiyunuba habu mong yeni oda witiau foiu gengnagu kpara Seucac nagu ihai kenggec.

³² Anu Hotsaia nga Yehuda enara goa yeneng yeni modacyunugec

³³ nga Adzaria, Edzera amma Metsulam ,

³⁴ Yehuda, Binyamin, Tsemaia nga Yeremia yeni yenahafoc kenggec,

³⁵ womonggareng yeni ifingoc tomengngina mema yenigoc kenggec. Nga Dzekaria ye ifingoc modacyunuec. Dzekaria ye ine Yonatanggac medac nga Yonatang ye Tsemaiaac medac nga Tsemaia ye Mataniaac medac nga Matania ye Mikaiaac medac, Mikaia ye Dzakuac medac nga Dzaku ye Asafac medac.

³⁶ Amma marimeficfocngina Tsemaia, Adzarel, Milalai, Gilalai, Mai, Netanel, Yehuda nga Hanani yeni eriendzong memeac wiac hania hania Anutuac uangic Dawidngo mekefec, imoc sasawa memagec singyoacac kpoukpou Edzerango waraiyemmeec.

³⁷ Anu yeni nagu kpara Dokukiwa imoc ferecgema Dawidac taonnu tire miacmiarau titi emma ama imoc ferahama Dawidac sobenu Doku Naguu wenac ereereau bigeng kensikegec.

³⁸ Anu yegec heihei habu mong yeneng nobocgeng kenggec, neng ine ngicngac noboha yeni modacyunuba oda witiau sing kemma gerec dzedzeac kedzebe, imocac amaherec ferahema Odatoa ihai kening.

³⁹ Kemma torokpema Efrayimgac Nagu witiau ferecgema, Yetsanataac Nagu, Kondungyang Nagu, Hananeac Amaherec nga Handeretac Amaherec amma Rama Nagu ferecgema nagu kpara Gareng imohai kengsikeing.

⁴⁰ Kengsikema yegecheiheiac habu yohockang yeni eacma dedengerec yegec heima Anutuac amau tatacnginau emma nanggec nga neng habu enara noboha yenigoc nanai,

⁴¹ Amma monggoc womonggareng enara Eliakim, Maseia, Miniamin, Mikaia, Elioenai, Dzekaraia nga Hanania yeni biungganginagoc emma nanggec.

⁴² Nammagec Maseia, Tsemaia, Eleadzar, Udzi, Yehohanan, Elam nga Edzer. Ngicguru imoc yeni Yedzerahiaac dederecgeu yegec heigec.

⁴³ Anu Anutungo sogacsogai kuneng meficgeyemmeecac amma uameme imohai sogacsogaiac sese kuneng megec nga ngacnambarac yeneng ifingoc homac sogaigec. Ifi anggec Yerusalaimnu sogac sogaiac udumeng kuneng feec, imoc ngicngac agac kecgec yeneng negenggec.

⁴⁴ Ammanu naso imohaingoc ngic semeng gboriaunac nga tennunac mocguac ama managoc nangkende imoc garenggegecdeac meisingyunugec. Anu yeni heikpenecac sobeng taong oronggema feec, imohacnac semeng momoc mema semeng amau mekenggec imocngo Lewiareng nga womonggareng nanggeyunuudeac deserigec. Amma dedeseriyoac imoc modacma womonggareng nga Lewiareng yenearu mehagec, nga Yehuda yeneng womonggareng amma Lewiareng yeneac uaac negenggec ngereec.

⁴⁵ Ifi anu yeni Anutunginaac yoac modacma dzuacdzuac ua mekecgec. Anu Dawid nga medaha Saromo yereac dederecge kpetofohoma eriendzong meme nga odagareng yeni ifingoc uangina mekecgec.

⁴⁶ Nga waracngoc Dawid nga Asafa yereac nasou eriendzonggac dederecgengic nga dedengerec yegec heihei amma Anutuaru ubangerec yegec heiheingic kecgec.

⁴⁷ Anu Dzerubawel nga Nehemia yereac nasou Isracel sasawa yeni wenacsoc eriendzong meme nga odagareng yeneac semeng kpedzucnekecgec. Amma monggoc Lewiareng yeneac ifingoc hendzicgec Lewiareng yeneng imohacnac noboha Aharonggac fingecsahe hendzicyemmekecgec. Aharonggac fingecsahe yeni womonggareng ua mekecgec.