Mitiyegec 86 - Deduamiti

Ge singga edzacnuna

Dawidngo yofi numuec.

¹ O Kebu, ni ngic makpekpeango iwaiac obohoma kecduaeac kedzacga faima yoacnaac turunga merennenna.

² Ni geac enac tofoc tofohoga nga ge neac Anutuna. Ge imocac kekecna onggonggena. Ni geac kingang ngicngo negenseriguma kecduaeac ebicfunac mesinuna.

³ O Kebu, ni asoacnac kemma marai gearu kiackecduaeac ge neac ubaga manganeu.

⁴ O Kebu, ubaongana memiacma gearu faiduaeac ubaonganaac ubangerec meficgenenna.

⁵ Ge gombunga anemmema kopocsic wanemmenade. O Kebu, geng yoac dedzege amma imoc modackecnec. Nga ngic yeneng hofocgugec geng faka imoc modacma wiac gombunga efea kpac ayemmenade.

⁶ O Kebu, ge kedzac faima nunumuna negenna. Ni kpesi kpesi amma kiacba ge kedzac kpema negenna.

⁷ Geng turunga merennennadeac ebicnasonau kpacgubade.

⁸ O Kebu, anutu hania hania kecdae, yeneac botucfu mongngo ge isoc mi kecde. Anu geng ua mekecnec, ua ifi isoc mongngo mi mekecde, kpac.

⁹ O Kebu, ge bangeha bangeha ngicngacareng meficyununec, yeneng gearu hadacma kicgau fafoc heigemma hama geac kpac kuneng heiwayong memigecde.

¹⁰ Ge mocgungo Engenatoa kecma faka bibiagoc mekecnec amma geng Anutu.

¹¹ O Kebu, ni yoacga fora modackecbadeac singga kpounenna. Ge herenau ubayohoc meickena geac kpac kuneng eweheiheigoc hoanggebesare.

¹² O Kebu Anutuna, ni heregoc ge ubangerec megemma geac kpac kuneng nasoya nasoya heiwayong memibade nga memibesandua.

¹³ Geng yoac dedzege amma imoc modackecnec, ge imoc anenna hemba wiac engena ande. Kekecnango emu homecamau feu gennoc kekecna imohacnac mesina ereec.

¹⁴ O Anutu, ubakpekpe ngic yeneng yacma nubeso anggec yarengic yeni habutoagoc hama kpebucnubeso andae.

¹⁵ O Kebu, ge Anutu ubamangang nga wosoefac mingina. Ge ngaba bic mi annade nga geng yoac dedzege amma imoc modackecnec, fakaga imoc wiac engena. Ge yoac modac modacac Kebu nga faka imocngo wake wakea fegende.

¹⁶ Ge nearu dzigenema neac ubaga manganeu. Ge kingang ngicga kuc nemma kingang ngacgaac medac, imoc ni, ebicfunac mesinuna.

¹⁷ Kebu, geng meficnuma meserinunade. Ge imocac ngic ubango ukunudau, yeneng geac fakaga hemma gameyunuudeac geng neac negenna ngereeande, imocac ma mong edzacnubesena.