Mitiyegec 78 - Deduamiti

Ngicngacfora waraiyemmekecfec

Yegec yomoc masiki uba modacma heibesonga. Asafngo yegec yofi heiec.

¹ Ngicngacfocna, ngeni neac kpoukpouac kedzac faigec enacnaunac yoac mau kedzac faima negembisia.

² Ni yoac heima deba, imoc enacnaunac maudeac ande nga wiac warac kundunnu sufu sufuya feec nga wiac ngade fingecbesande, imocac yoac debade.

³ Esangabofocnina yeni warac yoac degec, imoc kedzacngo negening nga imoc negen negenninau fede.

⁴ Neni nambaracfocninango imoc negenggecdeac wiac mong naric mi mesufunide nga fingecsahenina ngade feengkefudesoc, yeni edeyununide. Kebungo kuc nga kibikperagiagoc kecma uatoa meec, imoc edeyununide. Nga yeng kucfaka bibiagoc mekefec, imocac siduc ayemmenide.

⁵ Kebungo Yacakowac areng dederecgeyoac yemmema edeyunuma kpouyemmeec nga Isracel habu dedeseriyoac yemmema edeyunuma kpouyemmeec. Ye esangabocfocnina yeneng nambaracfocngina edekpou ayemmegecdeac edeyunuec.

⁶ Fingecsahe ngade feengkefude, yeneng imoc negenggecdeac negenec. Nga nambaracfocngina mi fingecgecngo ngade fingecgecde, yeni imoc negenggecdeac edeyunubesandae.

⁷ Ifi anggec yeneng Anutu negensima fora fingerudeac tomai kecma yoacngina negemma Anutuac kucfaka bibiagoc mi nigecyunubeso. Yeni yeac nonoyoac tofohoma kecbisia.

⁸ Yeni mangesafocngina yeni isoc ambauac ifi anec. Mangesafocngina yeni serima kecma yoackpekpe areng amma herenginango ye seria mi modacgec nga asunginango Anutu wama kecgec.

⁹ Efrayimgac areng tebe mema kecma dzikac nasou dzigenema woragec.

¹⁰ Yeni Anutungo dzadzahac meec nga yeac dedeseriyoac mi modacma wadacgec.

¹¹ Yeng wiac bic meec nga kucfakaya bibiagoc edzacyunuu kicnginango imoc henggec, yeni wiac imoc nigecyunudarec.

¹² Ye Aigita bangecac Tsoan yeneac bangec nobohau esangabo yeneac kicfu kucfakaya bibiagoc meec.

¹³ Ye kondung kperecgeu doku tegecma yohockang amma noboc noboc emma serima nanu yeng sing faiyemmeu yeni botuhau ferecgema kenggec.

¹⁴ Yeni wenacfu hoengngo waraiyemmema hesicyunuec nga tofocnac gerecac kperagingo mekperagiyunudarec.

¹⁵ Ye bangeckisiu hoc kpendziru keme kemeunac doku efea kpac ereu imoc gumecyunuu nekecgec.

¹⁶ Ye doku hocfunac kpeu dokungo doku dzuamagoc maande, ifi isoc mama feec.

¹⁷ Ngicngac yeneng imoc henggec, fora. Nga yeni ine yeac uba kpema kopocsic monggoc meficgema bangeckisiu Kebu Engenatoaac yoac kpekecgec.

¹⁸ Yeni songongina yaka siriha monggac ayemmeu imocac serima dekecma Anutu igockema

¹⁹ yoara kpema degec, “Anutungo bangec gbangge gbanggea yomohai yaka meficgenemmeudeacsoc mi ande, kpac.

²⁰ Foracngoc, ye hoc kpendziru dokutoa nga doku tunggbaung endzirango mama feec. Nga yaka ine naric mi nemmeude, kpac. Ye ngicngacfora yang naric mi meficgenemmeude.”

²¹ Imocac amma Kebungo yoacngina negemma herebu kuneng yombong negemma Yacakowac areng yenereudeac gerec mong fiu dzeu ngabayango Isracel yenearu fingecma feec.

²² Yeni Anutu mi negensinggema ye ebicfunac mesiyunuudeac kuctoa femide, imoc mi negenserigec, fora.

²³ Nga ye sifu hoeng wi sawau edeyunuma kurumenggac nagu witiu

²⁴ uaya meu manna yakango kia isoc witinginau mau ngicngac yeneng negecdeac yemmeec. Ye kurumenggac yaka yemmeu nekecgec

²⁵ yaka efea kpac faiu mau nema kecgec. Bangecngicngo angero yeneac yaka nekecgec.

²⁶ Nga yeng kurumenga kurumenga imohai wenac ere ereaunac firang mong sing meficgemima sueu haec. Ye kuhagocngo saot bigeng imocac firang mong ameaunac hesickema hau ngadeau haec.

²⁷ Hau sendung homac angande, ye ifi isoc yang homac ukuu kia isoc maec. Neng kpegangnginagoc yeni kpetengina kondunggac sangi isoc anec, yeni kia isoc magec.

²⁸ Yeng negemmanu neng yeni ngicngac kporucamangina megec nandacgec, imohai mama tacgec.

²⁹ Ngicngac yeni songonginango noc wiacac anu derecgegec, imoc yemmeecac ngicngac yeneng neng imoc nema negebec anggec.

³⁰ Songongina imoc mi wisickemanu yaka enacnginau femanungoc

³¹ Anutungo ine ngaba ayemmema ngicfocngina kucnginagoc kecgec, yeni kpebucyunuec. Isracelac arengfora yeneng semeng sabayagoc isoc kecgec, yenemma memayunuma kekecngina herecgeu kpac anec.

³² Ye wiac sasawa ifi anu yeneng ine kopocsic meficgemangoc kecgec. Yeng kucfakaya bibiagoc mekefec, imoc fora. Nga yeneng ine imoc wama mi negensinggegec.

³³ Ifi anu ye kekecac wenacnaso faiyemmeec. Imoc naso mocgu asu taigec kpac angande, naso ifi faiyemmeu kpac anec. Yeni kengectoa amma kpidohoma ubaebicgoc kecmagec kifangina kpac anec.

³⁴ Nga Anutungo yunukpebuc anec, yeni naso imohaingoc ubamereng amma herenginango hofocma ye modacgec.

³⁵ Anutu ye yeneac hoc peperandzi seria nga Anutu Engenatoango bummeyunuma ebicfunac mesiyunuec, yeni imoc negenggec feec.

³⁶ Nga yeni enacnginango ine kerecyoac ammima nedzarangnginango ikocyoac ammigec.

³⁷ Yeni herengina yearu seria mi feu yeac dzadzahac imoc faka forau mi modacgec.

³⁸ Yeni kopocsicnginagoc kecgec, forangoc, nga yeng sifu yeneac ubea manganeu manganangina wama mi kpetotieyunuec. Ye naso homac ngabaya dzegema herebuya erebacac imoc kpetarimiec.

³⁹ Yeni bangecngicngacsac, ye imoc negenu feec. Yeni ngicngo asu taiu erema kemma monggoc mi dzigeneande, yeni ifiasac.

⁴⁰ Yeni bangeckisiu kecma naso homac yombong yeac yoac kpema bangec gbangge gbanggeau ubaebic fingecmiudeac ammigec.

⁴¹ Ifi ammima Anutu monggoc nga monggoc faitobannu faima Isracelac Kpetiac Ngic heremiac miac ammikecgec.

⁴² Ye kuc mingina, imoc mi negensigec nga yeng ngaba yeneac mariunac bummeyunuma mesiyunuec, wenac imocac mong mi negensigec.

⁴³ Ye Aigita bangecfu ngic yeneng negensinggegecdeac kucfaka mi hengena meficgema Soang manennu kucfakaya bibiagoc hania hania mekefec, yeni naso imoc mong mi negensima kecgec.

⁴⁴ Yeng dokutoangina merenu sac andacgec yeni doku imohai negecdeac osigec.

⁴⁵ Mogoc enaragoc areng kuneng yombong sueyunuu botucnginau hama neyunudacgec nga sepeng homac sueyunuu kpetotieyunugec.

⁴⁶ Ye semengngina kpembong gumecyunuu nedacgec uanginaac semeng imoc ipua gumecyunuu nedacgec.

⁴⁷ Ye nomanggbomea kia isoc faiu waing uanginau mama imoc kpetotieu kpac andaru nomang sueu nomangngo figi icnginaac gbomea dzedarec.

⁴⁸ Yeng negemmanu nomanggbomea kia isoc burumakanginaac witiu mama memanganeyunudaru gbumparandang kiafirangagocngo rama nga noning memanganeyunudarec.

⁴⁹ Yeac ngaba imoc gerec dzeande, ifi isoc dzeu ye witiha mesiu yenereec. Ye herea buu mangananginaac amma ubea hodungaiu ubaebic kuneng mema kpetotie uaac angero habunginagoc sueyunuu hagec.

⁵⁰ Ye herea buu imocac singa meficgema homefunac mi onggongyunuec. Ye kekecnginau homecac kpae mi faima hafei manganaac enarau faiyunudarec.

⁵¹ Ye Aigita yeneac warac nambaracfocngina kpebucyunudarec. Ye Hamgac esangabo kporucamanginau kecgec, yeneac kucnginaac waracmedacfocngina sasawa kpebucyunudarec.

⁵² Imoc wisickeu Anutungo ngicngacfora meyunuma rama wangecyunuma waraiyemmeandae, ifi isoc waraiyemmema kenec. Ngic yeneng bangec kisi dokuya kpacfu ramahabu hesicyunuandae, ifi isoc wangecyunuu kenggec.

⁵³ Ye yenenggareng ayemmema onggongyunuma hesicyunuu yeni kengeha kpac kecmagec kondungngo ngabafocngina semeyunuec.

⁵⁴ Ye meyunuma yengena bangec kpetiacfu kenec. Ye firang amma ngabafora feracyunuma yengena marifoiaac kuhango tiki imoc warac firang amma meecac ngicngacfora imohai meyunuu kenggec.

⁵⁵ Yeng yeni hagecdeac amma bangec monnunac ngicngac Anutu mi negemmidae, yeni kporacyunuu kenggec bangec imoc Isracel kisi medereyemmeu yeni amagerecngina ihai feudeac kporucamanginau faiyunuu tacgec.

⁵⁶ Ye ifi anec, fora. Nga yeneng ine Anutu Engenatoa tobanggekecma yeac yoac kpekecma dederecgeyoac mi modacma eng kecgec.

⁵⁷ Yeni mangesafocngina warac angkecgec, ifi isoc Anutu wama ye mi negensinggegec. Ngic yeni tebe gbaring gbaring kpesaigec dindingac mi kengande, yeni ifi isoc ihai nga ihai kenggec.

⁵⁸ Yeni nemu yeneac arata hania hania tiki bumau meyunuma Anutu woseau mema ngaba meficgemima nemunginagoc kecma yeac keracmangang meficgemigec.

⁵⁹ Anutungo imoc negemma herebu kuneng fingecmiu Isracel habu wayunudarec.

⁶⁰ Ye amagereha Silo fekefec, imoc wama kporucwomonga ngicngac yeneac botucfu tarec, imoc ifingoc wama

⁶¹ kuhaac katapa wama ngaba yeneac mariu faiu yeneac witicamau feec. Yeng kuc nga kibikperagia wama ngaba yeneac mariu faiu feec.

⁶² Ye yengena ngicngacfora herebu negengyemmema wayunuu ngic yeneng dzikacac beangngo kpebucyunugec.

⁶³ Gerecngo sebigbori medacfocngina yonohou homegec naroangfocngina ngiha kpac kecma memeturanggac yegecngina mong mi heigec.

⁶⁴ Ngic yeneng womonggarengfocngina dzikacac beangngo yunuma kpebucyunugec enengfocngina yeni kiac ubamangang anggecdeacsoc mi anggec.

⁶⁵ Anu ngicngo gauunac yacandae, Kebungo ifi isoc amma yarec. Ngic seria mongngo waing dokuac kucfu arohoande, ye ifi isoc arohoec.

⁶⁶ Ye ngabafora yunuma firang amma game kpekpeu faiyunuu nasoya nasoya ifi kecgecde nga kecbesandae.

⁶⁷ Ye Yosefac kporucama ngadehema Efrayimgac areng mi meisinggema

⁶⁸ Yehuda areng meisinggeec. Ye Tsiontikiac songo negendeac imoc meisinggema

⁶⁹ womong kpetiac meec imoc kurumenga kurumenga wi fekendae, yeni isoc anec. Ye bangec meficgema faiu feengkecbesande, womonga kpetia ifi isoc meec.

⁷⁰ Ye kingang ngiha Dawid meisinggema rama odaunac meu haec.

⁷¹ Ye Yacakowac areng garengyunuma yeng waraiyemmeudeac faima Isracel habu garengyunuudeac ye faiec. Meisinggeu yeng rama nonggo medac yenenggareng ayemmekefec, ua imoc wama Anutu yengena ngicngacfora garengyunuec.

⁷² Dawidac hereu ikoc nga hamangec mong mi feu yenenggareng ayemmema negen negenggoc uaya mema mariango garengyunuma wangecyunuu kecgec.