Mitiyegec 8 - Deduamiti

Ge kpacga Engenatoa

Yegecgareng yearu. Gat yeneac musiwiac kpema heibesonga. Dawidngo mitiyegec yofi heiec.

¹ O Kebu, ge Kebunina, bangectoa bangec fekendeu kpacga Engenatoa yombong feude. Ge kurumenga kurumenga feracyunuma kucga kibikperagiagoc wi yombong faina fede.

² Ge nambarac kapia nga sabac namuu kecdae uayoac yemmena yeneng geac kpac kuneng heiwayong memigec faka kuhagoc fingerude. Ge ngabafocga kecdae, yeneac amma ifi annec. Nambarac yeni ifi anggec ngabafocga nga ngicngac goa yeni turung kpoukpouyoac homac osoandae, yeni yoacngina kpac anu waicke tacgecde.

³ Geng kurumenga kurumenga meficyununa marikibiga andae nga ge afo nga asomeng sasawa wi faiyununa tatacnginau seria tacgec yenenganduae. Yenemma

⁴ yofi negensima deba, “Geng ngic negensinunuma ngicac medacfora gombunga garennunukecnec, imocac warecguduae.

⁵ Geng ngic negensima meficgema ngicac medac gombunga garenggekecnec, imocac warecguduae. Ye kurumenggac areng yeneac mamea anudeac geng faina kefec. Amma ye kuc kibikperagiagoc kekecac iraya heiminec.

⁶ Ge marikibiga sasawa meficgema yeng imocac kunenga kefudeac fainec. Ge wiac sasawa yeac haniaac bageau bic faiminec.

⁷ Imoc amau rama burumaka sasawa nga manennu yang sasawa

⁸ amma sawau neng sasawa nga kondunnu kondungyang amma kondung manau yang hania hania singngina mema kenghaandae, imoc yeac haniaac bageau faina garengyunuude.”

⁹ O Kebu, ge Kebunina, bangeha bangeha fekendaeu kpacga imoc engenatoa yombong fekefude.