Mitiyegec 89 - Deduamiti

Kebu, ge dahai?

Esrangic Etangngo masikiyegec yofi heiec.

¹ O Kebu, geng yoac dedzege amma imoc modackecnecac nasoya nasoya yegec heigembade nga heigembesandua. Ge yoac modac modac Kebu, imoc enacbibicnango dekperagiba fingecsahe fekefudesoc, yeneng imoc negendacgecde.

² Ni yofi deba, “Geng yoac dedzege amma imoc modackecnec, fakaga imoc nasoya nasoya faina fekefude. Ge yoac modac modac Anutu. Kurumenga kurumenga nasosoc fefeseri fekecdae, ifi isoc geac fakaga ifingoc fekefude.”

³ Geng yofi denec, “Ni ngicna Dawid meisinggema yegoc dzadzahac meba ye kingangngicna anu yofi deserima edeai,

⁴ ‘Ni geac gboricfocga tatacnginau faiyunuba yeneng nasoya nasoya seria tacgecde. Yeni fingecsahengina fekefudesoc ngictau tatacfu tacma ua imoc torokpeu torokpe medacgecde nga medacbesandae.’ ” Selac

⁵ O Kebu, ge kurumenga kurumenga sing faiyemmena yeni geac kucfaka bibiagoc oyang boyang mebisia. Ge yoac modac modac Kebu, fakaga imoc kpetiac areng yeneac adzoc adzorou dengerebesonga.

⁶ Kebu, wi sawakebangau ge isoc mong mi kecde. Nga anutu hania hania yeneac medacfocngina kecdae, botucnginau ge isoc mong mi kecde.

⁷ Kpetiac areng yeneac adzoc adzorou tacandae, yeneng yofi negengandae, Anutu ye damu damuyagoc. Ye engenatoa amma yeng kurumenggac areng ye yerecgema nandae, yeni feracyunuu yeneng yeac kengec homac angandae.

⁸ O Anutu, kurumenggac wasaiareng kunengngina, Kebu, mongngo ge isoc kuhagoc mi kecde. O Kebu, ge yoac modac modac Kebu nga fakaga imocngo orongguma fede.

⁹ Kondungngo kpeborong kuhagoc kpeu geng mingina amma kuha memana siri kuneng kpeu mengisiyununade.

¹⁰ Ngic yeneng ngic goa yunuma memanganeyunugec, ge ifi isoc Aigita bangec medzamena feec. Ge mariga kuhagocngo ngabafocga kisangyununa yeni singsararang kpegec.

¹¹ Ge kurumenga kurumenga yeneac mingingngina nga bangec imoc ifingoc geac. Geng bangectoa bangec nga wiac sasawa ihai fedae yeni faiyununa seria kecgecde.

¹² Geng bangec noboc noboc not nga saut meficyununec. Taboro nga Hermon tiki yereng sogaima geac kpac kuneng oyang boyang memiecde.

¹³ Fuakpegangga imoc kuhagoc nga mariga imoc kuhagoc, ge marifoiga sawau miacnec.

¹⁴ Ge fakaga dindingac nga ge sing dindingac modacma yoac desiannec, wiac imocngo ngictau tatacgaac sering ande. Geng yoac dedzege amma imoc modackecnec amma ge yoac modac modac Kebu, fakaga imocngo waraigendape.

¹⁵ O Kebu, ngicngac geac kicmesugaac kperagiau kecandae, yeneng afegugecdeac sing negemma sogaima kpacma afeguandae, yenennoc kenecnginagoc.

¹⁶ Yeni geac kpac kunenggac amma asoacnac kemma marai sogaima kecma fakaga dindingac afehegecde.

¹⁷ Ge ngicngac imoc yeneac kibikperagi nga kucngina. Amma ge wosoefac anemmena kucninagoc amma firang annide.

¹⁸ Ngictau ye kasonina nga Kebu ye kasoninaac mingina. Ye Isracelac kpetiac ngic amma yeng neneac ngictau, yeac mingina.

¹⁹ Ge warac onga nga kpefingyoacfu singyoacga dema ngicngacfocga geac yoac modac modac kecgec, yeni yofi edeyununec, “Ni ngic mong kuhagoc meficgema ye ngictauac ira heimiai. Ni ngicngac yeneac botucfunac sebigbori medac mong meisinggema gununggeai.

²⁰ Ni kingang ngicna Dawid meisinggema kerecna kpetiacngo nadzicmiai.

²¹ Ifi anu marinango ye nasoya nasoya nanggema marinaac kucngo meseribade.

²² Ngabangic mongngo ye tobanggema naric mi feraheude nga ngic Anutu ngadehema mangana megecdeac ayemmede, yeni ye mi memagecde.

²³ Ni ngabafora yeac kicfu kpedzameyunubade nga ngic ye ubango ukudae, yeni kpefacyunuba mayunuude.

²⁴ Ni yoacna modacma yoac dedzege amma imoc modacbade, fakana imocngo ye garenggekefude. Ni neannaac kpacfu nanggeba yeng kuhagoc amma firang anude.

²⁵ Ni kondung yeac mariu faiba yeng imoc garenggema marifoiango doku haandae, yeni garengyunuude.

²⁶ Yeng kpacnuma yofi deude, ‘Ge Manna nga Anutuna amma memengerecnaac hoc peperandzi seria.’

²⁷ Ni ye meisinggeba yeng neac morocmedac amma bangecfu ngictau yeneac kunengngina anudeac faiba kefude.

²⁸ Ni yoac yegoc dedzege amma imoc nasoya nasoya modacma dzadzahacna yegoc mebade, imocngo yegoc fefeseri feude.

²⁹ Ni Dawidac nambarac nga esamedac fingeckecgecdesoc tatacnginau faiyunuba nasoya nasoya seria tacgecde. Yeac ngictau tatac nanggeba nasoya nasoya fekefu kurumenga kurumenga yeneac wenac dafiguc fede, kpetea ifi isoc ambesande.”

³⁰ “Esangaboforango neac dedeseri wama ngadehema dederecgeyoacna kpema imoc mi modacgecdeu

³¹ me yeni kpema nonoyoac edeyunuai, imoc mi modacgecdeu

³² ni yeneng singyoac kpegecac amma turunga kpouyemmema gbarucngo yunubade. Yeni ngicngac ogofocngina memanganeyunugecac dzikacngo yunuba kpendzeng kpegecde.

³³ Ni Dawidgoc yoac dedzege amma imoc modacduae, fakana imoc naric mi wangecbade. Ni ikoc mi ambade nga yoac modac modac fakana naric mi wabade.

³⁴ Ni dzadzahac meai, imoc mi kpebade nga enacnaunac yoac maec, imoc mengerema siriha mong mi debade.

³⁵ Ni naso mocgu kpetiac kekecnau namma dedeseri seria deai, imoc nasosoc fora angkefude, ‘Ni Dawid ikoc mi ammibade.’

³⁶ Yeac bangecfora yeni kpac angana kpac torokpeu torokpe kecengkecgecde. Wenac kiwango nasoya nasoya neac kicfu fekecde, ngictau yeac ngictau tatacngo ifi isoc fekefude.

³⁷ Sawakebanggac hepuc, imoc afo, ye tataha mi wama takecde. Nga ni ngictau tatahau faiba ye ifi isoc nasoya nasoya seria tackefude nga takecbesande.” Selac

³⁸ Geng kingang ngicga Dawid kerecdokungo nadzicminec, fora. Nga geng ine yeac herebu negemma ye ngadehema wanec.

³⁹ Ge kingang ngicgagoc dzadzahac menec, imoc wana wisickeu ngictau iraya bangecfu sendunnu ukuna gotengagoc andarec.

⁴⁰ Ge yeac taonggac hocoda kpembarackedacma amea seria kpedzamedacna sesuhasac andae.

⁴¹ Nga ngicngac yeneng imohai ferecge kengha angandae, yeni iwaiya mema woraandae. Ngicngac yeac wegenac kecandae, yeneng desofoc ammidae.

⁴² Ge ngabafora marifoingina memiacna dzikacfu serigec ngabafora sasawa sogaigecdeac sing meficgeyemmenec.

⁴³ Fora, ge ngictau dzikacfu mi nanggenec nga yeac dzikacac beang, imocac enara merenna ngadeaubigeng kenec.

⁴⁴ Ge ngictau yasuya mariaunac wangecma ngictau tataha bangecfu ukuna maec.

⁴⁵ Ye sebigbori kecmanu ge wenahaac kpete mewegenena homac mi anec. Ye game kpekpeu faina imocngo ye semeu kecde. Selac

⁴⁶ O Kebu, ge mesufuemema monggoc kicninau fingecnadeac tomai kecduae. Ge nasoya nasoya ifi sufuma kecnade, ifi isoc ande. Geac herebu gerec isoc dzekecde, imoc wisickeudeac tomai kecduae.

⁴⁷ O Kebu, kekecna imoc wegenanecsac ande, imoc negenna febeso. Ge ngicac medacfora fainununa eng fingecma kpac annide.

⁴⁸ Ngic mong ye kecengkecma mi homeude, ifia mong mi kecde, kpac. Homecamau ngic kucgoc meyunugec ngic mongngo imohacnac naric mi mesiude. Selac

⁴⁹ O Kebu, geng yoac dedzege amma imoc modackecnec nga yoacga modackecnec, imoc warac Dawid deserima desiminec, imocac fora hofocduae.

⁵⁰ O Kebu, yeni ni, kingang ngicga deendema anengandae, imoc negenna febeso. Ngicngac yeneng deendema anenggec ebic imoc herenau tofohokecduae.

⁵¹ O Kebu, ge ngictau meisinnuma kerec nadzicnennec nga ngabafocna yeneng ine deendema anengandae. Ni sing tikengkecba yeneng hanititina hemmodacma desusuic anemma yoac mangana denenggecde.

⁵² Kebu nasoya nasoya kenehebesonga. Imoc fora nga fora yombong.