Nahum 3 - Deduamiti

Ninewe taong ye kecma kpac ambesande

¹ Ninewe, taongga imoc sacngo wake wakea nga ikocngina homac yombong. Gearu hamangecfakango sokoma fede nga kpenggodzu hania hania ngicngac ayemmeandae. Imocac amma gearu ebic kuneng fingecbesande.

² Becosic kenggecdeac ngadesicnginau kpegec udumeng fingecbesande. Keretacac udumeng amma becosic yuhi yuhi kendae, imocac udumeng negenggec.

³ Ngic becosicfu tacma gereagoc sikedae, yeni dzikac kpemagec wasaibeangngina nga sangaranginango piratackede. Yeni ngicngac homac yunuhomedae. Farengngina homac fekende imoc naric mi osodacgecde, goa ihai fuseyunude.

⁴ Ninewe ge singtoangac yeneac faka homac modacannec. Ge sirickerenggagoc nga godo fakagaac amma bangec homac yeni gengsongo angkecdae nga kaiserofakagango ubangina mesufuma kerereyunuannec amma ngicngac homac yeneng hiedzongo esangabo fakaga bummema wiac imocac wanaha anggec.

⁵ Kebungo geac yofi dede, “Ninewe, ni kecma metinggubesandua amma kporucga miacba kicga semeu senggang nammana ngiha ngiha yeneng senggangga henggec gamegubesande.

⁶ Ni wiac mamakaha homunagocngo witigau ukuma game kpekpeu faiguba ngicngac yeneng desusuic anggembesandae.

⁷ Anu genggecde yeneng geac modzongina tiu ngadeguma yofi debesandae, ‘Ninewe amabangec barackema manganeec imocac mongngo yeac ubahodung naric mi negembesandae. Amma mongngo ye naric mi hofocma mekiribesandae.’

⁸ Ninewe negennec, geac kucngo No-Amon Aigitaac taongtoa imoc mi feraheec. No-Amon ye Nilidoku tegiau feu Nilidokungo oda isoc ammima yerecgema feec.

⁹ Kus nga Aigita yereng No-Amonggac kuha ammaec yeng garengyuruec nga Put nga Luwim yereng ifingoc nanggeoc.

¹⁰ Ammanu No-Amon taong yeac ngabafora yeneng sifu No-Amon ngicngac wanacfocngina anggecdeac meyunuma kenggec. Kemma nambaracfocngina singsosocfu kpedzameyunudacgec homegec nga ngic kpacngina kengkena yeni ngabafocngina yeneac wanacfocngina anggecdeac kpeing kpegec amma enarafocngina aienwiticfu faiyunugec.

¹¹ Ammanu Ninewe ge ifingoc minggong amma ubaga sufuu ngabafocgaac kengec amma debang dahai meficgenadeac ambibiebesannec.

¹² Hocodaga imoc fig gbomea hanahema kpaueande, ifia isoc ammanu ngicngac yeneng fig ic kpemindzahegec gbomea fotockema ngic enacfu ferecgedacma kemeande ifi isoc hocodaga imocacsoc ambesande.

¹³ Amma wasaingicfocga yeni ngac isoc sasawa nga bangecgaac hocoda nagutoa imoc ngabafocga yeneac kicfu aangkac febesande. Amma gerecngo nagugaac kpeting imoc dzetackebesande.

¹⁴ Ninewe, ngabafocga yeneng hocodaga tidzickegecdeac arenggedae imocac ge dokuac obohobanggac doku fina amagau habeso. Nga ngaba yeneng taonggaac manau erebauac ge taongodaga meserinadeac bangec sacsac mema tina goteng goteng anu brikac boksfu arengyunuma brik mebesena.

¹⁵ Ifi memana yeneng sifu gerecfu gohoma wasaibeangngo guhomebesandae. Amma ipua yeneng yaka maria neandae ifi isoc nedzonggubesandae. Fingesahegango ipua isoc fingecsahe ambang amma imocngo geac memeficga naric mi ambac.

¹⁶ Amma finac suesuengicfocga homac yombong torokpema faiyununa yeneng sawau asomeng tacdae yeneac kpete ferahedae. Ammanu ipua yeneng nedzongngunuma kendacandae ifi isoc finac suesuengicfocga yeni finacnginagoc waguma woradacbesandae.

¹⁷ Ipua yeni habutoango nomangnasou hocoda manau nammagec wenac erema kpeu firiringgema dahai kengkecdae imoc mongngo mi negende. Ifi isoc garengfocngina nga enarafocngina yeni singsararang kpema woradacbesandae.

¹⁸ Assurac ngictau, geac bageau ngickunengfocga homedacgec nga ngicfocga kpactoanginagoc mesorongaiyunugec fedae nga ngicngacfocga singsararang kpema tikiu sifectoau kendacmagec mongngo mi kpedzucyunubesande.

¹⁹ Sebigau kpekpedzame anggenggec imoc mengec mengereac siriha mi ande nga kubectoaga imoc mosimosiac siriha mi andengoc. Siducga negembesandae yeneng mari kpegemma sogaibesandae nocac manganagango nasosoc ngicngac sasawa memanganeyunu kecnec. Kifa goau bangec goau ipua yeneac fingecsahe homac yombong fingecsahe amma nenesemengngina neandae.”