Nehemia 1 - Deduamiti

Nehemiango Yerusalaimgac numuec.

¹ Hakaliaac medac Nehemia yeac yoac yofi, Atadzeksisngo ngictau kefec imocac kifa tuentiac afo Kislew imohai, Ni Susa taonnu ngictauac ama seriau kecbare

² sactosofocna yenearunac mong kpara Hananingo Yehudanac ngicareng goa yenigoc hagec. Hagec neng Yehudaareng tosea witicuaunac woragec yeneac nga Yerusalaimgac dekpesi ifingoc ayemmeai.

³ Ayemmeba yofi edenugec, “Ngic witicuaunac worama prowinsnginau dzigenegec yenearu ebic kuneng fingeru deendema witiau kecdae. Nga Yerusalaimgac oda imoc barackeu oda naguya sasawa gerecngo dzedarec.”

⁴ Anu siduc imoc negenai naso imohai neng ubahodung negemma matacma kiarai. Ifi amma uameme goau ubahodunggoc yakasege amma kurumenggac Anutu numumiai.

⁵ Amma yofi deai, “Kebu kurumenggac Anutu, ge Anutu Engenatoa amma damudamugagoc. Ngicngac geac songo negemma dedeserigango modackecdae geac songoga nga dzadzahacgango yenearu fekecde.

⁶ Ge kicga fima kedzacga nearu faima wanacngicga neng hadzing toforec wanac arengfocga Isracel yeneac amma numuduae, nunumuna imoc negenna. Ni Isracel areng nga mannaac arengfora amma neanna areng sasawa neneac enac mema gearu kopocsic meficgeing imoc hafoangoc deficgedacduae.

⁷ Neni geac kicfu faka mangana yombong aning. Amma dederecgeyoacga nga nonoyoacga amma dedeseri yoacga uangicga Mosearu fainec, imoc mi modaring.

⁸ Anu ge uangicga Mose edederecge ammima yofi denec, imoc negensibesena: “Ngeni ngadehenugecdeu mederengunuba bangec monnunac ngicngac yeneac botucfu kecgecde.

⁹ Amma nearu monggoc dzigenema dederecge yoacna modacgecdeu neng ine Kpacna feengkefudeac amma witicuau ngicngac hereau yombong kecdae, yeneac botucfunac mengunuma neanaoc bangec meisinggeai imohai faingunubade.

¹⁰ Isracel yeni geac uangicfocga nga ngicngacfocganoc. Ge kuctoaga engena nga mariserigango mesiyununec.

¹¹ O Kebu, ge kedzac gombunga kpema uangicfocga geac kpac eweheiheigoc negensinggeandae yeneac nunumu negenna. Amma uangicga neac nunumungo foragoc anudeac negemma meficnumana garengngo wosoefac anembeso, ifi numugenduae.” Ni naso imohai ngictauac waing kpakenecfu mekemma mikefai.