Nahum 2 - Deduamiti

Kecma Ninewe kpac ambesande

¹ Ninewe, gearu ebic kuneng fingecgembesande. Yare sikegenu singsararang kpebanggac amma amaac oda witiau ngic faiyunuma sinnu gareng mema dzikacac wiac heigec kemeu meseriemegec.

² (Isracel yeni warac nasokerennu keceregec isoc Kebungo Yacakowac areng nasokereng imoc monggoc yemmebesande. Nocac yarengic yeneng dzikac nasou kpenggodzu nga sasawa hamangec ayemmema waingngina heima mekenggec.)

³ Nineweac ngabafora yeneng dzikacac kasoac parangnginau gbaki sacsacngo ohogec amma marikunginau ifingoc gbaki kpaucngo ohogec amma aieng keretacfocngina pirac pirahagoc imoc arengyunuma meefaiyunuma sangarangina sinetai angandae.

⁴ Keretacfocngina yeni sandang kpema nanggec pirac piracnginango kifa isoc borang tiu piratac isoc kperagima sobennu nedzikeng nedziha andae.

⁵ Wasaingic yeneac kunengngina ye wasaingic enarafocngina kpacyunuu yeni bic nedzikenggecdeac titifaing amma odau nedzi kemma dzikacac kasoac parang gununggedae.

⁶ Dzohong gumegumea imoc hembarackegec dokungo ngictauac ama hembarackema kisangande.

⁷ Ngaba yeneng hama Nineweac wiac sasawa hesimima ngicngacfora wangecyunuma kendacbesandae. Enactofoc tofoho naroangfora yeneng kebesac nengngo kusema arohoande ifi isoc kiac songgong amma maringinango mokucngina kpebesandae.

⁸ Doku dzohong mong hembarackegec dokungo wiac yurumema kengkecde ifi isoc Ninewenac ngicngac yeni imocacsoc yurumema kendacgecde, “Nanggec nanggec.” Ifi dema kpacgec mongngo mong mi dzigenebesandae.

⁹ Amabangec imocac mingina yunukisang ayemmema silwa nga golngina medacbisia. Amma dzofinacngina noc efea fede nga dzunga masapungina ebira yombong feyemmede.

¹⁰ Ninewe memanganegec kisi fingeru ngicngac yeni ongangina worau hanimaringina dzonoma fedeude nga korotiticngina kuha kpac anu kicmesungina meaibesande.

¹¹ Amma Ninewe yeneac fakangina siriha yofi isoc ambesande, laion medacfocnginagoc yeneac amabangecngina imocnoc heihembarac anggec nonggofocngina yeneng medacfocngina bangec dahai sufuyunugecac kengeha kpac kecandae, bangec imoc ifingoc meickebesandae.

¹² Laionyangngiwango ngagera nga medacfora yeneac kpeteu yang kpema kimbac kpembarackema mekemma ama tatahau faiu wakeande, siricngina ifia isoc feude.

¹³ Amma yeneng tofo gearu faigec imoc kpetackebesandua nga kudoc kpegenggec imoc mesigembesandua.

¹⁴ Kebungo Ninewe geac yofi dekperagide, “Geacfingecsahega imoc dzonggobesande amma ngeneacnemuonga icngo memea nga aieng gerea nganochetinggegec patatakeande imoc nemuongaac amaunachembarackema meuku ambesandua. Amma ge fakagombunga mong mi angkecnecac kicserega fingerudeac desiduae.” Kebu kurumenggac wasaiareng kunengnginango Nineweac yofi dede, “Ni ngeneac ngaba angkecduaeac dzikacac keretacngina gerecfu faiba hosuc kpema sasawa dzedacbesande nga wasaingicfocga dzikacac beangngo yunuhomebesandae ammanu noc wiac sasawa yenearunac menec imoc wangecgudacbesandua nga siduc dedefocga yeneac dearo imoc monggoc mi fingecbesande.”