Nahum 1 - Deduamiti

Anutungo kuctoaya nga herebuya Ninewe dekperagiyemmede

¹ Yoc Ninewe taonggac kpefingyoac elkosingic Nahumngo hennegeng anec.

² Nemuongagoc dzadzahac anganggac faka imoc Anutuac kimbeng kpetiac ande, ye Kebu ifia. Ye kimbengaac turunga kpouyemmekecde nga ngabafora yeneac herebu negemma mekecande.

³ Kebu ye herebuya dengecdengec hakecde nga ye kuctoayagoc amma ngicngac kopocsicnginaac turung kpoukpou faka imoc mi waande nga hoengngo hanititiyaac yube angkecde amma firang kuhagoc nga gbungparandanggac manau sing kengande.

⁴ Amma ye kondung memeting ammima yoac kucgoc demiu dzikeande nga dokutoatoa sasawa megbanggeyunuande. Megbanggeyunuu Basan nga Karmelac ickate imoc ururueandae nga Lewanonggac dzaring imoc yeneng ifingoc dzanggeandae.

⁵ Tiki yeni yeac kicfu kpemindzaeandae amma bangec buma buma yeni sisingaiandae nga bangec goa gboria monggoc yadima eremagec ngicngac nga wiac sasawa ihai kecdae yeni dzonong fedefede anggecde.

⁶ Amma yeac heregerec fingeru mongngo naric mi serima nanude. Nga kimbengaac borangngo timanu mongngo yeac wegenac naric mi kefude. Amma yengenaoc harongang wegenac kenu yeni tohoma dzindzururung kpegecde.

⁷ Kebu ye gombunga. Ye ebicnasou ngicngacfora kaso kpeyemmeande amma ebicfunac kengec worama yearu kengandae, yeng yeni negengyemmema hoangyunuande.

⁸ Amma yoara kpeandae, yeneac deu ine tunggbaungtoango hama meicyunudarude nga ngabafora kisangyunuu kundung manau kemema ihai sufuma kpac anggecde.

⁹ Nineweac ngicngac ngeni Kebu mangana ammigecdeac deareng anggecdeu, ye areng ifia sasawa yeneac hafoangoc kpae heiyemmeude nga ifi ayemmeu ubakpekpengina monggoc meficgegecde imocac sing mong mi fingerude.

¹⁰ Ngeni, minggongngic isoc kecdaeac amma hororochaseng heigec fema dzanggeu gerecngo faigec dzeande ifi isoc sasawa ngonohodarude.

¹¹ Kebuac ngabayoac deareng amma imocac edekpou mangana angemmekefec ngic ifia imoc ngenearunac fingerec.

Yehuda yenearu yoac momoc kende

¹² Kebungo yofi dede, “Assur yeni habutoa nga kuctoanginagoc andae ammanu neng sifu yunukpebuc amma meicyunudacbesandua nga Yehuda ge kpendzennu bic faigukefai imocac amma kpendzennu monggoc mi faigubade.

¹³ Amma yeneng tofo gearu faigec imoc kpetackebesandua nga kudoc kpegenggec imoc mesigembesandua.”

¹⁴ Kebungo Ninewe geac yofi dekperagide, “Geac fingecsahega imoc dzonggobesande amma ngeneac nemuonga icngo memea nga aieng gerea nganoc hetinggegec patatakeande imoc nemuongaac amaunac hembarackema meuku ambesandua. Amma ge faka gombunga mong mi angkecnecac kicserega fingerudeac desiduae.”

¹⁵ Kic fima henggec, ngic siduc gombung nga ruaeyoac dekperagingemmeude, ye tikiusing habesande. O Yehuda ge hombanggau tacma Kebuaru dedeseriga denec imocac foraya meficgebesena. Ngabafocga Assur yeni bangecgau susung ferecge monggoc mi anggecde, yeni yunukpebuc ayemmema meicyunudacbesandua.