Mitiyegec 68 - Deduamiti

Anutungo firang ande

Yegecgareng yearu. Dawidngo yegec nga mityegec yofi heiec.

¹ Anutungo yacma ngabafora yunuu singsararang kpema kecbisia nga yeac modzongina tiande, yeni yearunac worama kendacbisia.

² Firangngo hosuc mefiranggeu kengkecde, geng ifi isoc kporacyununa worama kendacbisia. Ngicngac Anutu ngadehema mangana megecdeac ayemmeande, yeni ge negemmana kerecngo gerec wegenahau tacma sisingaiande, yeni ifi isoc Anutuac kicfu sisingaima kpac ambisia.

³ Anu ngicngac dindingac, ngeni ubangerec negemma Anutuac kicfu sogaima kecbisia. Ngeni ubangerec homac yombong negemma sogaibisia.

⁴ Ngeni Anutuac yegec heibisia, ngeni yeac kpac kuneng heiwayong memima dedengerecyegec heibisia. Kebu hoennu tacma kengande, ngeni yeac kicfu sogaima yegec heima oeha memibisia.

⁵ Anutungo kpetiac womongau tacde. Ye beging mang ayemmema hotsec ewefocngina homemea yenenggareng ayemmema onggongyunuude.

⁶ Anutungo ngicngac dzengong amagerec meficgeyemmeu tosofocnginagoc kecgecde. Ye witicngic witicamaunac mesiyunuu yeneng mama kecma wiac monggac mi obohogecde. Yoackpekpe ngic yeni ine bangec dzangge dzanggeau kecgecde.

⁷ O Anutu, geng warac ngicngacfocga waraiyemmema bangeckisiusing wangecyununa kenggec. Selac

⁸ Imohai bangecfu usoc meu Anutu, Sinai bangec gbangge gbanggeac Anutu amma Anutu, Isracelac Anutu, kurumenga kurumenga yeneng geac kicfu kia faigec maec.

⁹ O Anutu, geng kia faina bangecfu mau dokuac mi obohoing. Ge bangec gbangge gbanggea soc kpema nemmema kuha mina icngo monggoc kpedzienu bangec imoc kerehagoc anec.

¹⁰ Ifi anu kpebunggango bangec imohai kemma tacngisigec. O Anutu, ge wiacga homac fedeac amma ubangerecga imoc mema makpekpea yemmena wiac monggac mi obohogec.

¹¹ Kebungo yoac deu ngicngac homacngo siduc imoc tofohoma dekperagima

¹² degec, “Ngictau yeni wasaingicfocnginagoc bic kemma woradacgec ngicngo dzikacfu firang amma iwai megec ngac yeneng amanginau kecma imoc hendzicma megecde.

¹³ Amma dzikacac hepuc amau tacgec yeni neng dzongina silwa nga gol tengging tengging isoc ifiango sebingina soko sokoa feec.”

¹⁴ Anutu kpudamuyagocngo ngictau yunuu singsararang kpegec imohai nomang kia isoc mama Tsalmon tiki semeec.

¹⁵ O Basan tikitoa tiki, ge bumaga homac nga herea herec, o Basan tiki.

¹⁶ Tiki bumaga homac nga herea herec, geng nocac kichodung amma Anutuac tikiu kic finec? Anutu yengenaoc tiki yomoc yeac anudeac segerema ye ihai ngictau kecma nasoya nasoya tacyac anude nga ambesande, ge nocac imoc kihodung amma hengkecnec?

¹⁷ Anutungo dzikacac keretaha tausenga tausenga mehadac. Ye Sinai bangec wama kpetiac womongau emma kecde.

¹⁸ Geng wi sawau yombong emma witicareng witicyunuma wangecyununa arenggau kenggec. Ngic yeneng ubangerecac wiac genggec. O Kebu Anutu, geng ihai kecnec nga ngic yeni geac modzongina tiu yoacga kpeandae, yeni ifingoc ubangerecac wiac genggecde.

¹⁹ Kebungo nasosoc sesehenunuma nanggenunukecde, ye keneheni. Anutu ye memengerecnina. Selac

²⁰ Anutunina ye memengerec mingina nga Kebu Isracelac Anutu, ye homecfunac mesinunuudeac mingina.

²¹ Ye ngabafora yeneac oruc kpedzamema ngic mangana mekecma nasosoc kopocsicnginagoc kecandae, yeneac orucsicngina dzoeagoc hetackeude.

²² Kebungo yofi deec, “Ni ngic imoc Basan bangecfunac merengyunubade nga kondung buya keme kemeaunac meyunuma erebade.

²³ Ifi amba ngeni haningina yeneac sacngo nadzicgecde nga kasifocngina tosea ifingoc yemmegec sacngina aberegecde.”

²⁴ O Anutu, hombanggac habuga arenggoc hagec ngicngac yeneng genggecde. Neac Anutu ngictauna habuya arennu hama kpetiac womongau enu ye henggecde.

²⁵ Yegec heihei areng yeneng waraima wiac kpegec music fingecande, yeni wisic wisickeau hagec ngacnaroang yeni tambaringngina kpema botucnginau hadae.

²⁶ “Kpebung habutoa manau Anutu kenehebesonga. O, Isracelac fingecsahe, ngeni sasawango Kebu kenehebisia.”

²⁷ Benyaming areng yeni areng kapiango enara meyemmeu kendae. Yehuda arennunac ngictau kekecac areng habutoango kecmagec Dzeburung arenggac ngictauac areng nga Naftari arenggac ngictauac areng yeni ifingoc modacyunudae.

²⁸ Anutu ge kucga kpedzucnema efaina. O Anutu, ge kucgaac hania warac mekperagima edzacnununec, imoc monggoc edzacnununa.

²⁹ Womongga Yerusalaimnu tacdeac ngictau yeneng ubangerecac wiac mehama gendae.

³⁰ Yang hania hania dokuac haseng manau kecandae, ge yeneac yoac ngabasiric dena kate burumakangiwa yeni habunginagoc kenggec ngic yeneac burumaka medaha kapia botucnginau kecgec ge gorongina kpebesena. Geng yeni memayununa silwa toseatoa mehama gembisia. Ngic sasawa dzikacac songea negengandae, yeni yununa singsararang kpebisia.

³¹ Ngic kuneng yeni Aigita bangecfunac hagec ngic Etiopia bangecfunac yeni maringina bic miacma Anutuaru hagecde.

³² Bangec areng ngictaunginagoc kecdae, ngeni Anutu yegec heimima Kebu yegecfu yaiyo kpemibisia. Selac

³³ Negenggec, yeng kurumenga kurumenga hanahema fingecgec, yeneac witinginau tacma kende. Ye ubaudumenga miacma kunengngoc yombong kpacde.

³⁴ Anutu ye kuhagoc, imoc deyadibesonga. Yeng ngictauac kucgoc amma Isracel ngicngacfora garengyunude. Yeac kuc imoc sawau fedengoc.

³⁵ O Anutu, ge damu damugagoc amma ge kpetiac womonggau kecnec. Isracelac Anutu ye ngicngacfora gareng anggecdeac kuc nga sebinginaac kuc yemmeude. Anutu keneheni, hallelu Yac.